القعود يعض !!!

[حسن بن شافي]

صباح الخير ع الجميع.....
ياجماعه عندي قعود كان يسرح مع البل يوم حقق قمت وربطته يوم خذاله 8 شهور طاح في العض واكثر مايعض الخشب وابعدنا منه الخشب وهو مرن هادي ومرن تقول بياكلك قلت يمكنه ضايق وقمت عليه وفكيته ارباطه وعليه قيده وعدى على البل بغى يكسرها قمت عليه وربطته مره ثانيه ولا جيته فتح ثمه يبي يعضني ....
للعلم القعود يلقي بعد اربع شهور مادري ان كانه مسنن او محكور والله اني احترت ياجماعه.....

اللي عنده حل لايبخل علينا جعل من جابكم في الجنه

[محمد أبو الجدايل]

اضربه ووريه غلطه لنو بعد كدا ادا سار فحل صعب انك تطوعه ..

[حسن بن شافي]

هههههههه يامعن كيف اوريه غلطه ياخوي انا اتكلم عن قعود ماهوب ولدي

[محمد أبو الجدايل]

ههههههههههههههههههه صح كلامك

لكن انا اقولها لك اضربه ووريه غلطه لا سار بعير ويضرب صعب يتطوع

فهمت علي ..؟؟

يعني كل من جاه يعض اضربه بحيث بعد كدا مايعض

ولد خالي عنده ( بعير وليس قعود ) وكان يتهربد وكان يعض والحين ابشرك طوعه ويمشي مثل الالف ..

[مسعود العماري]

القعود أحمر والا مجهم؟

[حسن بن شافي]

الا مجهم يامسعود

[حسن بن شافي]

ولاهنت يامعن تسلم على المعلومه وفي انتظار مسعود العماري

[حسن بن شافي]

بأنتظار استفسار مسعود

[نواف بن عبدالعزيز]

اسمع يالحبيب

واحد من الربع عنده قعود وتغير طبعه ويحاول يعض من يقربه قام وجاب الولاعه للحطب
اللي عباره عن اسطوانه صغيره كبر الفليت وله زند وماسوره طويله وكل ماقربه نوشه اللهب حتى عدل عن طبعه وسلامتك

[سعود سعد القحطاني]

السلام عليكم

ابو شافي تحية طيبه

ننتظر من الاخوان الكرام واهل التجربة والخبرة الجواب الكافي الشافي
لمثل هذه الحالة ....



انا عندي قعود جذع ها الزمان مغتر يعض يدية وطلع الدم من ركبة وزنودة من العض وش الحل يا ها بين الريح جعل من جابكم في الجنة ...

[حسن بن شافي]

اسمع يالحبيب

واحد من الربع عنده قعود وتغير طبعه ويحاول يعض من يقربه قام وجاب الولاعه للحطب
اللي عباره عن اسطوانه صغيره كبر الفليت وله زند وماسوره طويله وكل ماقربه نوشه اللهب حتى عدل عن طبعه وسلامتك
تسلم يانواف على المعلومه

[حسن بن شافي]

السلام عليكم

ابو شافي تحية طيبه

ننتظر من الاخوان الكرام واهل التجربة والخبرة الجواب الكافي الشافي
لمثل هذه الحالة ....



انا عندي قعود جذع ها الزمان مغتر يعض يدية وطلع الدم من ركبة وزنودة من العض وش الحل يا ها بين الريح جعل من جابكم في الجنة ...


مرحبا بك يابوسعد صدقت ننتظر من اهل التجربه والخبره والشباب ماقصروا

اما بالنسبه لموضوعك نفس الحاله في قعود جاري ماكلن ركبته اليمنى ولا ادري وشبلاه خصوصا انا الحاله ذي ماشوفها الا في المغتر
أتمنى من أصحاب الخبره الجواب الكافي ...

[طلال الصعيري]

طوعه ولا عرضه السوق

[محمد أبو الجدايل]

السلام عليكم

ابو شافي تحية طيبه

ننتظر من الاخوان الكرام واهل التجربة والخبرة الجواب الكافي الشافي
لمثل هذه الحالة ....



انا عندي قعود جذع ها الزمان مغتر يعض يدية وطلع الدم من ركبة وزنودة من العض وش الحل يا ها بين الريح جعل من جابكم في الجنة ...


مشكلة قعودك انه مربوط وماينفك ابدا فكه وسط البل وخله يسرح مع امهاته

وتشوف بتغير 180 درجة ..

[حسن بن شافي]

يامعن البل الي عندي القاح فكيته من ارباطه يوم هناك وكسرها تعرف معنى كسرها وقمت عليه وربطته وسلامتك

[محمد المهيزع]

السلام عليكم ورحمة الله وبركاته

اخوي حسن , ان كان البعير يستاهل التعب عليه ولا تخلص منه والله يعوضك بأطيب منه , أحد الحلول اللي جربناها ان البعير يربط وسط البل يعني مايكون بعيد عنها , وانشاء الله بيهدأ وبيزين طبعه . وان قدرت تفكه في البل بعدين وهو بقيده خله يسرح مع البل لاقدهي ضاويه من مسراحها . البعير الحار مايداني الربط والحكره بعيد عن اماته , وارجع واقول ان كان البعير مايستاهل التعب عليه ولا كلم اقرب قصاب

[مسعود العماري]

أعتذر لك أخوي على التأخير
بعض القعدان في هذا السن يعبث على البل
واذا كبر يتغير طبعه ولكن الآن ماله الا القيد
وان بغيت تفكه مع البل فإقصر قيده أو أهجره كذلك
والافضل انك تخليه مربوط الى أن يجذع وهده عسى الله يمنحك منه مايسرك

وأكرر أسفي واعتذاري على التاخير

[حسن بن شافي]

لاهنت يامسعود وجعل عمرك طويل

[تميم التميمي]

مرحبا يابوشافي غير مكان مربطه ابعده عن الاول وخله قريب من امهاته ولو دونها شبك واقصر قيده وحط له اهجار وهو في المربط
بيخابط وتاليتها بيهدا اقصر الهجار لا يرتخي
عندي قعود له شهر قيد وهجار وطاح اللي في راسه كان موالف اخته معه فالشبك سنتين وفكيتها وربطته وانجن ويوم قربته منها في طرف الشبك تلامسه بالخشم كنه هدا ويوم هجرته طاوع والحين تبرك في جنب شبكه وتسامره . تحياتي

[سالم محمد الدوسري]

كﻻم مسعود امش عليه والتميمي يقول قربه عند البل ماعليه بعد

عندي قعود ماينقرب وﻻيجيه احد حتى العلف نحطه له في معالفه وندفه له

لين جذع وابشرك الحين هدي ويضرب ولاعليه خﻻف من يوم جذع طاح اللي في راسه