رعية الغنم يا هل البل

[عبدالرحمن الوهبي التميمي]

مساكم الله بالخير جميع

اشار علي رجال شروى من يقرا اني احط مع الذود رعية نعيم

يقول ان النعيم تبي تسدك علف البل يعني من دخل النعيم نعلف البل

وانا والله مالي بالغنم ولا لي شف فيها

لكني تفكرت بناس حولي لقيت كلامه صحيح

فيه كم واحد اعرفه حاط مع رعية البل رعية غنم ويعلفون ابلهم علف ماهو صاحي

عطونا رايكم الله لا يهينكم

[عادل الضويحي]

الغنم تاكل اكثر من الابل
الابل حمله دنه فيها 250 بلكه برسيم تكفيك شهرين
اما الغنم 250 تكفيها شهر وسلامتك انا خايف تجيبلك غنم وتزيد عليك مصاريف العلف وتضيع الابل الغنم يبيلها خمسه شهور الى ان تلد يعني يبيلك خمسه شهور علف للغنم
وراعي الصنعتين مايقدر يلحق اما ابل او غنم

وجهت نظر

[عبدالرحمن بن هادي]

كلام الاخ عادل 100% خذها من مجرب

[فايز بن محمد]

من وجهة نظري أن الغنم تعلف الإبل أحياناً

ويعتمد ذلك ع عدد الإبل والغنم والرعاية الجيده

[نايف المشعلى]

الغنم غنيمه

كلام صحيح
أنا اعلف الإبل من الغنم
لكن إذا عندك 10 من الإبل يقابلها 200 من الغنم
لكن اهم شئ الراعي فهو اللي يسنع كل شئ
وسلامتكم

[عبدالرحمن الوهبي التميمي]

الف شكر لجميع من مر وشارك

الآن صوتين تؤيد وصوتين تعارض

وبانتظار آراء الاخوة

[فوازمحارب]

انا اعارض مع العلم اني شايف انه مجديه
انت ولم العصابه قبل الفلقه
الاوله ما عندك خلفيه عن الغنم وامراضه
والثانيه ماعندك راعي يسنع ولوعندك راعي يبي واحد فاهم بالغنم ويعزل ويضبطه
واثالثه انشاء العزبه للغنم مكلف نوع ما لانه تبي شبوك وأجد وترحيل كل فتره علشان الامراض تقل
اذا وفرت الثلاث توكل بالله وعسى الله يوفقنا واياك الخير

[بدر محمد العتيبي]

اذا ما عندك خبره بالغنم. لا تقربها
أو انك يكون عندك استعداد تخسر لمدة سنتين على الأقل لما تعلم من اخطإك

[حمد متعب]

راعي البل ما يفضي للغنم والغنم يقولون ام ليله يعني لو وجعت ولا سيبتها يوم ماتت وكل شي بيد الله
لكن اسألني ما بعت الغنم الا قبل عشره ايام جلست سنه والله مغير زيادة خساير

[عبدالرحمن الوهبي التميمي]

الاخوان فواز وبدر وحمد

شكر الله لكم المشاركة

الان خمسة اصوات مقابل اثنين

[سالم علي المري]

اخوي اذا ماعندك خلفية عن الغنم لاتقربها !¡
معا العلم ان خير الغنم واجد وفضيل بس عقب ماتتعب عليها وتخسر فيها
:mwalat39:
اتمنى لك التوفيق

[ثامر العجمي]

مرحبابك. انا اشوف ان فكرت الغنم طيبه لاكن لاتقرب النعيم اذا ماعندك خبره. لانها تبي اهتمام اكثر من التعليف يعني يبيلها شبك تكلفه اكثر وعلف اكثر

لاكن انصحك. بالعوارض. لانها نفس قيمة النعيم حاليا ماتنقص عن 1300.
وافضل لانها معروفه ولادتها تجيب اثنين اغلبها
يعني. اذا شريت. 30 راس عوارض. راح يكون الانتاج دبل
وراح تكسب ربح اكثر. بإذن الله وتعلف الابل بشعير وبرسيم وتنسئ الرودس. لين تزيد شحم

وجهة نظر. مع نصيحه من قلب محب لك بالخير وشكرا

[عبدالرحمن الوهبي التميمي]

الشكر للاخوة الكرام سالم وثامر على المشاركة

والنتيجة حتى الان ستة مقابل ثلاثة

وانا بديت اغير رايي

[تركي بن عمران]

انحش إلا ان كأنك فاضي لها ،،،،ما شفت منها إلا الغثا،،، الغنم مكلفه وحساسة مهيب مثل عطايا الله جبرة على الجوع والمرض والشديد ،،،،وحتى لو بدون راعي تقدر تدابلها،،،أما الغنم لازم راعي صاحي وعلف ما ينقطع وعين وتفحصها ليل ونهار عن جوع ومرض،،،،

[حمود العتيبي]

السلام عليكم
الغنم الي اقل من 300 راس ماتعلف نفسها وراعيهابل تكد عليها من جيبك .
لان 150 راس تاكل 4000 ريال وعليك الحساب
الغنم فوق 500 بتكد على الابل وتطعم انفسها وتركبك موتر جديد
ويبلها عصب عمامه وشكرا

[خالد علي]

اذا انت موظف و دوامك التزام خل الغنم عنك و لا تورط اكلمك عن تجربه

[عبدالرحمن الوهبي التميمي]

الاخوان الكرام : حمود وتركي وخالد الف شكر على الافادة والنصيحة