كيف اتأكد من لقاح الناقة

[نواف بن عبدالعزيز]

الاخوة الكرام مع التحية والتقدير

السلام عليكم ورحمة الله وبركاته


لقد اشتريت ناقة عفراء بكر اعتقد في شهر رجب ااو شعبان لعام الماضي وقال لي السوداني اللي اشتريت منه انها معشر على فحل طيب وفعلا تشاول وتوزر ولكن ديسها ماظهرالى الان وبطنها ماهوب في حجم بطن اللقحة وشكيت في لقاحها وخفت ان في رحمها عجم او حجر .
وسؤالي : كيف اتاكد انها لقحة علما بانها عند اختبارها عن طريق الفحل الناقة تشاول وترفع راسها وتوزر والفحل اذا شمها جنب عنها.
فيه ناس قالوا ادخل عليها من مجعبها وجسها وفيه من قال تلمس للحوار من جنبها

والحقيقة ان محتار ومحتاج لرايكم وخبرتكم والسلام

[معتزالعتيبي]

ياخوي نايف مدام ان ناقتك اذا عرضتها على البعير تشاول وفيها إشارات اللقاح اصبر عليها الين يجي وقت لقاحها الي هي ملقحتن فيه ويبين كل شي لاتدخل ولاتسوي اي شي واصلن البكره مايدخل عليها نهائيا وحتا اقل الايمان لو افترضنا انها ماهيب لقحه كيف تبي تضربها من البعارين وهي ما استهدت اتركها لين الله يفرجها او استعين بالله ثم بأهل الخبره يشوفونها ويعلمونك لقحه او لا وشكراً .

[طلال الروقي]

وعليكم السلام ورحمة الله

ناقتك ماهيب بلقحة .

شاريها في شهر 7 الماضي ولا بان ديس ولا بطن !!!!!
الناقة وانا اخووووك معشش والا مغشوش فيها أنت أو السوداني

[محمد سعود العتيبي]

ياخوي نايف مدام ان ناقتك اذا عرضتها على البعير تشاول وفيها إشارات اللقاح اصبر عليها الين يجي وقت لقاحها الي هي ملقحتن فيه ويبين كل شي لاتدخل ولاتسوي اي شي واصلن البكره مايدخل عليها نهائيا وحتا اقل الايمان لو افترضنا انها ماهيب لقحه كيف تبي تضربها من البعارين وهي ما استهدت اتركها لين الله يفرجها او استعين بالله ثم بأهل الخبره يشوفونها ويعلمونك لقحه او لا وشكراً .

والله انك ريحتني يامعتز كنت ابكتب كل الكلام الي قلته

مثل ماقالك لو اكتشفت الحين انها مهيب لقحه وش تستفيد لمهوب وقت ضراب

إلا إذا كنت ناوي تردها للي شريتها منه فاجبلك دكتور وخله يدخل عليها ويتلمس الحاشي

وسلامتك

[محمد أبو الجدايل]

والله ياخوي نفس الحال عندي ناقة تشاول وترفع راسها لاكن اشك انها لقحة << وعجزت اعرف عنها شي
.
..
.
للافادة فقط دكتور بيطري قلي روح الصيدلية البشرية وجيب حق تحليل الحريم حق الحمل << مدري ويش اسمه وقال لي
بي بان اداكانت لقحة اول وخاصتا ادا كانت لقحة فوق 5 شهور ..

^^ الا جرب هل طريقة يفيدنا .. هل صحيح هل كلام ..؟؟؟

[حمود عواض]

الناقه مغشوشه كيف تصير لقحه وهي لابان ديس ولاخورمت الناقه يحطون تمر ويجمعونه لين يصير كبر اليد ويدخلونها في رحم الناقه وهذه الحاله تشاول الناقه وتترك الجسره وتنقطع ريحت الجسره ويتركها البعير ولايحرص عليها وهو في الوقت فادر

[مرضي عيد]

الناقه ماهي لقحه

[متعب العمار]

ياعزيزي كان عندي ناقه ضربتها وبعد ماتم وقت الضراب تشاول وعينها عين المعشر وتباول وتركز رقبتها ,, معشر مافيها كلام

ومر عليها وقت وهي لقحه ,,, بس بطنها عادي ماكبر وشكيت فيها

جبت دكتور معه جهاز كشف لقاح ,,

وادخل عليها قبل الجهاز ,,, مع مدمن الناقه وشك فيها ,, وادخل يده في حيا الناقه وقال الناقه هذي ماهي لقحه

طلع اخر شى رحم الناقه متلاصق في بعض وتشاول كانها لقحه

وبعض الابل امــا تلاصق رحم او وجود شى في الرحم ,

تاكد وانا اخوك ,,, وربي يعوضك خير

[نواف بن عبدالعزيز]

الناقة يالربع ماهيب لقحة ويقول الدكتور رحمها مقفل

هل من علاج او تجربه او خبرة افيدونا وفقكم الباري