اختار وحده من الثنتين

[مبارك المري]

اسعد الله اوقات الجميع بكل خير

الاسبوع الماضي كنت عند الابل مع الربع وطبعاً تفرجوا على الابل وكالعادة علت الاصوات والنقاشات (المعاياه) من حيث وجهات النظر وترشيح ناقة

على اخرى ومن بين ما اختلفوا عليه مفرودتين عندي وكل واحد يقول ان هذي ازين من الثانية

وقلت مافيه الا هل مزاين هم اللي بيحلون المشكلة :confused:

وهذي صور البكار وكالعادة بتقولون ان الصور ماهي بواضحة ولكن هذا الموجود :mad:

ولا عليكم امر ارجو ابداء الرأي وترشيح وحده من البكار (يعني لو انك بتختار وش بتختار منها ؟؟ )

http://www.mzayan.com/vb/images/uploads/142_381246f776b0dd5a2.gif

http://www.mzayan.com/vb/images/uploads/142_381246f776b100a52.gif

[هادي الهاجري]

جعلها اتبارك وربي يزين زمانها


والزين كل وحده تقول الزين عندي

[راشدالمري]

ارحب يامبارك
والله يبارك لك فيها
باختصار بختار الثانيه

[هلال الشيباني]

الله يبارك لك في البكرتين

اختار الاولي

[فهد لسود العجمي]

الله يبارك لك فيها وكلها زينه لاكن الاولى طيبه ولا فيها حكي وسلامتك وارضاك

[محمد بن شريه المطيري]

مع انه مالي بالمجاهيم وعرفي فيهم قليل ولاكن بنشارك لجل خاطرك يا مبارك

الاولي فارضه نفسهي وهي الاحسن بوجهت نضري

[فرحان البهدل]

الاولى ازين والله يبارك فيهن كلهن ...

[سعود بن منصور القحطاني]

إما خاب ظني فالبكرة الأولى هي الثانية فالصورتين لبكرة وحده
الله يبارك لك

[محمد الراشد]

مرحبا اخوي مبارك الاولى عندي انها اطول وازين غارب

اما الثانيه لا فهي ازين مفرع ويمكن الجلال ظالمها

والله يبارك لك فيها

[خالد الحجي]

انا مع الثانيه والله يبارك فيهن

[جاسم الجربوعي]

ارحب يامبارك

والله يبارك لك فيها

من غير امجامله كلها طيبه

لكن انا اشوف الثانيه اطيب

موفق

[مبارك المري]

هادي الهاجري

راشد المري

هلال الشيباني

فهد العجمي

محمد المطيري

فرحان البهدل

سعود القحطاني

محمد الراشد

خالد الحجي

جاسم الجربوعي

بيض الله وجيهكم واشكركم على التفاعل السريع

ولكن............:mad:

دخلت في دوامة مع الربع في البر وتكررت على النت

وتعالوا نحسبها ونشوف

الردود عشرة , اربعة رشحوا الاولى , واربعة رشحوا الثانية , واثنين محايدين

يعني ((((( تيتي تيتي مثل مارحتي جيتي ))))) :(:o

هههههههههههههه

اشكركم مرة اخرى وتحياتي للجميع

[حمد الغواص]

ابوهادي صباح الخير الان اللي با بت فيها البكار شكلها متقارب جدا جدا

وانا باختار الصوره الافضل وليست البكره الافضل لان الصور غير والواقع غير











افضل صاحبه الصوره الثاني مع انها منقاربه في الشكل

[راشد العرق]

الاخ مبارك
الله يبارك لك في الثنتين وامهاتها

انا في العمل ويوم قريت موضوعك سويت استفتاء لزملائي في العمل وفيهم بدو اهل ابل وفيهم شباب يتابعون الموقع باستمرار بدون مشاركه
واتفقوا ان الاوله اطول حسب الصوره وبعضهم قال يمكن فيها ناجمه في صدغها وصورتها ماهي واضحه
والثانيه ازين راس واذن والجلال مابين جرمها

وانا اقول الصوره الثانيه ازين

[عبدالله بن مخلد العتيبي]

مرحبا يامبارك

انا توقع ان الصورتين لبكرة وحده

لكن نبي نختار مابين الصور

انا اختار الصورة الاولى

تقبل تحياتي

[محمد المطيري]

الأولى يامبارك

والله يبارك لك فيهن كلهن

[مبارك المري]

زين سويت ياحمد ولكن تدري لازلنا في منطقة الخطر يعني صوت واحد ونرجع مثل ماكنا

راشد جعلك تسلم انت والربع اللي معك في الدوام والبكرة مافيها الا العافية ورايك رجح الثانية بفارق صوتين ... يعني على وشك الحصول على نتيجة :)

عبدالله العتيبي والله ان الصورتين لبكرتين مختلفتين ...........اخترت الاولى يعني رجعنا لمنطقة الخطر

محمد المطيري اعتز برأيك لكن تصدق رجعتنا للدوامة http://www.mzayan.com/vb/images/uploads/142_2390446fa1839cb190.gif

لكن يالربع طلعت بنتيجة مهمة وهي ان الربع مالهم لايم يوم تناشبوا في البر يعني ان الثنتين زينها متقارب

[محمد علي الهدفه]

ابوهادي الان احسب النقاط وبت فيها

فيه فرق بين الواقف والمتحرك الصوره الثانيه متحركه و الصوره لاولى واقفه

وانا باختار الصوره الافضل وليست البكره الافضل لان الصور غير والواقع غير

افضل صاحبه الصوره الثانيه

((واعتقد ان ثنتين غيرمتقاربه وبياتي بينها ارقام))

راي شخصي

http://www.mzayan.com/vb/images/uploads/1015_2390046fa2ebf0c500.jpg

[مبارك المري]

ارررحب يابو علي

وتشرفت بمرورك ورايك محل اهمية

تقبل تحياتي

[بندر مطر البقمى]

الفيلسوف مبارك
مرحبا بك
بالنسبه للبكرتين زينهن عادي
بس اذا قصدك بالموجد بزينه وشينه
يجب عليك أخذ صور جديده بوضع متشابه من جميع النواحي100 في 100 حتى تحصل على النتيجه المرجوه
اخوك بندر البقمي .................ابو مطر

[راشد الراشدي]

انا مع البكره الثانيه ويمكن الجلال مغطي بعض زينها

لكن انا اشوف ان راسها ازين من راس الاوله

[فهد بن صلبوخ]

اخوي مبارك

الله يبارك فيهن وانا بختار اللي في توقيعك <== على شان مايتوهق :)

وعندي اكتشاف في موضوعك هذا واتوقع ان الاعضاء اللي قبلي ما اكتشفوها من غير قصور فيكم كلكم

الا وهي :











اللي اختارو البكره الاولى اهل مغاتير

واللي اختارو الثانيه اهل مجاهيم



صح ولا لا :)

اخوك

[خالد العرجاني]

الاخ مبارك السلام عليكم ورحمة اللة وبركاتة لو اختار اخترت الثنتين ماشاء اللة عليها البكار الثنتين كلها تحير واللة يبارك لك فيها وسلامتك

[مبارك المري]

بندر البقمي

مشاركتك بحد ذاتها مكسب حتى ولوانك ماعطيتنا رايك

راشد الراشدي

وجهة نظر اقدرها وسعدت بمرورك

فواز الشبعان

بيض الله وجهك على المشاركة وابداء الراي

فهد بن صلبوخ

مايصير شكلك هربت من الموضوع لازم تقول رايك

ماشاء الله عليك ملاحظة في محلها ...... على كذا يمكن اصبغها بيضاء:D

خالد العرجاني

جعلك تسلم على المشاركة وسعيد بمرورك

[سعود الكبرا]

اخوي مبارك

الثنتين مبروكات وهن وسط في الزين

والثانيه ازين راس وغاربها زين

والاولى ازين رقبه وانظر من الثانيه.

وفي نظري ارشح الثانيه

[عبدالمحسن المقاطي]

الله يبارك لك في حلالك

وانا اشوف انهم كلهم زيان

بس الثانيه عندي افضل من الاولى

[محسن حمد المري]

أخوي مبارك الله يبارك لك فيها و ما دامك طلبت الراي

ام لجـلآل أزيـن و أجـثـل زيـنـها زيـن قـعـود

وأعـتـقـد ان أم جلآل أكـبـر بأشـهـر

[نور الرشيدي]

مشاء الله انا اقول الاولى اطيب وانظر من الثانيه

[طالب راشد المري]

يامبارك ام اجلال راسها يسوى الاخرى كلها على حسب الصور المعروضه والجميع يدري ان اول مايبرق فيه الراس ولو تساوت يدقق على باقها من رقبه وغلرب وطول وجبر وعرض وتفهاق الظهر وكبر الخف وسع المنحر والفجحه والقصمه وزين الفرسن ومتانت الضلع واللون وتعكراش الوبره وزين الوسره وجل العكره والخ ..................وانا رويت الصور شيبان عندي ورشحو ام الجلال على اختها ومدحوا درثوم خشمها وانقدوا على وسرتها

[مبارك المري]

سعود الكبرا

عبدالمحسن المقاطي

محس حمد المري

طالب راشد المري

اشكركم جزيل الشكر على المرور وابداء الراي

واشكر جميع الاخوان على التفاعل الكبير مع موضوعي والذي لم اتوقعه

تحياتي

[فهاد الشاهين]

الثانيه أطيب بعيد من الولى

[سند مبارك المزروعي]

الاولى اطيب

[بندر الجنيني]

مافيه فرق بينهن والظاهر ان الصورة وحدة اما من ناحيت الزين فاكلهن مزاين والله يبارك لك فيهن وتقبل تحياتي

[مبارك الرمالي]

الاولى

يقع نظرك عليها من اول نظرة

الثانية

اطيب اذا دققت فيها . بس عذروبها رقبتها


ارشح الثانية

[ماجد الدوسري]

الثانية اطيب....... والله يبارك فيهن

[فيصل الشلاحي]

مرحبا يامبارك المري...

أنا أقوول الصورة الثانيه اجمــل من الاولى لو كان متقاربات..
والله يبارك لك فيهن جميعا

[محمد الفاضل]

باختصار الاوله ازين جرم
والثانيه ازين راس

[مسفر اليامي]

الاولى ازين الله يبارك فيها

[محمد العامري]

اخوي مبارك ارشح ام جلال الله يبارك فيهن وفي امهاتهن

[سعيد حمد الدوسري]

الله يبارك لك فيهن عندي الاولى ازين

[خالد السقياني]

الثانية ازين
الله يبارك لك

[مشاري صقر السبيعي]

الله يبارك لك في البكرتين

اختار الاولي

[مشعل الشويش]

الثانيــــــــــه ... وكلُّ لــه نظــر ,,,,


واللـه يبـارك لــك فيهــا وفي أمّهاتهـا البكـار أبوهـن وآحـد ومستواهــن حتول بعضهـن ...

الأولــي أجبر مـن الثانيــه وأكبر راس لكــن الثانيــه فوجهـة نظري أنّهــا أعلى مستـوى بقليـل ...


تقديري

[فيصل عبدالله العتيبي]

ماشاء الله

[عايد الهاجري]

جعلهن يتباركن وربي يزين زمانهن

شبهن تقريبآ واحد

[ناصر العطاوي]

الثانية اطيب راس (ارشح ال2)

[محيميد الرشيدي]

والله ماني براعي مجاهيم لاكن اخذ الثانيه

[بدن بن فهد السبيعي]

ماشاء الله تبارك الله

الله يبارك لك فيهن اخوي مبارك

ولو انا اهل مغاتير لكن بنشارك معكم

انا ارشــــــح الثـانــيــه ام جــــــلال

[مرضي العتيبي]

ما شاء اله تبارك الله

البكار كلهن مبروكات

حتى زينهن قريب من بعض

وانا ارشح الاولى لانها انظر واطول رقبه

والثانيه ازين راس لكن ارشح الاولى

وجهة راي شخصيه

الله يبارك لك في حلالك

[راشد بن جعفر الهاجري]

ماشاء الله والله يبارك فيهن
ولاكن الاولى ازين

[هضبان الفسل المري]

اخووي امبارك انا اقول الثانية ازين والله يبارك لك فيهم