تتوقعون وش سبب موت الناقة

[عبدالرحمن الوهبي التميمي]

عندي خلفة ام رابع

يوم الثلاثاء كانت طيبة وسارحة مع البل وشفتها غصت بالمكعب

وبعد المكعب رشيت البل بالجاره

امس الاربعاء خاطرها ماهو زين وعيونها تعبانه

غسلت عيونها بماء وسكر

ولاحظت ريحة دود من فمها اكرم الله من يقرا

قلت اكيد انها بشمانه وغريتها بعلبة ببسي حجم كبير

اليوم الظهر رحت ابطردها كان ابطنها شيء يطلع لقيت ما بها حيل

رجعت العصر لقيتها ميته الله يعوض علينا وعلى كل مسلم

ظنكم وش سبب موتها

هل الجاره السبب وسبق قالي بيطري ان واحد ماتت عنده ناقتين بعد الرش

والا السبب من بطنها خصوصا ريحة نفسها مخيسة مرة

ويش كان المفروض اني اسوي

[مبارك بن عبدالعزيز]

يمكن الجارة لحقت عليها

[مبارك بن عبدالعزيز]

والله يعوض عليك وفادية راسك ان شاء الله

[محمد سعود العتيبي]

الله يعوض عليك ونا خوك باطيب منها
السبب ماقدر احدده يمكن يكون من الجاره إذا كنت مكثر منها انت او انك حاط جاره ام 60%
ويمكن تكون مكثرها من المكعب والعلم عند الله

بس عندي نصيحه للي عنده ناقه رشها بجاره وجا اليوم الثاني ولقاها مهيب طيبه
اول شي سبحها بالماء عشان تبرد عليه وعشان ينزل السم الي باقي عليها
وفيه علاج عندي البيطري لمثل هاذي الحالات بس مدري وش مدى فعاليته

والشي الثاني الناقه الي باشمه وتشوف اانها كثرت من الشعير ولا عاد تاكل ولا تشرب
ولا تخرج عليك بالنسكفيه البودره عطها في غرشت ماء وغرها وحده بوحده


اتمنا اني ماطولت عليك
وسلامتك

[محمد أبو الجدايل]

الجارة ماتظررر ادا كانت قبل الساعة 10 صباح

وتكون الشمس مهي حارة انا دايما ارش البل بالجارة والحمدلله كلها زي العسل

ثانيا الناقة الباشمة اعطيها موية وملحح هذا الا اسويه دايما والحمدلله تقوم ومايكون عليها شي

والله يعوض عليك يارب بحسن منها وفادية راسك ان شاء الله

[حمود عواض]

الجاره ليست السبب بالمكعب

[حاتم العماري]

السبب الغصه والله اعلم
ماتت عندي خلفه بعد ماغصت بالشعير واهملتها
الله يخلف عليك بخير منها

[مبارك العازمي]

الناقه بشمانه وهذا سبب ريحة نفسها الكريهه واعتقد انك مابعدتها عن الماي لان الناقه المبشومه اذا اشربت ماي سلم عليها والله يعوضك باخير منها وتفدا اهلها

[عبدالرحمن الوهبي التميمي]

اشكركم اخواني جميعا على المرور والمشاركة

ومنكم نستفيد

بالنسبة للسم فاعتقد اني كثرت على الناقة

لاني كنت زايد على الماطور والناقة في راسها جرب وشكلي كثرت عليها السم بالراس

ويمكن دخل كمية من السم في فم لناقة


لكن قبل موت الناقة لفت انتباهي ان الناقة في فمها ماء

والله يعوض علينا وعلى كل مسلم

[محمد ساعد]

اتوقع البلا موجود قبل الغصه والريحه دليل ان فيه شي قبل وسبب الموت الحراره
من تشوف وجها شعره واقف اعطها بنسلين مع خافض حراره