بكره أول اولاد لها وهذا حالها

[حاتم بن حثلين]

السلام عليكم ورحمة الله وبركاته
العلم سلامتكم عندي بكرة مضربها العام 1433/04/08 ومن يوم الأحد وهي بادية تنزع من البل المهم أدخلناها في الشبك بعد الظهر في نفس اليوم وياما تقلبت على جنبها الأيمن ومره على جنبها اليسار وياما قامت وفحجت - وديسها دار - واليوم الثاني خلينها في الشبك ونفس الوضع(مع هذا كله أكلها شين وقليل وحالها حال التعبان)- ويوم جاء العصر طلعتها مع البل قلت المشي أفضل لها - وكأن حالها زان - وأمس اطلعت مع البل وبهدلة الراعي ياما طلعت من البل ثم ردها ياما أبركت لاكن الغريب أمس أن ديوسها ناشه مافيه شيء وحاله شين ونفس الوضع السابق من التقلب على جنبيها (بس أشوف ورم في أعلاء فخذها اليسار خفيف يقول الراعي من كثر تقلبها على جنبها)
وسلامتكم أبي استشارتكم – هل الوضع طبيعي للبكر قبل الأولاد ام فيها مغص ام ماذا

[سالم محمد الدوسري]

الوضع عادي والناقه اتمخض عادي ونشفة الحليب ماهيب مشكله وهي جات عندي في بكر ﻻكن يوم واحد ماابطت من اصبحنا وﻻولدت الى ثمان

[حاتم بن حثلين]

بيض الله وجهك طمنتني -
بس قبل ساعة مريت بيطري ويقول لي يمكن الحوار ميت شفلك واحد يدخل علي الناقة ويشوف الرحم فاتح واذا كان الحوار قريب اسحبه - بس احس ان ماعنده سالفه لأنه اذا كان الحوار ميت لابد ان يخرج من حيا الناقة وسخ او يكون لناقه ريحه - ؟
بس المقلقني حال الناقة واضح عليها التعب والألم .

[نواف بن عبدالعزيز]

يابن حثلين انتم اهل البل وتعرفونها اكثر من غيركم والبكر تمخض الى اسبوع او اكثر لان ولادتها صعبه شوي وسع خاطرك وراقبها وان شاء الله تجب بكره تشارك بها فردي وسلمتك