القعود ما يعشر وش الحل

[ماجد عبدالله]

السلام عليكم ورحمة الله وبركاته
يا جماعة عندي قعود سنه ثني يظرب لا كنه ما يعشر وش الحل

[وليد سعود]

صباح الخير الأخ ماجد

هل قعودك ألقح وهو جذع ؟

أصبر عليه البعارين تضرب ذالأيام ولا ألقحت أنا هاده في البل من شهر يضرب شبه يومي ولا ألقح علماً بأن سنه رباع وإنتاجه موجود
وفقنا الله وإياك لما يحب ويرضى

[عبدالمحسن المقاطي]

كم لك من هديته

هل القح العام الماضي ولا لا

القعود يسرح ولا مربوط

[ماجد عبدالله]

لم يلقح ابد
القعود يسرح

[عبدالمحسن المقاطي]

كم لك من هديته هالسنه

[محمد المقباس]

مرحبا بالجميع
انا امس في مجلس رجاجيل شرواكم
يسولفون عن واحد عنده بعير فاخر اوضح توه يلقح والعالم تبارك له
سنه ناب وتوه يلقح
الصبر زين وانا اخوك وبعض القعدان ماتلقح ابد وبعضها تتاخر
الاسباب مايعلمها الا الله

[حاتم العماري]

اصبر وبيلقح ان شاء الله

[طلال الروقي]

خله على مذهبه وانا اخووووووووووك
بيلقح ان الله اشاء
لا تعجل عليه
والله يبارك لك فيه

[مسعود العماري]

عط البعير فيتامينات ( هـ سيلينيوم ) وتمر وبرسيم
واحمه عشر أيام وهده
وإن شاء يلقح

[ناصر عيسى المنصوري]

عط البعير فيتامينات ( هـ سينليوم ) وتمر وبرسيم
واحمه عشر أيام وهده
وإن شاء يلقح

+
ابرة فيتامين AD3 مهمه جدا للخصوبه

وباذن الله يلقح

[عادل الضويحي]

اصبر عليه لاتستعجل يمكن الابل ماجسرن او ان البعير مايملى الحوافظ زين اصبر وانشاء الله بيعشر

[شافي العبنق]

لا تستعجل عليه الوضع عادى

[عبدالمحسن المقاطي]

شف وانا اخوك اغسل البعير زين في ضحويه يكون الجو دافي

واحمه مدة اسبوعين

وبعدين فكه يسرح مع البل اقل شي خمس ايام وبعدها هده في البل

وبأذن الله بيلقح

[خالد العرجاني]

السلام عليكم ورحمه الله وبركاته
اخي خذ نصيحه من مجرب اذا الفحل يستاهل وده لمستشفى الملك فيصل بالحساء ويفحصونه لك
اذا ما فيه شي خله مع ابلك واذا قالو فيه مشكله عرضة السوق وعلم الي بيشريه وسلامتك
انا صار عندي فحل مثل الحاله ولا نفع وبعت قصب والله لا يخسر مسلم

[محمد ساعد]

اهل الحلال يقولون الثني وني لآ تستعجل

[بخيت البريدي]

انا مع اخوي خالد العرجاني في كل كلمه قالها كلام في غاية الاهميه والممنطق مع الشكر له

[ثامر فايز]

مرحبا يابو عبدالله لاتعجل عليه انشالله انه بيلقح بس بعطيك معلومه ترى الفحل ليامنه غدا سنه ثني قليل تلقح عليه الابل
ومعروف ان الثني وني والجذع لذع والرباع يلقح مابين السماء والقاع ون كانه مالقح ذا الزمان بيلقح الهداد الجاي

[محمدالعلوي]

الاخ ماجد القعود عليه سوم أحد مدحه أحد تكلم عنه بشي وهل هو من ساس معروف أم لا؟ في كل الحالات الوارده في
سؤالي أو شي منها جود لك طاسه وأملها ماء وحط فيه ملح خشن وأقرفيها الرقيه الشرعيه ثم رش القعود على غفله لايدري عنك وأن ساءالله يلقح مع العلم أني أظم صوتي للاخ خالد العرجاني من وقع تجربه مريت بها قريب.والله يشفيه.