الرأي ياأهل الرأي

[نواف البرقاوي العتيبي]

السلام عليكم ورحمة الله


يالربع العلم سلامتكم وقت الضراب قرب وعندي ناقتين منتجات وراجي من الله خير وحده حدرها قعود زين عمره ستة اشهر والثانية معها بكرة عمرها خمسة اشهر وعرض علي رفيقاً لي شروى هالوجية اني اضرب من بعيره والبعير منتج يقول جبهن وازهل وودي ارسلها قبل السروات والزحمة ولاني مرسلها بعيالها وش رأيكم اقطع الحشو من الرضاع والا اصبر لين يرتفعن وعقبه الله يفرجها ؟؟؟





الرأي يأهل العرف والخبرة*******

[سالم حسن البلوشي]

عندك وقت حول 40يوم على وقت اليسره ورأي تحمل الأبل شهر 10 ميلادي من دون الحيران

[سعد حمود العوني]

شلها بعيالها واذا الله كاتب نصيب يجي انشالله
وكثير من الابل تعشر وولدها معها وبعضها يكسب
ويرضعها الحوار من 6 الى 8 شهور بعد اللقاح
بس أهم شي تكرمها بالعلف

[يزيد العتيبي]

يامرحبا اخوي نواف

اذا كان احوال البل طيبه ماعليهن من الرضاعه

والله يرزقك منهن الانتاج الطيب

تقبل مروري

[احمد الحربي]

الافضل انك تعزل عيالها

وتضربها من البعير وهي ميسر

وتلقح انشالله

[ساجربن عدوان]

أهم شي لا توديهن وحيرانها معها

[نواف البرقاوي العتيبي]

الله يبيض وجيهكم


كل واحد عطانا رايه وهذي الهقوة فيكم


بس انا قصدي منحرج ولاودي اكلف على الرجال وفي نفس الوقت ماودي ان الحشو تنكسر والا قد كسبنا الابل وعيالها حدرها ولاضرها من فضل الله



الله يعطيكم العافية ويبيض وجيهكم

[مشعل الشويش]

البكره أم 5 اشهر
أما تصبر عليها شهرين مع أمها أو تسحبها على ضيار ان كانت تستاهل ,
والقعود أبو ست شهور اكرمه كان عمره زين ويقدر ينقل الحال ولايضره ان شاء الله ألا فالشهر الاول ,
أما كانه غالي وطيب اصبر عليـــه مع أمه شهر كامل , أو اسحبه على ضيار ,

والحوار الغالي المفروض مايسحب عن أمـه مدّة 12 أو 13 شهر , أو يسحب على ضيار لين يتم عمره ويقسى عظمه ,

وان صبرت شهر 10 وشهر 11 , ولاعيّدت حملتهن بدون حيرانهن تراه اطيب راي ويفكك من الجهاد والعنا ,
والفرق مامن فرق يمكن البل ماتلاقح ألا بعد شهر أو شهرين وليا الدعوى هي هي

[احمد الشهراني]

مادام البعير عليه سرى وكلفه ود النياق لحالها

[نواف البرقاوي العتيبي]

الاخوان مشعل واحمد بيض الله وجيهكم



ماقصرتوا واستفدت من أرائكم جميعاً



عسى الله يقدم اللي فيه خير