يالربع عطونا الحل والدبرة

[نواف البرقاوي العتيبي]

السلام عليكم ورحمة الله


يالربع عندي طوّل الله اعماركم على الطاعة ناقة جاها هيام وضعفت وشانت حتى وبرتها وعطيتها من هالابر لين قالت امين تأخذ وتخف ثم تعود على حالها وهالحين وش الدبرة يالربع ودي انها تسمن وش الطب فيها والطريقة وهي خلفة






لاتخلونا يالربع من اشواركم*******

[ياسر الشيباني]

الحل عطها ثوم على شكل دفعات وذلك كالتالي اول دفعة ثلاثين فصا تخلط في الخلاط ويضاف لها ملء قارورة البيبسي الكبيرة ماء وتو ضع في الثلاجة حتى تبرد جدا ثم تغر بها الناقة قبل الاكل وبعد اسبوع الدفعة الثانية اربعين فصا وبعد اسبوع الدفعة الثالثة خمسين فصا وهذه الطريقة انا مجربها شخصيا على ناقة فيها هيام وبرئت تماما باءذن الله،،

[محمد سعود العتيبي]

نواف اذا الناقه حوارها يرضعها

ماتسمن لو الشعير ناقع عندها

اذا فطمت الحوار وعشرت الناقه بتسمن ان شاء الله

[يزيد العتيبي]

مثل ماقال اخوي ياسر

تقبل مروري

[خالد الحجي]

بع حاشيها وبتشوف مايسرك واذا عشرت بتزين

[مشبب بن حماد القحطاني]

مثل ماقالوا الإخوان إفرد حوارها وبتزين

[خالد الفالح]

يقول فيها هيام وتقولون افرد حاشيها
الهيام علاجه شعبي وبيطري
الشعبي دلوك فوق
والبيطري ابره خليجيه ابرة هيام قيمتها حول 150 وعلى فكره بتطيب ولاكن يرجع الهيام لها بعد سنه
لذلك جرب الشعبي يمكن انه انفع
والله تعالى اعلم

[بندر الرويلي]

مدامك جربت العلاج الطبي ولا نفع جرب معها العلاج الشعبي اللي اذكره الأخ ياسر

[فهد العضياني]

عالجها عن الهيام وخلها مشمله على طول واترك لولدها رضعتين فقط وحده في الصباح ووحده في المساء واكرمها بالعلف وبتشوف حالها يتغير ان شاء الله

[نواف البرقاوي العتيبي]

الله يمسيكم بالخير ويبيض وجيهكم جميعاً


الناقة يالربع حتى اذا هجت مع الابل واخذت شوي تطيح وتاخذ شوي ماتقوم


وبالنسبة للحوار عمره الحين حول ستة اشهر ويرضعها من المغرب الى الفجر ثم تشمّل


وبالنسبة لعلاج اخوي ياسر ماتشوف ان ثلاثين دفعة وحده كثير خبرك الثوم حار ؟؟؟؟


وشااااااااااكر للجميع

[مبارك السحيمي]

اذا على كلامك يرضع من الفجر لين المغرب وين تبي الناقه تستعدل .. عقب مايرضع الصبح شملها الين المغرب وشهروتردم شحم ان شاء الله

[نواف البرقاوي العتيبي]

مبارك الله يعطيك العافية انا قلت يرضع من المغرب الى الفجر ثم تشمل



والبارح عطيت العامل الامر الصارم ماعاد يرضعه نهائياً هههههههههههه

[ياسر الشيباني]

يااخ نواف كمية الثوم جربته على غيرها من الابل وماضرها بالعكس قتل الدود والطفيليات التي هي سبب كل الامراض تقريبا وفتح شهية الابل للاكل وتعافت تماما

[نواف البرقاوي العتيبي]

بارك الله فيك ياياسر وبيض الله وجهك انت وباقي الاخوان



واذا هو يفتح الشهية فزين لان الناقة ماعاد تحرص على الشعير