الفزعـه يالربـع ( الناقه الغاليه )

[مشعل الشويش]

أخواني الاعزاء :

عندي ناقه قيمتها ميات .. ولقحه على بعيرً طيّب لها حوالي 5 شهور ,
والناقه لها اسبوع تقريباً ماتاكل .. ونظرها شاين .. وحالها ينقص . والمرض بادً على وجهها وممشاها ونظرهاا ,
الشعير ماتذوقه . والبرسيم بعد يوم او يومين تاخذ منه قرور نفس فقط ,
وانا خايف انه هيااااااااااااام ,
وحسب معرفتي أن إبرة الهيام تفيّخ بالناقه على طول ,
ياليت تشاركون بالموضوع لعل الله ينفعناا بمشاركاتكم ,

[طلال الروقي]

أرحب يابو ذعاااااااااار
الله لا يوريك مكروه في حلالك ومالك وعيالك ..

تأكد من الهدب وانا اخوووووووك داخل فم الناقة تراه مايخلي الناقة تذوق شي
أو أن ناشب في حلقها شوك والا عود معترض في حلقها و ديرتكم شيرانها وشوكها واجد
سبق وان مرت هذه الحالتين على أحد جيراني ..
وللمعلومية يابو ذعار
5 شهور لناقة لقحة ما أظن أبرة الهيام تسوي بها شي
سبق ضربت ناقة عندي لها مايقارب 6 شهور لقحة
ولا جاها الا العافية
س / الناقة تشرب ماء ..؟ الناقة فيها نفوخ في أمكان من بدنها ..؟

[عبدالرحمن بن هادي]

الابره الفرنسيه امنه بأذن الله .....أو الهنديه ترايكوين 2 ملغم
وجعلها للسلامه هي وصاحبها وكل المسلمين

[فلاح الخالدي]

أرحب يامشعل
الله لا يوريك مكروه في حلالك ومالك وعيالك
ان كانه هيام فالابره الفرنسيه افضل من الابره الهنديه وافضل من يفديك بهذا الموضوع دكتور اساله هل مضره على اللقاح ولا لا

[مشعل الشويش]

ارحب يابو بندر ,,,

س / الناقة تشرب ماء ..؟ الناقة فيها نفوخ في أمكان من بدنها ..؟

نعم الناقه تشرب ماء , ولافيها اي نفوخ ,

ويااخواني أنا سبق وأن طقيت بأبرة الهيام لقحه لها فاللقاح 7 شهور وعلى طول طرحته ,
واحد الاخوان شرى له ناقةً طيبه من السوق وعطاها 10 سم من إبرة الهيام واصعدت على طول ,
والله ماادري !

..
واشكر جميع الاخوان اللي شاركوا ,

والله يبيض وجيهكم ويجزاكم خير ,

[ماجد ال سالم]

السلام عليكم ورحمة الله وبركاته
اخوي مشعل هذه اعراض ممكن تكون البارده وكيده
بس تاكد لي فيه حبوب على ارجول الناقه من فوق خلف الديد
لان البارده هذي اعراضها الي قلت انت ولازم مضاد حيوي طويل المفعول او بنسلين وسلامتكم جميع

[سلطان الروق]

السلام عليكم مساكم و صبحكم الله بالخير الله اعلم ان هذا السلاق و تقدر تأكد من فتح افم الناقه ان حصلت وريم في جماها و لا لثتها و الهدب متغير لونه علاجها ان شاء الله بسيط شف ناقتك ان عينت اللي ذكرته في افمها و لا لا الصخونه ذي جات ناقة عندي و سلمت بعد العلاج و الحمد لله

[بدر العضيلة]

يا ابو ذعار اذا انت تتوقع ان الناقة فيها هيام
لا تعطيها ابر انتبة ترى ابرت الهيام مشكلتها مشكله مع القحة خص
عط ناقتك زيت السمسم مقدار موية صحة ابو ريال كل 7 ايام
اذا هو اهيام

[احمد الشنيني]

الاخ/ مشعل
تأكد ان الناقه مابها ديدان
والشي الثاني عليك بالحلبه تراها مفيده بالحيل

والله يبارك لك في حلالك

[طلال الروقي]

علوووووووووووم المبروكة يابو ذعار

[عبدالعزيز الهمزاني]

ابرة الهيام ما تفيخ بالناقه طقه ابرت جرب فرنسية ٢٥ سيسي او ٢٠ سيسي وعطه ابرة شامل الامراض

[محمد مسلى الرشيدى]

الاخ مشعل يمكن الناقة فيها حرارة ومشكلتها بصيطة بنسلين المانى ما يصعد وابرة الهيام الفرنسية امنة

[مشعل الشويش]

مرحبا بالجميع . وجزاكم الله خير ,
الناقه على حالها يابو بندر ,
يوم تاكل و3 ايام ماتذوقه ,,

[ممدوح احمد الشريف]

حياك الله يا اخ مشعل ... اسأل الله انه لا يوريك في حلالك مكروه ويبارك لك ويكفيك كل شر

وانت يا مشعل ابخص منا ولكن من معزتك حبيت ابدي شوري لك وهو انك تحلل دم الناقه وتتأكد قبل تسوي اي شي

وعقب التحليل يجي القرار الصح

[محمد الوهبي التميمي]

ارحب يابوذعار
وجعل حلالك في خير وزود نعمه
مانبي نخلي الهيام شماعه لكل مرض خصوصاً ان امراض الابل متشابها
الهيام + الشوكه + الغصه + الهدب الخ ..
اعراض متشابها ولايميزها الا اللي عند النافه ويراقبها وكل هالاعراض تتفق بفقدان الشهيه والصده عن المعلف
الهيام مايجي بيوم وليله وله مقدمات
الشوكه علاماته فالدمن والمبرك والتجضع
الغصه علاماته اما تطرش او بلعها تشوفه يمشي ببطئ
الهدب يبان من تفتيش فم الناقه
والتحليل المخبري هو الفيصل في جميع الامراض
اذا عندكم مختبرات يامشعل ولا ارسل لي عينات الدم لرياض وهو يجلس 72 ساعه في بروده عاليه
ونشوف المختبر وش يقول

اضاءه
ابرة الهيام لاتصعد بتجربه شخصيه

تقبل مشاركتي

[مشعل الشويش]

الأخ العزيز / ممدوح الشريـف
الله يجزاك خير ويقبل منا ومنك , ولايريك مكروه بحال و مال ,
وصدقت التحليل مهم , ولكن ماعندنا ألا مختبر واحد في ميدان الهجن والزحمه عليه بشكل غير طبيعي , وباذن الله بآخذ لها تحليل ,
..
الأخ العزيز : ابو صالح
بيض الله وجهك . وجزاك الله خير , ورحم الله وآلديك ,
صدقت لكن من خوفنا من الهيـآم وسوس بناا ,
والله العالم أنه هيام , لن الناقه تتبع الشمس من امس , !
وانا مراقبها , ولافيها مغص ولاغصه ولا شي ,
قل شهيّـه + حراره والله اعلم + ضمور + شين نظر , حتى ممشاها مختلف
.. وابرة الهيام موسوستن بي , لنها قد اصعدت معي بناقه لقحه ,
..
شكراً للجميـع ,
وجزاكم الله خير
افادني مروركم جميعاً واشكركم من القلب

[مفلح العمور]

السلام عليكم
قس حرارتها اذا ما عندك جهاز حراره اشتر من الصيدليه والأفضل الالكتروني
يمكن حراره ما تخلي المطيه تأكل
ومن صوب أبره الهيام أنا مجربها في لقحه عندي ولا ضرتها ولدت عندي من تجربه والأفضل الفرنسيه
وجهاز الحراره ضروري عند راعي الحلال سعره رخيص حوال ٣٠ ريال
وان شاء الله ما تشوف شر الله يوفقك

[عابد الحربي]

حياك الله خوي مشعل

اسال الله العظيم رب العرش الكريم ان يعافيك وحلالك وجميع المسلمين اميـــــــن

فعلا الحالة غريبه لكن الخوف وانا اخوك على اللي فبطن الناقه يمكن ميت فبطنها احتمال ! بس لازم تسوي تحليل دم بالمختبر

تحياتي

[بندر الرويلي]

هلا يا بو ذعار ابره الهيام الفرنسية ما منها ضرر ان شاء الله على اللقحه من 5 اشهر وطالع اما ابره الهيام الهندية تضر لانها حاره

[فرج البقمي]

اخوي مشعل اسال الله ان يشفيها ويبارك فيها ويرزقك البكره المزيونه منها دور اي واحد يبيع ماء زمزم واقرء فيه المعوذات
وآية الكرسي ودعاء الشفاء مع النفث وباْذن الواحد الاحد ماتشوف شر

[حاتم العماري]

الله يشفي ناقتك والتحليل ..التحليل يابو ذعار
اسحب منها 10 سم دم وروح لمختبر الهجن ويومين بيطلع
تقبل تحياتي

[مساعد بن سعود المطيري]

الناقة عليها حرارة فقط لاغير

[محمد بن عمير]

مسيك بالخير يامشعل

عندي ناقه مثل ناقتك بالضبط الفرق ان اللي عندي عشرا
نصيحه لا تحلل أنا حللت اللي عندي وقال المختبر دود وكريات دم بيضا منخفضه وأنزيمات كبد
وعطاني علاجات بودره مع ما وثلاث انواع ابر ولا فأدت بشئ
والا هال لحين مدري وش علتها فتحت فمها مافيها هدب الجمعة انشالله بكويها وبعطيك الاخبار
نصيحه لاتكثر على ناقتك العلاجات والله مابقى ابره ماعطيتها واني رحمتها اخر الطب الكي
وان لقيت علاج لناقتك علمني وانا ان لقيت انشالله علمتك
عسى الله يشفي حلالك والمسلمين
للمعلوميه ناقتي لها ثلاث اسابيع

[سالم المسعودي]

الله يشفي حلالكم وحلال المسلمين ويبارك لكم ..

[حاصل اليامي]

ابو ذعار مساك الله بالخير انت ومن يقرا

اولا الناقه ذلحين محتاجه للتغذيه لانها صار لها كم يوم ما ذاقت شي دور لمحلول فتح الشهيه كيس يبيعونه الصيدليات ب 10 ريال وهو اساسا للتخمه لكن فيه فيتامينات ويفتح الشهيه وبعدين عط الناقه لبن اذا عندك عشاير.

اما العلاج فالناقه الله العالم ان اللي فيها هيام وما دام وصلت الى ذا الحال فلا عاده بنافعها بعد نفع الله الا الابره الفرنسيه وهي باذن الله امنه من رايي انك توكل على الله وتعالجها ان طابت وضمت لقاحها فابرك واسعد وان طرحته فهي اغلا منه اهم شي الناقه لانك لو ما عالجتها خايف من صعادها يمكن يلحق عليها المرض ..
واخيرا الله يشافيها ويبارك لك فيها وجعلها تجيب لك البكره اللي انت هاقي بها

[مشعل الشويش]

السلام عليكم
قس حرارتها اذا ما عندك جهاز حراره اشتر من الصيدليه والأفضل الالكتروني
يمكن حراره ما تخلي المطيه تأكل
ومن صوب أبره الهيام أنا مجربها في لقحه عندي ولا ضرتها ولدت عندي من تجربه والأفضل الفرنسيه
وجهاز الحراره ضروري عند راعي الحلال سعره رخيص حوال ٣٠ ريال
وان شاء الله ما تشوف شر الله يوفقك


عليكم السلام ورحمة الله
لا والله ماعندي ولااعرف له ,
مايجيك الشر يامفلح والله يجزاك خير


حياك الله خوي مشعل

اسال الله العظيم رب العرش الكريم ان يعافيك وحلالك وجميع المسلمين اميـــــــن

فعلا الحالة غريبه لكن الخوف وانا اخوك على اللي فبطن الناقه يمكن ميت فبطنها احتمال ! بس لازم تسوي تحليل دم بالمختبر

تحياتي

البقاء بك يالحربي ,
الله يقبل منك ويجزاك خير ويرحم وآلديك ,
والناقه ابشرك تحسنت ولاعليها خلاف لها حول ال3 ايام بخير




هلا يا بو ذعار ابره الهيام الفرنسية ما منها ضرر ان شاء الله على اللقحه من 5 اشهر وطالع اما ابره الهيام الهندية تضر لانها حاره



ارحب يابندر ,
صدقت , لكن اللي اصعدت بناقتي قبل فتره اظنها الفرنسيه الغاليه ألاّ أني غلطان ,





اخوي مشعل اسال الله ان يشفيها ويبارك فيها ويرزقك البكره المزيونه منها دور اي واحد يبيع ماء زمزم واقرء فيه المعوذات



وآية الكرسي ودعاء الشفاء مع النفث وباْذن الواحد الاحد ماتشوف شر


الله يجزاك خير يافرج ,
وصدقت وبيض الله وجهك ,


الله يشفي ناقتك والتحليل ..التحليل يابو ذعار
اسحب منها 10 سم دم وروح لمختبر الهجن ويومين بيطلع
تقبل تحياتي

مرحبا بك عدد وبل المطر ,
وابشرك كفانا الله من التحليل باذن الله

الناقة عليها حرارة فقط لاغير

لاهنت يامساعد ,
جزالك الله خير


مسيك بالخير يامشعل

عندي ناقه مثل ناقتك بالضبط الفرق ان اللي عندي عشرا
نصيحه لا تحلل أنا حللت اللي عندي وقال المختبر دود وكريات دم بيضا منخفضه وأنزيمات كبد
وعطاني علاجات بودره مع ما وثلاث انواع ابر ولا فأدت بشئ
والا هال لحين مدري وش علتها فتحت فمها مافيها هدب الجمعة انشالله بكويها وبعطيك الاخبار
نصيحه لاتكثر على ناقتك العلاجات والله مابقى ابره ماعطيتها واني رحمتها اخر الطب الكي
وان لقيت علاج لناقتك علمني وانا ان لقيت انشالله علمتك
عسى الله يشفي حلالك والمسلمين
للمعلوميه ناقتي لها ثلاث اسابيع

الله يمسيك بالنور يابن عمير ,
ماحللـت , يامحمد وان شاء الله انها طيّبه
الناقه لها 3 ايام تاكل وتشرب وانطلق وجهها , والحمد لله حمد الشاكرين ,
عندي احد الاخوان جزاه الله حير الجزاء كل عصر يمرها يرقيها وينفث عليها ويقرأ عليها مايقارب نصف ساعه ,
والحمد لله الناقه طيّبه وبخير , ولاحظت انها تحسنت بعد هالامر , والشكر لله
وناقتك جاء عندي عشرا مثل حالت ناقتك
حلّلت وقالوا هذا ألتهاب كبدي , ولايفيدك العلاج بشي وأصريت عليه وعطاني العلاج , إبر ومحلول عن طريق الفم ,
ولانفع . وماتت الناقه الله يعوضنا بخير ,
لكن نصيحه وانا اخوك استعجل بالكي , وفيه مواضيع فالمنتدى بتفيدك عن هالحاله , وأماكن الكي ,
وجعلك ماترى باس بحال ومال


الله يشفي حلالكم وحلال المسلمين ويبارك لكم ..

جزالك الله خير , وتقبل الله منك

ابو ذعار مساك الله بالخير انت ومن يقرا

اولا الناقه ذلحين محتاجه للتغذيه لانها صار لها كم يوم ما ذاقت شي دور لمحلول فتح الشهيه كيس يبيعونه الصيدليات ب 10 ريال وهو اساسا للتخمه لكن فيه فيتامينات ويفتح الشهيه وبعدين عط الناقه لبن اذا عندك عشاير.

اما العلاج فالناقه الله العالم ان اللي فيها هيام وما دام وصلت الى ذا الحال فلا عاده بنافعها بعد نفع الله الا الابره الفرنسيه وهي باذن الله امنه من رايي انك توكل على الله وتعالجها ان طابت وضمت لقاحها فابرك واسعد وان طرحته فهي اغلا منه اهم شي الناقه لانك لو ما عالجتها خايف من صعادها يمكن يلحق عليها المرض ..
واخيرا الله يشافيها ويبارك لك فيها وجعلها تجيب لك البكره اللي انت هاقي بها


ارحب يابوعبدالله ,
صدقت , الفيتامين ذا عطيته الناقه أول ماشرهت عليها ولانفعها , والنفع من الله ,
والناقه ابشرك انها بخير وتحسنت وزان نظرها والشكر لله من قبل ومن بعد
الله يجزاك خير , ويرحم وآلديك ولايريك ماتكره بحال ومال ويحفظنا وإياك وجميع المسلمين ,




شاكر ومقدّر للجميـع ,
وانصحكم بالرقيه الشرعيه ,
والله لايريكم مكروه ان شاء الله

[بندر الرويلي]

الحمد لله والله يبشرك بالخير

[عبدالمحسن المقاطي]

يابو ذعار عطها خافض حراره

واسحب عينه من دمها

ولا تتهاون ويمر الوقت عليها ماستفدت شي