الحواره ماترضع

[محمد السلماني]

يالربع عندي ناقه ديسها دحاليل ومتورم والبكره ماتلقم الديس والرضاعه نوب تشرب منها ونوب لا وابتلشت فيها وهي لها سبوع

ويش السوات علمن اني مسويلها ضلال من العسيب وبارد حتى السوداني منزين البراد ينام عندها الظهر ههههه


تكفون اللي عنده حل لا يخليني

ودمتمبصهح وعافيه

[بدر العوام]

أخوي محمد بعد التحية والتقدير أولاً خل الي يتبرد الله يهينه عقب الفجر يغسل ديس الناقة بماء بارد عقب مايرضع حوارها وينضف الديس زين ثم يلقط عصاه ويمشي الناقة نزهه صباحية ثم لا اضحت ودرت يرضع الحوير ثم الساعة 10ص يرده بالظل ويعطيه ماء بارد ويطلعه لامه العصر ويحلب عنها الدرة الاولةوخل الحوير يمصمص الديس عقبه كم يوم وتتزين الامور بأذن الله وديس الناقة عقب الولادة ويمكن ماتنظف من الحليب يورم الديس لكن مشها وبيتغير ان شاء الله وبيفيدونك الاخوان أكثر
موفق خير

[حمد بن عيران القريني]

الاخ محمد
بعد التحية
اذا كان خلوف الناقة كبار مايقدر الحوار يمسكها فعلى ماقال اخوي بدر يحلب له الزول في ديد ويرضعه حتى يكبر الحوار ويمسك الخلوف لان الحوار اذا يوم يشبع ويوم يجوع يجية مرض الدوام ثم يموت واذا ديد الناقة مخبش فركب الحوار في الصندوق وخل الناقة تمشي وراك شوي شوي لمسافة اربعة كيلو لمدة يومين ويخف الخباش ولا تنسى تغسل الديد بالماء

[مبارك السحيمي]

الربع ما قصروا ,, والحوار ارضعه مرضاعه ولا بطاسه لين يزين ديد امه

[مبارك بن محمد]

نصيحتي لك لو ما يمسك المرضاعه .. حط الحليب في ابره عشرين مل .. وتم اعطه شوي شوي .. عن لا يشرق .. وعلى فكره .. ممكن في بداياتها تاخذ وقت بس من يقوى عظم الحوار راح يدق امه غصب من يجوع

[محمد السلماني]

ما قصرتو الله يبيض وجهيكم
الله يخليكم ذخر

[عبدالله جمال العتيبي]

اهم شي ابعد الناقة عن حاجتين الملح والبرسيم وخله كل صبح ياخذ بها لفة 5 كيلو وباذن الله بتشوف الفرق الكبير خلال 3 ايام