البعير اللي ظهره اعر

[ماجد محمد]

السلام عليكم ورحمة الله وبركاته

عندي بعير لي شهرين وان مرهي العلف عليه ولاا بان فيه شي مع العلم ان اللي معه ما شاء الله عليهن شالن شحم وبان العلف فيهن

ويقول لي واحد ان هذا حده من الشحم ما يتعدى وانه يقاااله ((ظهره اعر )) هل هذا صحيح مع ان ظهره متفاهق ولا له عيز عشان نقول متقدم

وش الحل هل هذا مرض والا طبيعي

[أحمد التميمي]

هلابك ياماجد هذي خلقه يجي السنام أعر وذا ارهيته بالعلف يشحم ويطلع بس مايطلع شحمه فوق

يجيك شحمه على عرض السناام

[طلال الروقي]

البعير الاعر والناقة العرى محق ولا يقناهن الا المذنووووووب
وانتاجهن يجن مثلهن ..
مايرقاهن الحاااااااااااال لو تصب عليهن العلف الليل والنهار

[محمد الوهبي التميمي]

ارحب ياماجد والبل اللي مايزين حالها مع العيشة يرجع لأسباب كثيره منها المرضي والوراثي!
سن البعير وشو
ومن متى وهو عندك
وطعامهم اللي مرهيه وشو

[حمد بن عيران القريني]

الاخ ماجد
بعد التحية
كنت اتمنى ان ترفق صوره لتأكد ان البعير اعر اذا علفت شعير فأن السنام يبني على فوق عكس المكعب ولا يطلع مثل الابل ولكن بعض الابل تسمن بسرعة والناقة الضعيفة لاتسمن الا بعد فترة طويلة

[ناصر عيسى المنصوري]

ان شاء الله ان بعيرك مافيه شر لكن في دراسه جديده تقول ان المطية العرى قد تكون مصابه بمرض الهيام الكامن يظهر بعد فتره ويتطور الى هيام فعلي
افحص الدم من الهيام والكبد بالتحديد واعطها ابرة هيام وشف عقبها كيف النتيجه مانت بخسرن الابرة ان مانفعت ماضرت

[طلال الروقي]

ان شاء الله ان بعيرك مافيه شر لكن في دراسه جديده تقول ان المطية العرى قد تكون مصابه بمرض الهيام الكامن يظهر بعد فتره ويتطور الى هيام فعلي



افحص الدم من الهيام والكبد بالتحديد واعطها ابرة هيام وشف عقبها كيف النتيجه مانت بخسرن الابرة ان مانفعت ماضرت


ماخليت أبر ولا حبوووووب ولا زيت ولا خلطة الا عطيتها ناقة عندي عرى .
ولاش فايدة ..

وجابت بكرة لها ثلاث أشهر وطلعت الصغيرة مثل أمها عرررررى ولا يرقاها الحال
مع انها تحت أمها الليل والنهار وترضعها .
نصيحتي لكم الناقة العرى لا تضمونها ..
سلالتها مثلها .
وتشوه المراح اللي فيه ..
الناس يحسبونك ماتعلف وانك بخيل على حلالك

[فهد العضياني]

اذا بعيرك اكله زين وممشاه زين وصحته طيبه ومتنه ووركه مشحمه والسنام ماطلع فهو اعر , ولاتتعب نفسك بتسمينه اكثر

[فوازمحارب]

كلام الاخوان صحيح ميه بالميه

بس انت تقول لي شهرين وهذا ما تقدر تحكم عليه في خلال شهرينويمكن. الي معه. مشاكير لا تستعجل


الا اذا هو ملتحم. زيييين البعير فهو اعر


واذا. ما التحم. زين. اعطه. حبوب دود. وابره جرب. وهيام. فرنسيه واصبر عليه

[ممدوح احمد الشريف]

مره شريت لي عشرا راعيها يشكي منها يقول على كثر العلف ما زان حالها ..

حطيتها في شبك ونقعت العلف قدامها معظم الوقت

ما ظهر سنامها الا عقب شهور مهي شوي والحين ماشاء الله تبارك الله من اكبر البل حجم وازينها حال