شلون اغرز الناقة

[محمد مطير العنزي]

يا اخوان السلام عليكم ورحمة الله وبركاتة
عندي ناقة عشرا وحاشيهااا حدرهااا شلون اغرزهاا بسرعة ابي اضربهااا علي اول الوقت :cool:
شاكر للجميع

[سليمان التميمي]

حياك الله يا محمد

اعزل الحاشي عنها وراح تغرز وحاول انك تنظف ديدها

[محمد مطير العنزي]

اشكرك علي الرد يا التميمي
ولكن اذا اشملها طول اليوم ولا اخلية يرضعها الا مرة وحدة يعني ابهلها علي حاشيها 4 ساعات بس ولا طول اليوم مشملة ممكن تغرز بسرعة

[سليمان التميمي]

الناقه ما تغرز دام فيها شي يدررهاا

دامها تدر ما تغرز

وتقبل تحيتي

[فهد لسود العجمي]

وعليك السلام ياخوي اذا بغيت تغرز الناقه اشملها ولا تفك الشمالتها حتى تغرز ودمت بكل خير وسرور

[خالد عبدالله السبيعي]

وعليكم السلام ورحمة الله

مثل ما ذكر الاخ فهد العجمي

يجب عدم فك الشمالة نهائيا

وقد تستغرق عملية التغريز شهور

وبالنسبة للضراب ما يمنع انك تضربها حتى لو لم تغرزها

ويا هلا بك

[محمد مطير العنزي]

الاخوان النميمي والعجمي والسبيعي لا هنتو لاهنتو لاهنتو
ولكم بياض الوجة

[نور الرشيدي]

السلام عليكم ورحمة الله وبركاته:
شمل الناقه ولاتخلي ولد يرضعها بالمره حتى تغرز او بعه وريح راسك

[حاتم العماري]

مثل ماقال الاخوان وان كنت مستعجل
فاسرع شي
افرد ولدها عنها
ونظف ديدها كل يوم مره
والله يوفقك

[عبدالرحمن عبدالعزيز]

الشماله هي الوسيله الوحيده للتغريز السريع

واذا الناقه بها حليب واجد فعليك بالتغريز التدريجي لكي لا يحدث اي ورم بالديد
والتغريز التدريجي كتالي:
- تبداء بالتشميل طول اليوم وتفكها بالليل لمدة اسبوع
- وبعدها ترضع يوم ورا يوم لمدة اسبوع
- وبعدها تصك الشماله في الاسبوع الثالث