وش الحل مع البعير اللى مايلقح ؟؟؟

[وليد خالد الحربي]

السلام عليكم ورحمه الله وبركاااته
يالربع عندي بعير هاذى السنه الثانيه اهده ولا يلقح والبعير كفوووو وسنه الحين ربااااع
وش علاجه مع العلم انه يضرب تماام ولا فيه اى شي والجامعه يقولوون هاذا عقيم
وفيه نااس يقولون مافيه شي اسمه عقيم فالبل وشكراااا

[محمد الوهبي التميمي]

كم الابل اللي اضربتها من ياوليد؟

[ثامر فايز]

http://www.mzayan.com/vb/mwaextraedit4/extra/09.gif

الاخ وليد بعض الفحول وانا اخوك مايلقح يهيج ويعصب ويلصق بطنه في ضهره ويضرب اضراب زين بس مايلقح سبحان الله حنا كان عندنا بعير
من ةخير الفحول من ابل مقيمه شريناه مابعد جذع وجاء عليه اسوام
حليوه 100 الف وجانا اماراتي وقال بعطيكم الجيب اللي معي موديله2004
لاكن مالله اراد قالنا بنشوف انتاجه وبعناه العام في سوق الحساء
بقيمه قصب ماتعدى الاربعه مع العلم انا تطببنا فيه وكويناه وحميناه لاكن اللي مايكتبه الله عسر

[مرضي عيد]

اكوه عن السطح وانا اخوك

[وليد خالد الحربي]

البل اللي ضربتها منه حول الاربعين اخوي وشكرا على تجابك انت والاخواان

[ناصر عيسى المنصوري]

واحد من الربع مثل حالت بعيرك تقريبا بدا معه برنامج شهر ونص والقح عقبه البعير بفضل الله
1 ابرة زنبور الحار 15 ملم وعقبها باربع ايام ابرة جرب وعقبها بعشر ايام ابرة زنبور بارد 20 ملم
2 وبعد ابرة الزنبور البارد باسبوعين تعطيه ابرة شد العضلات ورتق الاعصاب يعرفونها البيطريين وتستخدم بدل الكي للبعير المفضوخ 3 ابر كل يومين ابره
3 تعطيه سائل e silinuim اي سللينيوم منشط مع بودرة فيتامينات تخلطها لها مع اي علف يوميا لمده لاتقل عن 14 يوم .. حاول تعطيه البرنامج ذا قبل موعد هياجه اللي انت عارفه باسبوعين .. ويوم يضرب البعير وهو مضرب امسح خيفه واغسله بمنقوع السدر الاخضر الجديد بعد ماتغليه وتبرده لانه ينظف من البكتيريا الضاره ...هذه اسباب والموفق رب العالمين
لاتعطي زنبور حار في وقت الحر اعطه مع الفجر او وقت الزوال
لانه يقتل المطيه في الحر عطول

[محمد ابراهيم السبيعي]

^
وازيد على اخوي اخلط مع الشعير اللي تعطيه حلبه

[حمد بن عيران القريني]

بعد التحية
مثل ماقال الاخ السبيعي عطه حلبة والله يعينك على ريح البعير ولا تكثر كل يوم جمع وفية بعارين عند ناس اعرفهم مالقحت الا يوم اسدست

[وليد خالد الحربي]

الله يعافيكم وبيض الله وجيهكم

[سجلان]

الله يعين على الحلال ومشاكله , انا عندي البعير نفس المشكلة ونفس السن واضرابه ممتاز وله 3 سنوات ما لقح
لكن الابل الي ضربها مهيب واجد , عطيته حلبه وسلينيوم ولقاح نخل السنة الماضية
بعضهم يقول يمكن التهاب في المسالك . السنه هذي ضرب حول 4 نياق وفي رجاء خير .

[احمد الحربي]

سمن البعير ولاجااا الهداد خله يضرب واجد لاتردة عن الضراب

واللي الله كاتبة بيصير مافيها كلام

الله يباركلك فيه

[سجلان]

الحمد لله
البعير لقاح بعد علاج شعبي لتنظيف التهابات في المسالك والجراب

[سجلان]

اقصد القح

[عبدالرحمن الوهبي التميمي]

ما شاء الله تبارك الله

الله يبارك لك فيه ويمنحك منه البكار الطيبة

لكن ودي انك ذكرت العلاج علشان لو احد عنده بعير ما يلقح يعرف العلاج

وانت ان شاء الله انك على اجر

[حمد الجفالي]

الله يبارك لك ولكل مسلم في حلاله
ولا تحرم نفسك الاجر في فائدة اخوانك المسلمين الذين يعانون من نفس المشكله
بوصف طريقه الاعلاج للفائده للجميع جزاك الله خير

[صالح العوفي]

ماشاء الله شي طيب انه لقح
لكن فيه علاج ثاني ايضا حبيت ذكره هنا في الموضوع وهو فيتامين E هذا يسمى فيتامين الاخصاب