تكفوووووووووووون ألحقوا على الناقه

[عبدالعزيز خالد الفعيم]

السلام عليكم ورحمة الله وبركاته

يا أخوان عندي ناقه من 15 يوم لاحظت عليه فالبداية

أن أكله قليل وتبرك ..

وظنيت انه مغتثه وعطيناه محاليل وبعض الادويه

ثم ترادت حالته بحيث ان اكله قّل بزياده

جرتها ضعفت وبطنه انتفخ

وصارت تدور البراد , وتبرك بجنب الحوض , هذا ف الاسبوع الاول

اما الاسبوع الثاني ذرقت الناقه ( الله يكرمكم )

لمدة اربعة ايام بشكل متقطع

جبت له أطباء , وسوو لها فحص وعطونا علاجات له ( مضادات , وخافض حراراه ,وكثيره ! )

لكن الناقة تزين يوم وتترادى اليوم الثاني


الخلاصه انه ف الاربع ايام الاخيره صارت ماتخرج وماتشيل الجره ابداً وأكله شبهه معدوم وبطنه منتفخ بالحيل واذا عطيناه محلول او اي شيء تطرش , وبطنه يرج كأنه راوية ماء .. وآخر دكتور قال لي احتمال فيها سدد

علماً ان امس سويت له تحليل دم وقالوا ان الناقة الكلى عنده تعبانه

صراحةً يا اخوان انا مححححححححتاار .. أبي الرأي والشور

وأن الناقة مابعد ثوت , تسرح وتضوي مع الأبل

تكفوووووووووووون يا التميمي , والمنصوري ولايهونون باقي الربع ..

[بندر الرويلي]

الأخ عبدالعزيز أسأل الله ان لا يخسر عليك ويشفيها ان شاء الله أحتمال كبير ان الناقه ما كله كيس بلاستيك او سلك رودس جرب معاها في الوقت الراهن زيت الزيتون غرها به ومدام ان كلاها تعبانه شفلك رجال خبير يكويها وفتش فم الناقه من الهدب وما عليها خلاف ان شاء الله

[عبدالعزيز خالد الفعيم]

شكراً أخوي بندر على أهتمامك وحرصك

وسوف أجرب زيت الزيتون او زيت السمسم

لكن المشكلة اذا عطيناها اي شيء بالفم علطول تطرش

اما سلك الرودس مستبعد لاننا مانستخدم الرودس ابداً والناقه ترعى بالبر

[فيصل بن هادي]

الأخ عبدالعزيز أسأل الله ان لا يخسر عليك ويشفيها ان شاء الله أحتمال كبير ان الناقه معها جرح مقدم
شف خبير في اللكي خله يكويها مطرقين متحاوله اخر واصغر ضلع من اليمين
وعسى الله مايخسر على مسلم

[حمد بن عيران القريني]

الاخ عبدالعزيز
بعد التحية
اللي في الناقة هيام وصعب علاجة والله يعوضك فيها خير منها لكن اذا جاء هذا النوع من الهيام في المطية في بداية مرضها عطها الخليجية عبوتين كاملتين مرة وحدة

[عبدالعزيز خالد الفعيم]

الاخ فيصل والأخ حمد شكرا على تفاعلكم
الاخ فيصل وش تقصد بالجرح المقدم ... اذا كان تقصد جرح قديم ما شفت فيها شىء
الاخ حمد ... موضوع الهيام انا شكيت فيها العام وعطيته فرنسية وصراحة الناقه الحين خلفه والعروق الاثنين اللي يغذن الديد فيهن انتفاخ حتي وهي القحه وهذا اللي خلان اشك بالهيام اولا ... لكن كيف ماظهر في تحليل الدم ....... ما استغني عن شوركم

[محمد الوهبي التميمي]

ارحب ياعبدالعزيز واسف على التاخير
اللي فالناقه مهوب هيام ولا له علاقه بامراض الدم
لها كيه مشط في مخفق الكلوه
وكذالك مطرقين قدم صفن الناقه
وبلحق الموضوع رسم توضيحي لاماكن الكي
لي عوده بمشئة الله
تقبل مروري

[محمد الوهبي التميمي]

اعتذر من صاحب الناقه على استخدام الصوره لتوضيح مكان الكي
http://www.mzayan.com/vb/attachment.php?attachmentid=9888&d=1338218641

اتمنى ان الرسم التوضيحي واضح لك ياعبدالعزيز توكل على الله واكوها او شف لك خبير كوي ولايتعدى الرسم التوضيحي وبشرنا عن علومها الايام القادمه
تقبل مروري

[عبدالعزيز خالد الفعيم]

تم كي الناقة حسب تعليمات الاخ محمد التميمي
وانتظر النتايج وعسى الله يجعله سبب مبارك
واشكر الاخوه على التفاعل

[وحيد البدراني]

افادوك الاخوان
عسى الله مايخسر كل مسلم
والله يشافيها ويبارك لك فيها

[حمد بن عيران القريني]

الاخ عبدالعزيز
بعد التحية
سبق وجاءت عندي ولم اجد لها علاج وتعبت من العلاجات وبشرنا عن الكوي مع العلم بأني اخبرتك والدليل أن الناقة بيهر بطنها ولا يوقف

[عبدالعزيز خالد الفعيم]

الناقة ياخوان تفداكم والله يعوضنا خير ررررررررررر واشكر كل الاخوان على تفاعلهم وفزعتهم................ واخص الاخ محمد التميمي الذي بذل معي جهدا في المنتدى وفي التواصل بالجوال والشكر موصول للاخ بندر الرواي الذي تواصل معي على الخاص ......... ولا يهنون بقية الاخوان ...... والحمدلله اولا وآخرااااا

[محمد الوهبي التميمي]

معوض خير ياعبدالعزيز
والله يعوضك ياطيب منها

[مبارك بن محمد]

ربي يعوضك اخير عنها .. بس ليتك طلبت لها تشريح من الدكتور يخبرك وش علمها الناقه على شان بعيد الشر تاخذ الحيطه والحذر في الايام القادمه

والله يخلف عليك بخير .. والله لا يبلاك ولا يبلا مسلم بهالمرض

[حمد بن عيران القريني]

الاخ عبدالعزيز
بعد التحية
الله يعوضك خير منها

[بدر العوام]

فاديتن اهلها والله يعوضك خير بالدنيا وبالاخرة

[طلال الروقي]

الله يعوضك خير منها بالدنيا والآخره

[محمد سالم اليامي]

الله يعوض بالي اطيب منها

[فهد البلوي]

ارجوك لاتتركها بدون دكتور يجي يشوف اساس المشكله بصالح الجميع واسال الله يعوضك بخير منها

[بندر الرويلي]

البل تفدى اهلها الله يعوضك بخيرا من اللي راح ان شاء الله

[فيصل بن هادي]

معوض خير ياعبدالعزيز
والله يعوضك باطيب منها