الفزعه يامال الشحم بكرهـ حدمّانه !!

[قرناس العتيبي]

السلام عليكم ورحمة الله وبركاته

مسيكم بالخير يالربع

اخواني شريت لي بكره حقه فاخره بمبلغ غالي قبل اسبوع وعزلتها في شبك ثلاث ايام تقريبا عند الابل قلت ابيها تزين ومنها توالف

المهم في يوم من الايام لاحظت شعفتها مع جنبها منتوف منها قلت يمكن من الابل مع ان مشكك لان الشبك رفيع والابل عندي مابها نتف ملحوظ

هل من الممكن البكره تنتف عمرها الشئ الثاني امس وقفت وحده من البكار تمعّك ع الشبك ونتفت البكره من شعفتها زبدة الموضوع ان البكره طلعت تنتف

مع انها عند راعيها ماكان هالطبع فيها هل لاني عزلتها في شبك لحالها خلاها تحّدم مثلا وتنتف عمرها والبكار اللي تجيها تمعك !!!!

ياليت من له تجارب في هالموضوع يوافينا بالعلوم ويعطينا الاسباب وطرق العلاج لاهنتوووا


والحين وش الطريقه المناسبه اللي ممكن استخدمها في مثل هالحاله


وجعل الله مايريكم مكروه في عيالكم وحلالكم


اخوووكم / قرناس

[صالح بن حسن البقمي]

الله الله ياخوي من الشبك انا عندي قعود طيب عازله عشان نسمنه واشوف وبرته منتوفه واثره ينتف وبرته
ورحت لطبيب بيطري عطاني شراب جالون 3 بيالت مع قارورة ام ريال ماء لمده 10 ايام والحمدلله زان وتغير
تلقها في ثاني صيدله في الجنادريه وانت وجهك شمال عند الدكتور ياسر دكتور 100 با100 موفق

[بندر الرويلي]

هلا يا قرناس بجاوبك على اسألتك

هل من الممكن البكره تنتف عمرها ؟
نعم ممكن تنتف عمرها .

هل لاني عزلتها في شبك لحالها خلاها تحّدم مثلا وتنتف عمرها والبكار اللي تجيها تمعك ؟
أحتمال كبيران هذا السبب لكن لا فكيتها معهن وشفتها تنتف تأكد انه طبع فيها او أن عندها نقص أملاح

ياليت من له تجارب في هالموضوع يوافينا بالعلوم ويعطينا الاسباب وطرق العلاج لاهنتوووا
أن شاء الله يتفاعلون معاك الأخوان وينقلون لك تجاربهم .


والحين وش الطريقه المناسبه اللي ممكن استخدمها في مثل هالحاله ؟
حطلها ملح بشبكها واذا والفت البل وفكيتها معاهن ولقيتها تنتف من البكار رش على أشعاف البكار اللي تنتف منهن فلفل حار مطحون .
وأن شاء الله الأخوان اللي عندهم تجارب يفيدونك

[قرناس العتيبي]

لا هنت ياصالح على الرد والمشاركه وجعلك تشوف بنات قعودك يسرن الناظر

لاعدمناك وتجربتك وصلت اخووي :)

[قرناس العتيبي]

يابندر جزاك الله خير واشهد انك كفيت ووفيت ياالنشمي

جعلك ذخر

[محمد الوهبي التميمي]

جلل البكره ياقرناس وهذا احد الحلول

[ثامر فايز]

امرها بسيط عليك بالجلال وانا اخوك والملح وطلق البكره مع الابل وان كانك شفتها تنتف البل عزلها بس لاتوطي الجلال عنه

[مشعل الشويش]

ياخوي فـك البكره مع البل تسرح وتضوي وخل العين عليهاا ان كنت بصفه مستمره مع ابلك أو العامل .
وخلها توالف البكار .. وينطلق نظرهاا .. ويزين خاطرهاا .. وفكها من السجن اللي هي فيـه .
وهذا العلاج بأمر الله

[عبدالمحسن المقاطي]

اول شي جلل البكره

وحطلها ملح الابيض الخشن

وخلها معزوله لين تنسى هالطبع

=======================

في طريقه ثانيه حطلها الفلفل المطحون تحصله في البقالات
شربه شوية ماء وحطه على شعفتها وخلها تذوقه وتصد
وحط على وحده من البكار وخلها تدخل معها الشبك وتذوقه وبكذا تصد عن نتف الوبر كله

بس هالطريقه يبيلك تستمر معها كم يوم

[مبارك العرجاني]

اول شي جلل البكره

وحطلها ملح الابيض الخشن

وخلها معزوله لين تنسى هالطبع

=======================

في طريقه ثانيه حطلها الفلفل المطحون تحصله في البقالات
شربه شوية ماء وحطه على شعفتها وخلها تذوقه وتصد
وحط على وحده من البكار وخلها تدخل معها الشبك وتذوقه وبكذا تصد عن نتف الوبر كله

بس هالطريقه يبيلك تستمر معها كم يوم


عطاك العلم اللي ما عاد وراه كلام

[قرناس العتيبي]

جعل من اخركم فالجنه وابشركم فكيت البكره مع امهاتها وان الله تم لها مابها خلاف

[تميم التميمي]

الله الله ياخوي من الشبك انا عندي قعود طيب عازله عشان نسمنه واشوف وبرته منتوفه واثره ينتف وبرته
ورحت لطبيب بيطري عطاني شراب جالون 3 بيالت مع قارورة ام ريال ماء لمده 10 ايام والحمدلله زان وتغير
تلقها في ثاني صيدله في الجنادريه وانت وجهك شمال عند الدكتور ياسر دكتور 100 با100 موفق
صح السانك ياصالح انا جربته العلاج 100 بال 100 لازم تعطيها الشراب واعتقد انه لطفيليات الدم والجلد يعني شراب دود وانا جربته وانا ماني مقتنع بس قنعني 0

[راشد بن سعد]

الله يبركلك بمعطاك والمسلمين اجمعين

اخوي ليتك تذكر لنا اسم الدوى لنا محتاجينه ويستفيد اكثر عدد ممكن من الاخوان

[محمدبن رشيد الحنتوشي]

يالبقمي الله يعافيك اذكر لنا اسم العلاج

[سعود البريدي]

مثل ماقال التميمي جللها ولا تفكها مع البل نصيحه عشان ما تطبعها