وش علاج البعج

[متعب بن سالم]

السلام عليكم
ياشباب كيف حالكم الخير عليكم مبارك عسى الله ينفع به البلاد والعباد
حبيت أسأل اللي عنده علم يفيدني ولا أحد يقول مابه علاج تكفون
( ما أنزل الله من داء إلا جعل له دواء )
عندي بكرة طيبه بالحيل جيت بضربها على بعير طيب وشالها الونش بطريقة غلط وسبب لها ( بعج ) وقالوا لي ناس ان مالها علااااااااج وابي أحد يدلني على العلاج اللي ينفع بعد تيسير الله تعالى
لكن نصيحه انتبهوا لإبلكم ياشباب من الونوش ترى بعض العمال يشيلها كأنها قصب لا يدري عن سعرها ولا يخاف الله فيها .. بارك الله للجميع

[محمد الوهبي التميمي]

كيف حالك يا متعب
البكره الحين وش وضعها وهالبعج وين جاها
ياليت تزودنا أكثر عن البعج عند البل
وهل هو يردها عن ممشى او عن معلف

[متعب بن سالم]

هلا اخوي محمد البعج هذا في آخر جنبها وهو اللي فهمته من واحد من ربعي انه تهتك الاغشية الداخية اللي تحت الجلد مباشرة لدرجة انه يزيد مع الوقت اذا ما عولج او كان له حل .. لكنه ما يردها لا من ممشى ولا من علف الحمد لله بس لو عشرت زاد لان الحوار يضغطها
وهو عموما ورم كنت احسبه خراج حتى ان احشاء الناقه قد تتسرب تحت الجلد حتى لو أنك ضغطت هذي الورمه تحس ان يدك تدخل داخل بطن الناقه معناها ان ما عاد في الا هالجلد من جهة الورم .. والمنطقه هذي عادة يكون اللحم فيها رقاق مره وجاء البيطري وشافها وقال هذا بعج عسى الله يعوض عليك ومشى وخلاني

[حاصل اليامي]

البعج له كي وبالعاده ينفع الله به وهو على شكل المستطيل حول السر يعني تحلق على سر البكره وتريحها من الممشا وتخف عليها الحشيش