اتعبنا الوريم وش الحل ياارجال

[سفر الدوسري]

السلام عليكم

عندي ناقة لبنها واجد وانتجت من ثلاث شهور وكل اسبوعين يورم ديدها شي غير طبيعي واعطيها المضاد الابيض 20 سم ثلاث ايام
ومعه diurizone سم 20 ويخف له كم يوم ويرجع وعلفها مرة ذره ومره برسيم وشعير حسب المتوفر ولاهوب واجد

هل هو خباش ووش الفرق بين الوريم والخباش ووش علاجه ومشكورين ولاهنتو

[طلال الروقي]

الله لا يوريك مايسوءك ياسفر في حلالك ،،

أقطع عنها البرسيم نهائيا ،،

[فهد مشعل]

عندي ناقه مثل حال ناقتك ياسفر بالضبط

ولاحظت ان الورم أو الخباش يرجع لها كل ماعلفتها شعير وبرسيم وخصوصاً الشعير

حاول تقطع عنها الشعير والبرسيم مثل ماقال أخوي طلال .. خلها على الرودس وان شاء الله تشوف مايسرك ..

[بندر الرويلي]

ما قصروا الاخوان لكن يا سفر هل الناقه تسرح ( تمشي ) ولا بشبك

[محمد الوهبي التميمي]

قاطع البرسيم والشعير
الشعير والبرسيم من مسببات الوريم
اطلقها تمشي مسافات
نظف الديد بشكل مستمر
عب الشماله ثلج واربطها شمالتها
وعطني خبر عنها بعد ثلاث ايام ان زان حالها ولا عطيتك اسماء لبعض المراهم المفيده لها

[صالح الكربي]

نفس الحاله يالربع عندي وكل اسبوع ابرة درايزون ولكن الناقه مريضه بمرض الهيام بعد الفحص وتلاحقو الابل قبل لا يتبالغ فيها المرض

وسلامتكم

[سطام الخالدي]

تحياتي للجميع

انا مع الاخوان ليا صار حليب الناقه واجد ويخبش ديدها لاتعلفها برسيم او شعير
ولازم لها من المسراح يومياً
اما اذا كان المتوقع هيام فالعلاج مجربه انا لو تشوفون نتيجته في ناقه عندي ورم زورها تقل شاقه بموس ومخيطه وشافت العافيه من ذيك الايام لها حول السنتين ولا بها الاالعافيه يالله لك الحمد
العلاج:
زيت سمسم اول يوم وثالث يوم وخامس يوم كل يوم قارورة
والكبريت يذر على العلف وفي الماء
وسلامتكم

[فهد بن عطاالله المطيري]

مرحبا اخوي سفر

الناقه ان كان حليبها واجد فاقطع عنها البرسيم اولا ومش الناقه واليا اصبح الفجر يرش ديدها بماء بارد كل يوووم
واذا يحلبها انت الخير واهله لانك راعي ابل وتحرص على النظافه ..... وان كان يحلبها الراعي خله ينظف يديه لان ديد الناقه حساس من النجاسه عزك الله والقارئين

وتفقد المراح لا يكون فيه النمل الاسود ( النداس) لان بهذلنا في احد السنين بديود الابل

وتقبل مروري

[محمد سعد]

اخوي سفر
عندي خلفات ما سلمت من الوريم الا بعد الله ثم علاج الهيام الابره الفرنسيه

[احمد محمد السالم]

اذا كان الوريم له اكثر 10 ايام استعمل ابرة الوريم مع المشي

واذا اقل من عشره ايام فقر الناقه في محل يكون فيه ارض صلبه مثلا فيه حجر بس يكون تقدر تبرك فيه
والا ماهو لازم يكون فيه ارض صلبه اهم شي تكون في محل مافيه ضلال
يعني مكان صحي بعيد عن البل

وخلها من الساعه 1الــــــــــى المغرب ثلاثه ايام بالكثير

وسبق اني ذكرت هذه الطريقه بس الموضوع يمكن حذف لانه قديم