استشاره عاجله ياهل الخبره..

[راشد الكدادي]

السلام عليكم ياهل الفزعات والعلوم الغانمه.
الخلفه ولدت وكل خلافها يطلع منها حليب ماعدى مقدمها الآيسر حليبه خفيف...اليوم يقول العامل إن فيه خلفين مايطلع منها حليب...وش العمل وش السوات...علماً إني سمعت إن هناك إبره تفتح بها خلف الناقه عند الدكتور البيطري...وش رآيكم أستعملها ولا عندكم حل أفضل,؟
ولاهنتم يالنشاما.

[مشبب بن حماد القحطاني]

أرحب ياراشد
مامن خبره لكن بقول لك اللي أعرفه
الخلفة بكر؟
كانها بكر خل حوارها يلهجها وخل العامل ينظفها كل ماعطفت وبتزين خلوفها
بالنسبه للإبره ماسبق أن أستخدمتها لكن سمعت اللي يذم إستخدامها

تحياتي لك

[مسعود العماري]

مثل ماقال مشبب

شمل الناقة عدا الخلاف اللي حليبها ردي أظهرها للحوار يلهجا

ملاحظة : شق الشمالة حسب حجم الديد حتى يرضعه الحوار ولا يقرب السليم

[راشد الكدادي]

مشبب ...ومسعود
بيض الله وجيهكم ولاهنتم يالقروم..

[خالد الفالح]

بعض الخلاف متسكر ويسمى المرض عصفور وهو عصبه تسد خروج الحليب بشكل جيد يخرج بقله

اما ابرة فتح القناه فما انصحك تستخدمه لانها تجرح قناة الحليب وتلوثها لو استخدمت خطاء

لكن ممكن تستخدم عود العويدي طاقيته تحت تحطه في راس سمة الديد لساعات ان كانه متسكر يساعد في توسيع القناه

اما ان كان عصفور فلا تتعب نفسك ماله حل