الناقه كل ما عشرت كسرت ؟!

[ممدوح احمد الشريف]

السلام عليكم ورحمة الله وبركاته

عندي يا اخوان ناقه طيبه شريتها من رجال اجودي شرواكم .. الناقه شريتها معشر واكسرت في شهر شوال اللي راح

ومن اربعة اشهر الى اليوم وهي كل ما عشرت كسرت .. عشارها ما يتعدى اسبوعين من يوم تشاول

قصينا صيد وجبت بيطري ودخل عليها وننظف رحمها بمطهر ولافيه فايده

تهادر طول الوقت حتى وهي معشر



احد يقدر يفيدنا في الموضوع يا الاجواد

[مشبب بن حماد القحطاني]

الماء البارد يمكن يكون له سبب
ولعب الناقه
وإذا ماعندها شي من هالأمور
شفلك طبيب يده مبروكه يدخل عليها مره ثانيه
وعطها بعد مضاد حيوي طويل المفعول تترامايسين
وعسى الله يرزقك منها

[عبدالعزيز البريدي]

^ ^ ^

الماء البارد يكسر العشار ؟

[مبارك بن محمد]

اخوي ..

عندي نفس سالفتك ....بكره جذعه .. سوت فيني السوايا .. الا تلقح ومره لا .. مره تلقح ومره لا .. اخر شي طولي بعمرك .. مرحتها الصبح .. ورديته عليها العصر ومن بعدها رصغتها بروحها بعيد عن البوش .. وقللت عليها الطعام .. وشربها كان يوم وترك والماي ياللي تشربه يكون في نص النهار مره وحده بس يا لين ترتوي .. ولحفها عن البرد بالليل .. وافكه عنها في نصف الصباح حدود الساعه 9 الصبح وهيه مرصوغه .. وعلى هالموال والحمد لله والشكر ثبت لقاحها حاليا ...

جرب مثبت الحمل .. اقصد الابره للتثبيت ... عسى الله يثبت لقاحها

[مسعود العماري]

هل الناقة فيها جرب ؟

انصحك بالتالي :

عط الناقة ابرة جرب امريكية وكرر الجرعة بعد 10 أيام

وعطها ابرة تثبيت اثناء الاضراب

[ممدوح احمد الشريف]

جزاكم الله خير وبيض الله وجيهكم

[فواز المطيري]

أخوي ممدوح الشريف

عندي ناقة نفس ناقتك شريتها عشرا ويوم جاء وقت الضراب اضربتها وعشرت و15 يوم ولهي تشاول وكسرت ثم ضربتها ثاني مرة وعشرت وخذت 25 يوم وكسرت رحت لبيطري عشان ينظف عنها وقال مادام تعشر وتفيخ لا تنظف عنها ابنصحك بحاجة سوها وهي كاتالي
أول مايضربها الجمل عطها ابرة تثبيت وعلى راس السبوع عطها ابرة تثبيت ثانية وبعد اسبوع بعد عطها ابرة تثبيت ثالثه وانشاء الله يمسك عشارها وفعلاً بعد امر الله مسك عشارها لها هالحين ثلاث اشهور معشر.