شـــــيء يقــــهــــر ؟؟؟

[محمد بن عامر]

http://www.mzayan.com/vb/mwaextraedit4/extra/29.gif

عندي موضوع محيرني هذا الله يسلمكم عندي ناقه خلفه توها منتج وصابها جرب كايد وصاب ولدها ايضا
ويجي سوداني عند البل يبغى يشتري من البل
مرسله سوداني اعرفه من اهل السوق
وانا غير موجود عند البل بعيــــد ويتصل بي يقول وش عندك من البل للبيع
قلت عندي بعير ان صلحلك شاف البعير وسام البعير سومة رديه قلت له ماني يمك
وهو يحط عينه عالخلفه الجربانه ويسومها سومه وسط طبعا عن طريق الجوال وانا وياه لين خذاها
بقيمه قليله طبعا بعته لأن الناقه فيها جرب وخايف تعدي غيرها
بعدها مريت السوق واحصل الناقه وولدها عليهم سوم طيب ويقولي السوداني القعود فحل ماشاءالله
واعاين القعود الا والله القعود الطــــــيب
لأني ماانتبهة للقعود يوم هو عندي لأني ماشفته الا مره من يوم جابته امه
السوداني يوم واجهته بالسوق وسألته مايدري اني انا راعيها لأنه سلم الدراهم للصبي عندي
وش رايكم اردها ولا وش الراي يا جماعة الخير
علماً اني احتريها سنه تنتج واخر شي يستفيد السوداني منها

المعذره على الاطاله

[سلطان الدلبحي]

يا مرحبااا يا محمد

با النسبـه لناقتك انا اشووف السبب منك ولا تمسك السودانين باحق ابد

لانك بايعه برضااك وكنت مهمل النااقه ووقعود والزول جاك وشراها وعالجهاا

وعين خيـر منهااا

ولنها على الكيف كل مابعة تقدر ترجع كان تقلا نص النااس اول مايبيع يروح ويرجع النااقه

وانت من كلامك بااين بان النااقه بياعها مبطي حول الشهر لانها عالجهاا ثم عرضهااا

وخيرن منت ماسك السودانين بشي لونك مهتم بحلاك لباان زينه عندك وبعته بقيمه طيبه

ماار الله يعووضك يابوعاامر با الانتااج الناادر

[محمد بن عامر]

مرحبا ومسهلا ياسلطان حياك الله
لكن الناقه بعتها اليوم وبعد بكره دخلت السوق وشفتها

[شجاع عمر الأكلبي]

والله ياخوي لك عندي راي ولا تزعل مني

أنا أقترح عليك تبيع الإبل كلّها ولا تاكل نفسك بالحسايف

راعي إبل ولا تدري عن ناقتك وولدها ولا زينه لومك على نفسك

هذا رأيي الشخصي

[محمد السيحاني]

من رأيي انك لاتحسف وانا خوك ولالك حق ابدا
طيب لو انه خسران وجاك بيرجعها هل تقبل اكيد لا
وانت خابر السوداني شريطي اكيد انه يدور وراك مكسب
وهذا رأيي وتقبل تحياتي

[محمد بن عامر]

من رأيي انك لاتحسف وانا خوك ولالك حق ابدا

طيب لو انه خسران وجاك بيرجعها هل تقبل اكيد لا
وانت خابر السوداني شريطي اكيد انه يدور وراك مكسب

وهذا رأيي وتقبل تحياتي
حياك الله

[احمد عمران]

لنكن منصفين حتى مع انفسنا
اخي محمد لايدخل الشيطان لك عن طريق الحسد
كن راضي بلي اخذته واطلب من الله البركة
ونا اخوك ماهي بلكثرة
أن رسول الله صلى الله عليه وسلم قال: (رحم الله عبداً سمحاً إذا باع، سمحاً إذا اشترى، سمحاً إذا اقتضى).
وترى محد يتعلم بلاش

[حمد السبيعي]

الله يعوضك باخير منها

[حزام العاطفي]

يامحمد انت بعت وتباركت بالله
والدعوى تسااااااهيل والواحد مايدري وش الخيرة فيه

وان كان لك خاطر في الناقة فكسب السوداني يامال الشحم الف ريال
ورجع ناقتك

[مشبب بن حماد القحطاني]

إدع لشاريها بالبركه
وأطلب الكريم سبحانه يرزقك بأطيب منها ومن حوارها

[عبدالله حمد العتيبي]

الله يعوضك باخير منها

[عبدالمحسن المقاطي]

شلون تبيع الخلفه وانت ماشفت حوارها

[حاتم العماري]

الله يمسيك بالخير
البيع والشرا هذا مجراه وادع للشاري بالبركه
افرح لاخوك المسلم بالربح
وابشر بالعوض من الله
تقبل تحياتي

[محمد المسعد]

اذا لك فيها شف وهي على حظ البيع فكسب المشتري مافيها شي

[خالد علي]

خل نيتك وحده جزاك اللة خير

[سعيد المشرف]

لااله الا الله ... كيف شي يقهر ؟؟؟؟

ياخي الواجب انك تفرح ان الله ربحه فيها

والله الذي لا إله الا هو اني امرض واتضايق اذا احد شراء مني اي شي وخسر فيه

تبي الله يبارك لك في حلالك ادع له بالبرك وقل الله يربحه

[عبدالرحمن التركي]

النيه مطيه ........... لا تحسّف

[محمد بن مرهي]

اخوي انت شلون راعي ابل ولا تعرف زينها من شينها ترا البل تبي من يهتم فيهاويرعاها ماهوب يهملها وبيعيها عن طريق التلفون لا تزعل من كلامي بس هذي الصراحه ع العموم الله يعوضك بــ اخير منها ومثل ماقال لك اخونا الي رده فوق مالك الا انك تكسب الزول الف والا خمس ميه وتشتريها

[فيصل الناصر]

(((علماً اني احتريها سنه تنتج واخر شي يستفيد السوداني منها ))))

نحسبك والله حسيبك انك طيب واللي بقلبك على لسانك وعلى نياتك ولا العبارة الموضحة اعلاه من الحسد نسأل الله العافية ونظن فيك الغفلة عن هذا الامر ونقول لانفسنا ولك اتق الله واستغفر لذنبك وادع بالبركة لاخيك المسلم 0
0الله يرزقك باخير منها وتقبل تحياتي 0

[احمد الاسعدي]

لا تغير نيتك ابدآ مع الرجال وأنا أخوك وان كانك لك شف في الناقة إشرها من الرجال الله لا يهينك وهذي ارزاق يقسمها رب العباد

[محمد ساعد]

شوي شوي على الرجال ياجماعه ترى الرجال قصده التحايل اللي صار
لكن انصحك اشرها مره ثانيه والجرب راسمالها ابره

[مشاري المزيني]

اخوي الله يعوضك بخير منها

أنت بعت برضاك وانتهى الامر

ومثل ماتفضلوا الاخوان "حب لاخيك ماتحب لنفسك"

انا اعرف واحد من الربع باع بكره ب 300ألف واللي شراها منه باعها بـ 600ألف واللي شراهآ باعها بـ 800 ألف

هذي أرزاق وانا اخوكـ

دمت بخير

[مشعل الشويش]

مالـك حق ترجعهااا لامن بعيد ولا قريب !

والحق عليـك أنـــــت يااخوي ..؟

كيف تبيع ناقتك ماشفت حوارها ؟!

وكيف تعافها عشان فيها جررب ..؟!

بصراحه شي غريب ياخوي محمـد .. !

..

لكن كان لك نظر فالقعود وامه كسب السوداني ولحيةً ترضيها بصله 1000 أو حوله وانت مضوي ناقتك لمراحـك .

او جز منها وادع له بالبركـه ... وبيرزقك الله بااطيب منهاا .

وقبل هذا وذاك استخر ..

والانسان يفرح لاكسب اللي شاري منه .. وكنه هو الكسبان ..

[محمد بن عامر]

ياجماعة الخير حيالله كلن بأسمه
الرجال يوم يشتري حديتها عليه ونزلت له من قيمتها واجد لين شراها
لأنه يقول عساه تجيب قيمتها وتعاطفت مع الماخوذ
وهي تجيب له دبل قيمت مشتراها
بلف مخي الصراحه

[فهد العضياني]

دام افترق البايع والشاري فالبيعه تمت ولا فيها جدال

لكن اقترح عليك تروح للسوداني وبمعسول الكلام يمكن يسخره الله لك وترجع الناقه

واذا مانفع اكرم الزول بكم قرش انشالله يرضى

[احمد الحربي]

وهي تجيب له دبل قيمت مشتراها
بلف مخي الصراحه


ههههههههههههه

ياخوي اذا لك رغبة فيها كسب السوداني
وردها سوءاً هي او حوارها
المشكلة!! ان بعض السودانية مايرضيهم شئ !؟

اسئل مجرب وانا اخوك
الاسبوع اللي راح عندي ناقة صعبه
ولاتكفيها كلمة صعبه وحليبها واااجد
المهم طفشت منها وقفلتها معي وانزلها
السوق وابيعها بـ 7000 ريال (يابلاش)
المهم رجعت للعزبة شوي والصبي جاي
قال كم جابت قلت سبع
قال تبيعها بسبع وهي مسيومة بـ9000
بغيت اهفة بالغظاااارة
فــ الشاهد ان السودانية اللي يصلحهم
يكوسون(يبحثون)هههههه الفايدة لبعضهم



عسى الله يعوضك بأخير منها
ونصحيتي لك لاتتحسف على شئ ابد ابد

[احمد الشهراني]

كم من سوداني شرينا منه وكسبنا وراه وعينا خير ماحسدنا الايقول الله يبارك لكم ويعرف ان ماهي قيمتها
لاتمحق حلالك وتصرف تصرف تندم عليه
ولا انشد شيخ يعرف اكثر مناترى مافيه فتاوي هنا

[محمد سالم اليامي]

سلم لي على السوداني عز الله انه قناص ولا هي شماته فيك ياراعي الناقه لكن هذي سوالفهم يترزقون الله ورزق الناس من الناس والكل بالله
ادع له بالبركه وان الله يعوض عليك يمكن لو انها في مراحك اصبحت ميته والا معدية ابلك بجربها والرزق الي الله كاتبه لك وصلك وافي والباقي ما هو لك للسوداني .اطلق النيه وهذي في الناس كلهم وقليل الي يقنع والا يرضى في رزقه الله يرزق باطيب منها ان شاء الله

[منصورمحمد]

اقول انت بعت والنيه مطيه
زين نيتك وان شاء الله يعوضك خير

[خالد بن عصاي]

الله يعوضك باخير منها
اسمعني زين وحط كلمي بين عيونك

الناقة راحت والله يرزق السوداني مسلم شراء وانت بعته وهذا هو البيع الحلال وانتهاء موضوع الناقة

حتى ولو الناقة عندك الان وسليمة من الامراض ولم يكتب الله لك فيها رزق جاك نفس السوداني الذي كاتب الله له الرزق فيها واخذها قدام عيونك

ادع لاخوك السوداني بالربح والرزق والحسد هو سبب زوال النعم

[فالح بن عايض]

يا بن عامر انت خذيت نصيبك وهو خذا رزقه
وانتبه من هذا الموضوع تراه خطير والناس متهاونه فيه جداااااااااااااااااااااااااااااا
وما تدري وش الخيره فيه

[مبارك بن محمد]

وجهت نظري ..

هذا بيع وبشرى .. ولا فيه شي حرم انه البايع يرد ويشتري ياللي باعه ...

فليش ما تستام ناقتك وحوارها ..واشترها .. وهذا بعد بيع وشرا بينك وبين السوداني ...

[محمد رابح]

مثل ماقالوا الاخوان كسبه ورجعها

[نايف السحيمي]

كسبه يمال الشحم وردها للمراح
ولا ادعى له بالبركه والتوفيق ماشراها الى يبي المكسب وتعب الرجال عليها لين تحسنت

[عيد العوني]

والله ياابو عامر مااشوف شئ يضيق الصدر والله يبعد ضيقة الصدر والقبر عنا وعنك 0( زينها مع الله تزين ) والله اني افرح اذا شرى مني اخوي المسلم وربح واتضايق اذا لحقه خساره واترك له فرصه في الثانيه لعله يعوض خساره الاولى والجرب ما يرخص الابل عند اهلها خصوصا ان علاجه بسيط وفي متناول ايدي جميع ملاك الحلال وفي النهايه لا تحسف في البيع والشرى ولا تدري وين الخيره

[عالي العماري القرني]

الله يعوضك فيها يا بو عامر باللي أخير منها ولو ما كتب الخطا ما تعلمنا و الله يجبر الكسرة و بعض الناس غلظوا لك بالحكي لكن
وسع خاااااطررررك و تقبلها مثل شرب الما البارد و لو ما كتب الخطا ما تعلمنا و خذ من الدنيا دروس و أنت من الرجال اللي ما شغلهم المخلوق عن الخالق

[مشعل السهلي]

يابو عامر الله يرزق السوداني فيها , وهذي أرزاق مايقسمها سواء الله سبحانه .

والله أن أحلىء وأطيب علم أسمعه بعد ماأبيع هو ربح الي شراء مني !؟

وبعدين فيه أمور أنت غافل عنها :ـ
1ـ حط في بالك دائماً ( الخيره فيما أختاره الله ) ماتدري لو أنك رفضت البيعه يمكن من بكره وأنت ساحبها !!! صح ؟؟
2ـ من يقول أن ولدها فحل من خبرنا هاسوند ماتجي عنده خلفه ألا ويقول أن ولدها فحل !؟
3ـ أكثر الناس إذا بايع يبدا يزين حلاله في عينه مع العلم أنه قبل مايبيعه متضايق منه , بس بليس يبداء لعبته بعد البيع ؟!
4ـ لاتنساء أن العوض مافيه خير في حال لو صار الزول مسكين ورجعة ناقت صدقني مارح تضوي خير في مراحك .

نصيحه قل ( الله يرزقه فيه ويعوضني خيراً منها ) وبيرزقك الله
تحياتي