استفسارات مهم...

[تركي القحطاني]

السلام عليكم ورحمة الله وبركاته

ابي معاني الكلمات هاذي

مفاريد_حقايق-_معشر_واسما كثار عطوني معانيها

وان شاء الله انا ناوي اشتري خلفتين مع حيرانها بس بسألكم افضل الاعلاف للبل وكم تاكل من كيلو في اليوم

و عندي اسئله واجده بس انتضركم الين تردون علي

[جاسم الجربوعي]

تركي القحطاني

هذي اسماء البل منذ ولادته حتى سن معين

الحوار : منذ الولاده حتى يظهر عليه اسهيل من السنه الجايه

المفاريد مفردهامفرودوهو الي تم سنه


حقايق مفردها حقاوحقه وهو الي تم السنتين
.

لقي
عندما يتم 3 سنوات

جذع
تم 4 سنوات وبدا الخامسه

ثني
اتم 5 سنوات

رباع
اتم 6 سنوات

سديس
الذي اتم 7 سنوات وبدا الثامنه


اول فطر
اول سنه شق نابه اي طلع له ناب

ثاني فطر
يصيرعمر نابه سنتين

ثالث فطر
السنه الثالثه بعد فطر الناب


اماالمعشر فمعناها الناقه الي اضربها بعير وبعد 12 يوم تلقح وتسمى معشر

اتمنى اني افدتك

[سعود الشايوش]

في خدمتك يالغالي ،،


واصل الاسئلة ،،


ماقصرت اخوي جاسم،،


،،

[تركي القحطاني]

بيض الله وجهك بيض الله وجهك ياجاسم الجربوعي مااااااقصرت

طيب وش العمر المناسب لشراء الابل

2- كم تحتاج علف يومي

3- كيف اعرف ان الناقه سليمه ولا فيها مرض

[حمد الخلاوي]

بيض الله وجهك بيض الله وجهك ياجاسم الجربوعي مااااااقصرت

طيب وش العمر المناسب لشراء الابل

2- كم تحتاج علف يومي

3- كيف اعرف ان الناقه سليمه ولا فيها مرض

الاخ تركي صبحك الله بالخير

العمر المناسب لشراء البل من ناحيت ايش البل تباع طال عمرك من حواره

فيه ابل المزاين وفيه الوسط وفيه العاديه وانت حدد اذا تبغي ابل منايحه فكل الاعمار مناسبه من جذعه الى فاطر

اما كيف تعرف الناقه سليمه ولا فيها مرض امراض البل واجده والبدوي ماتغبا عليه الناقه المريضه والا السليمه

واذا بغيت تشري ابل وماعندك خبره شف لك واحد من ربعك عنده خبر وخله يروح معك

واما كم تحتاج علف حدد اذا كانت في بر ولا في شبك وكم عدد البل الي عندك هي تسرح ولا مشبك عليها

وانا انصحك بالمضغوط لن البل الي تعلف بالمضغوط ما تكل دمنها الله يكرمك وكرم القارين

واذا عندك ناقه اوناقتين فعطها نصف كيس واذا من الثلاث الى الخمس فعطها كيس وخل عندها رودس من الكبار في

الشبك هذا كل ماعندي واذا تبغا اي استفسار ثاني فانا تحت امرك

اخيك

حمد ابن خالد الخلاوي

[سعود الشايوش]

مشكور اخوي حمد الخلاوي لكن ودي اسألك ،، من جد تقول ان ناقتين ياكلن نصف كيس مضغوط ؟؟!!


المضغوط خطير يالغالي ،، لازم تبدأ تدريجي حتى تتعود عليه الابل موب مره وحده ،،


بالنسبة للشعير العادي ارى ان كل ناقه تاكل من 5 ـ 7 كيلو .. ونصف حبة برسيم ،،


يعني كيس واحد يكفي 8 نياق ،، اما المضغوط يكفي كيلوين ونصف لكل ناقه ،، حتى تتعود عليه ثم ابدأ في الزياده ،،





،،

[تركي القحطاني]

حمد الخلاوى انشهد انك ماقصرت الله يجزاك خير ويعطيك الصحه والعافيه

سعود الشاويش الله يعطيك العافيه

[حاصل اليامي]

واذا بغيت تشري ابل وماعندك خبره شف لك واحد من ربعك عنده خبر وخله يروح معك

كلام جميل ولا تنسا بعد وجود الغش المتفشي في الاسواق
نسال الله السلامة

[تركي القحطاني]

حمد اليامى

لو بيغش وش بيغشني فيه مثلا

[حاصل اليامي]

بالامس القريب ذهبت انا وصديق الى سوق الابل في الثمامة في الرياض ، كان صاحبي يرغب شراء خلفه بها من الحليب مايبيض وجهه امام ضيوفه حتى لو كانوا اثنين 00 المهم اننا وعلى مدار ثلاثة ايام لم نجد ظالتنا سواء في الحراج او الاسواق وقد برزت لدي العديد من المشاهد احببت ان اضعها امام الاعزاء القراء
أولا : دائما نحن ندعو الله بان يمن علينا بالغيث ولا يجعلنا من القانطين وفي نفس الوقت نغش ونكذب ونطلب الرزق والخير من الله وما شاهدته للاسف اثر في كثيرا 000فالشريطية في الحراج ان لم تبع لهم او لمن يريدونه افسدوا عليك البيعة من خلال ما يرددونه من حديث على المشترين لعيوب في الخلفة او الناقة واضطررت ان تبيع في النهاية بسعر اقل كثيرا مما طلبوا 0
الكثير من الاحواش تضم الكثير من الجمال وهي اما كلها طلوع واورام او مليئة بالقردن التي وصلت حتى الى انوفها ، او الجرب ، او حتى مرض القرع الذيلا تستدعى معالجته الا بمسحة من زيت الطعام فقط 0
الكثير من الابل وجدتها ساعات طويلة دون اكل فهي جائعة لايعلفها صاحبها الانادرا 0000
الخلفات التي تحضر الى الحراج يشترط صاحبها انها هادية ويمكن للطفل ان يحلبها وعندما يشتريها الشخص تتغير طباعها بعد ساعات بسبب تاثير الابر المسكنة عليها التي جعاتها بهذا الهدوء 0
يلجأ البعض الى رش الابل المجاهيم بلون اسود لكي تكون اكثر سوادا وجمالا ولا تكتشف ذلك الا بعد ايام
البعض يلجأ الى عدم نزع الشمالة من الخلفة لمدة يومين ومن ثم يجلبها الى السوق ليغش الاخرين ويقنعهم بوفرة حليبها ، والبعض الاخر يعطيها ابر للادرار 0
اذا كان هذا حال السوق فانني انصح من يريد الشراء ان يشتري من شخص يعرفه او صاحب ابل ولا يقع تحت رحمة الشريطية 000

منقول ...............

[حمد الخلاوي]

سعود الشايوش

مرحبا بك يالعتيبي طال عمرك على الطاعه المضغوط ان عندي احسن من الشعير الحب

والاسباب مثل ماقلت ان البل ماتاكل دمنها الي بالمراح الله يكرمك ويكرم القارين وانا مجربه

لكن اتقول انه خطير فيسعود والله ان قد ذا السنه الثالثه وابلي ماعطيها الا اياه ولاشافت شر

واول ماعطيتها المضغوط خلطته مع ماء علشان يلين لها وما تغاط

اما من ناحية الكيلو فنا ماعندي خبر كم تاكل الناقه من كيلو شعير لني احطه لها بالسطول

وانا ماعندي ناقه ولاناقتين انا عندي 50 خابط فيه منها خلفات ومعاشير و جلاب ودق ولا بعد

خصيت وحده عليها

اخيك
حمد ابن خالد

[تركي القحطاني]

حمد اليامى

ابشرك اني مافكرت اشتري من سوق الجنادريه

لو بشتري شريت من الموقع

-----------

[راشد العرق]

السلام عليكم ورحمة الله وبركاته

اخي العزيز بالنسبه للعلف اذا عندك خلفتين عطها برسيم وخل حوضها مليان 24ساعه ولا منه خطر
اما بالنسبه للشعير او المكعب فهذا اذا زاد منه خطر واذا نقص مافاد يعني خلفتين عطها بمقياس يعني عطها مقاس قوطي نيدو كبير واذا اخذت كم يوم وتعودت عليه ولا اثر عليها تقدر تزود الى واحد ونص او اثنين ولا تزود عشان ما يضرها

وبعض اهل المنايح اذا قدروا يخلون البرسيم متوفر على طول ما يعطونها شي غيره ولا يجي احسن من لبنها ولا فيه طعم علف لان علف الابل يبين في حليبها
وسلامتك