وش الدبره مع الحيل؟

[زايد التميمي]

السلام عليكم

بيض الله وجيهكم يالربع على نصايحكم وارشاداتكم لاهل البل وجعله ان شاءالله في موازين اعمالكم

انا عندي ناقتين حيل وطيبات بالحيل اهد البعير فيهن ويصد منهن ولا ادري وش السبب فقمت ووديتهن لبعير ثاني ونفس الشي يصد منهن...
والنياق طيبات ولاودي يروح علي الوقت ويحيلن السنه .. مع العلم اني اظربتهن ابرة يسره ويسرن وبركن قدام البعير مير البعير يتكرفها ثم يصد منها... وش الحل في رايكم؟؟

[محمد الوهبي التميمي]

ارحب يازيد
الابل تحتاج تنظيف
ولانظفتها اصبر عليها اسبوع بالضبط ولبسهن جنايب
وفك البعير عليها
والله يرزقك منها يارب
تقبل مروري

[ماجد ال سالم]

ارحب يا زايد
رش الناقتين بطيب على ظهرها وسنامها وفك البعير عليها
مجربه

[زايد التميمي]

الله يرحببك ياالوهبي ... ومرحباابك ياماجد
البل انا منظفها ومقطع منها ولابه فايده

ان شاءالله اني بلبسها الجنايب وبرشها بطيب والله يسوق لنا النصيب وياكم والمسلمين

الله يجزااكم خير

[مسعود العماري]

مرحبا بك

البعارين اللي عرضت عليهن هرشه او بعارين هداد

والحيل ما ينفع الا قعود

دور لك ثني ملقح وضرب عليه

وعسى الله يرزقك منها

[مبارك بن محمد]

للامانه

الطيب ياثر على الفحل ويدمن عليه بعدين ... وياثر على حاسه الشم عنده على حسب علمي لو زاد عليه الطيب في الابل ياللي يدوسها .. ولا يقبل بعدها غير الابل المطيبه بس ... ويمكن تتطور الحاله ويطالب بعطور فرنسيه .... من يدري .... زمول هالوقت تتشرط كثير ...

[عبدالرحمن التركي]

البكار هل تحتاج الى تنظيف في حالة عدم اللقاح .... رايكم أخواني
شكري مقدما"

[عبدالرحمن التركي]

يرفع مع التحيه

[منصور العدواني]

عبدالرحمن التركي

اكيد البكار تحتاج تنظيف

وخصوصا ابوغطيه ينتشر في البكار

[عبدالرحمن التركي]

مشكور اخوي منصور الله لا يهينك

[محمد الوهبي التميمي]

البكار هل تحتاج الى تنظيف في حالة عدم اللقاح .... رايكم أخواني
شكري مقدما"

تنبيه
غير صحيح الدخول على البكار
الإدخال على الرباع وطالع فقط