المساعد الشخصي الرقمي

مشاهدة النسخة كاملة : المشورة في البعير

سهيل بن سعيد
14 / 12 / 2011, 59 : 08 PM
مساكم الله بكل خير

المشوره تكفون
عندي بعير من اباعر السعدون كل ما منه طيب غير الضراب
اعطيه برسيم وشعير
خذينا من الشتاء نصيب والبعير هايج يطرح الناقه وينهشها بأنيابه
ويروح منها عيا يضرب وش الحل
من لديه علم أو شي يفيدني فيه الله يجزاكم كل خير
محمد الوهبي التميمي
14 / 12 / 2011, 11 : 10 PM
مرحبتين ياسهيل
بنشدك البعير قد اضرب عندك او عند راعيه الاول؟
واللي فهمت من موضوعك ان البعير هرش
وتأكد من البعير ان مافيه فضخ
على العموم اقصر الطعام
وشف لك بعير يضرب قدامه
ناصر المنيعي
14 / 12 / 2011, 23 : 11 PM
مرحبا ياابوسعيد
اول شي جبلك دكتور وقطع نيبانه
وربطه بعيد عن البل وسق عليه في مربطه
سهيل بن سعيد
15 / 12 / 2011, 30 : 07 AM
مرحبتين ياسهيل
بنشدك البعير قد اضرب عندك او عند راعيه الاول؟
واللي فهمت من موضوعك ان البعير هرش
وتأكد من البعير ان مافيه فضخ
على العموم اقصر الطعام
وشف لك بعير يضرب قدامه




مرحبى والله ومسهلا

البعير اضرب عند السعدون وعليه انتاج يهول بناته أجذعات ذالزمان
والبعير مهو كبير حيل البعير طيب وعمره طيب وسالم من كل شي لابه فضخ ولابه شي

عندي قعود على ولد تمام الي عند ابن عويفي الدوسري لقي اذا فكيته بين الابل تشوف البعير بياكل نفسه
ما قطع قلبه غير البرسيم يبي برسيم وبس
سهيل بن سعيد
15 / 12 / 2011, 32 : 07 AM
مرحبا ياابوسعيد
اول شي جبلك دكتور وقطع نيبانه
وربطه بعيد عن البل وسق عليه في مربطه


مرحبى ياناصر الله يحييك

الدكتور اليوم ان شاء الله يجي وينتف انيابه

شبك البعير خارج عن شبك الابل ونسوق عليه يطرح الناقه هم ينهشها بأنيابه ويروح عنها
ناصر المنيعي
15 / 12 / 2011, 50 : 08 PM
اقطع عنه البرسيم
وعلمنا عن علومه الله ايبارك فيه
بندر الرويلي
15 / 12 / 2011, 29 : 09 PM
خله على الشعير وبس ولا تعشية وعطنا علومة
عبداللطيف السعيدي
16 / 12 / 2011, 47 : 09 PM
هلابك سهيل ..
نفس الحالة اللي في بعيرك صارت على بعيري اليوم !!
يطرح الناقة ويجي فوقها ولايبرك عليها ،، كن فيه شي راده !!!
من ناحيتي بقصر عنه العلف شوي ،، وأوافيك بالنتايج ..
وأنت الله لايهينك علمنا وش صار عليك ،، نبي نستفيد من تجربتك ..
الله يوفق الجميع ..
عبدالرحمن بن هادي
16 / 12 / 2011, 32 : 10 PM
1 عطه شعير فقط وقف البرسيم ( لا تكثر له )
2 ابعده عن شبك البل (لا يقل عن 50 متر)
3 لا تذريه عن البرد
4- حاول يكون ضرابه الفجر بدري ( ضربه الفجر والله انه مبروكه )
5 اشتر له فايتمينات من البيطري ( سلينيوم + هـ )
الله يبارك لنا ولك
خالد الفالح
16 / 12 / 2011, 57 : 10 PM
مداخله تخص العلف وليس الحاله

البعير وقت الهداد ماله من الحشايش زود ولا فود ارخ له الشعير بس واقطع عنه الحشايش
عابد الحربي
17 / 12 / 2011, 20 : 01 PM
اقطع البرسيم عنه وعطه شعير وعلف وافي وبالليل خله ينام وسط البل لا تحطه بالشبك

الطريقه مجربه وبتشوف ما يسرك منه بعون اللهِ