وريم الناقه ...اللي تو ولدت ....؟؟؟؟

[بدر الذيابي]

السلام عليكم ورحمة لله وبركاته .....

مساكم الله بالخير .....اعضاء ومشرفي منتدى مزاين الاعزاء..

يالربع عندي ناقه تو ولدت امس.....واليوم ديدها مورم ..رايح كنه كوووره والحوار مايعرف يرضع ....يادوب على خفيف ......اضغط له تحاليل الناقه الين تزين له للرضاع ..

ومع ذالك مافيها حليب يروي ولدها ................اخواني ماهو الحل ..؟؟؟

وماهي افضل طريقه للتعامل مع ولدها ....خلال هذه المده ......


هل ابرة الوريم نافعه في هذه الحاله ؟؟؟
هل يكفي البنسلين فقط ؟؟؟؟
ام هل ادهن ديدها فقط ...؟؟؟



انا بحاجه لإبداء الرائ من الجميع .......وماخاب من استشار ..

تحياتي لكم جميعاً

[بدر النفيعي]

أرحب يا بدررر ،،

الله يبارك لك فيهاا يارب ويرزقك منها الرزق الحلال ،،

أنصحك أنك تعطيهاا أبرة بنسليـن + ماء وملح تغسل كامل الورم ومن ثم تدهنها بدهان حق الوريم كل يوم صبح إلين يخف الورم ،،

وهذه الحاله ترى دارجه خصوصا في هذه الأيـآم ،،


وأطلعنا على نتائجهاا ،،

وإنتظر الأخوان لربما يفيدوننا بشيء مجرب وجديد ،،

[محمد الوهبي التميمي]

مرحبتين يابدر
اولاً
١-إبرة الهيام كعلاج ووقايه
٢-مرهم ادرين مرتين باليوم
٣-قطع البرسيم في الشهر الاول والاكتفى بالتبن أعزك الله
٤-غسل الديد بالماء البارد في الصباح الباكر من كل يوم
٥-تنظيف الديد بشكل مستمر +والمسراح مهم لحالة ناقتك مع العلم ناقتك مهيب صغيره لابطن ولاسن
والله يشفيها عاجلاً غير اجل

[عبدالعزيز البريدي]

يا بدر عليك بالممشى

[وافي مليح بن موطان]

يابدر الاخوان ماقصرو

لكن عندي اضافه

شل ولدها في صندوق الجيب
ثم احلبها ورش ديسها
ومشها وخل ولدها في السيارة مشي فقط لا تعجلها اذا هي والد لها يوم ولا ثنين

[سيف القحطاني]

مثل ما ذكرو الاخوان

ولي اضافه بسيطه ابرة برومسين فايزر الامريكيه نافعه جداً باذن الله

40سم يوم وراء يوم

والماء خطير جداً جداً جداً للناقه الى توها ناتج اقطع عنها الماء لمدة يومين

وبتشوف النتائج لا تخاف خل الناقه تظمى ماعليها اخلاف

وحاول ان الناقه ما تشرب الماء الا كل يومين مره واحده فقط وقت الظهر

والله يشفي ناقتك وبشرنا بالنتائج الطيبه

[صالح المحمدي]

الاخوان ماقصروا
انا عندي ناقة ولدت قبل اسبوعين تقريبا
اول اسبوع صار ديسها تقول كورة
اعطيتها بنسلين لمدة ثلاثة ايام ولاتاكل الا تبن اكرمك الله
والعامل يغسل ديسها بماء بارد منقع فية مره وهذا اخذتها
من نصيحة واحد من الزملاء بالمنتدى
وكل يوم نمشيها وابشرك مااخذت اربعة ايام الا هي طيبة وبدا
ديسها يزين ولله الحمد
واسف على الاطالة

[بندر الرويلي]

مرحبتين يابدر
اولاً
1-إبرة الهيام كعلاج ووقايه
2-مرهم ادرين مرتين باليوم
3-قطع البرسيم في الشهر الاول والاكتفى بالتبن أعزك الله
4-غسل الديد بالماء البارد في الصباح الباكر من كل يوم
5-تنظيف الديد بشكل مستمر +والمسراح مهم لحالة ناقتك مع العلم ناقتك مهيب صغيره لابطن ولاسن
والله يشفيها عاجلاً غير اجل

كـــــلام ســـلـيـم ناقتك مخبش والسبب اكل البرسيم وقلت المسراح وما قصروا الأخوان وخاصة التميمي الله يعطيه العافيه عطاك كل شي بهذا الخصوص واحب اضيف على كلامة أبره بنسلين لمده 4 ايام بمقدار 20 سم
وللمعلومية أحذر من واقع تجربة من استخدام أبره الوريم هي دمار الديد وهلاك الحوار

[بدر الذيابي]

ياسلاااااام عليكم ......اراء صائبه من جميع الاخوان ....كم انا سعيد بطرح الاراء من اخوواني الاعزاء ....

تشكرون على حضوركم ,,,وعلى ردودكم الصائبه ....

تجربتي معها من امس اليا اليوم ......

اعطيتها امس ابرة بنسلين 25سم ...ودهنت ديدها بدهون ابيض ريحته مثل الفكس .......وقطعت عنها الاكل والشرب ......واليوم الصباح رش بالماء البارد ...والعصر كذالك .....
واليوم راحت تمشي بعيد عن العزبه من الصباح .......ويوم جات العصر واليا الورم خااااااااااف كثير وولدها يقدر يمسك الديد ويرضع...واعطيتها العصر بنسلين فقط..ورش بالماء البارد بدون دهن ديدها ............والناقه بنسبة 90% الوريم خااااف ...........


شكراً لمن شارك واعتقد جميع الاراء تساعد في مثل هالحاله ((لاكن فكره تشيل ولدها بالجيب وتخليها تمشئ ...فكره سديده ...بدون اي ابر او علااجات ..هي حل منطقي ))


تحياتي للجميع.........