كيف اعرف ان الناقه لقحه صحيح ؟

[مبارك الرويلي]

السلام عليكم ورحمة الله وبركاتة
يا اخواني انا عندي ناقة تقريبا نصوف او فوق النصوف ولدت ثلاث ولدات وكان وضعها زين بس الولادة الاخيرة جيتها وكانت والدة الحوار وبركت ونزل منها ماء كثير تقريبا 5 لتر من حياها من غير السلا الكلام هذا تقريبا قبل سنتين والحوار قعد شهرين ضعيف ومات وبعد تقريبا 9 شهور ضربها الجمل ولقحت وعلى اساس انها لقحة وكل ما تشوف الجمل تشول عنده ولاترغي لمدة سنه على هالحال وبعد سنه مابين لها بطن ولا درت و قبل كم يوم طرحها الجمل وضربها ومن بعدها شكيت بوضعها وجبت رجال يعرف يحس على الابل ويوم حس عليها قال هذي الناقه ما تلقح يقول فيه جرح داخل الرحم خايط وقاطب على القرن ورحت للبيطري وعلمته بالتفاصيل يقول ما فية شي اسمه ما تلقح وعطاني ابر تنظيف ومن بعد الابر صارت ما تشول الناقة عند الجمل وضربها وهالحين عشرت منه .... السؤال كيف اعرف انها هالمرة عشرت صحيح ومسكت ...... صحيح ان الارحام ما يعلم بها غير الله سبحانه بس ابغى اهل الخبرة يجاوبوني ؟


واسف على الاطاله ولو ان هذا القسم ما وضع الا لحل هذة المشاكل ........ وجزاكم الله الف خير

[وافي مليح بن موطان]

صعب التفريق بين المعشش والمعشر الا على الفحل هو باذن الله القادر على التفريق

فيه بعض العلامات قد يستدل بها على العشار
1- تغير شعرة المطية ( تشين مع العشار )
2- ارتخاء حياها
3- يشين وجه المطيه في بداية العشار
4- تستلطف وتستدق المطية بداية عشارها

وهذي العلامات عندي انا شخصيا اهم من المشاول

[زايد المنصوري]

حدها على البعير المعيد وخذ العلم الوكاد

[عادل الضويحي]

من العلامات ان الناقه يضمر جسمها وحياها يصغر وليس يرتخي واول ماتشوف الفحل جايها تمشي عن البل

[محمد ابو عدوة]

مرحبا يامبارك مثل ماقالوا الاخوان بس كل اسبوعين او عشرين ليل دخلها عاى البعير المهدود ماهو البعير المقرع اللي حتى اللقحه يضربها .

[بدر النفيعي]

بارك الله في الاخوان ما قصروا ،،

أتمنى أنك أستفدت من كلامهم ،،

تحياتي لك ،،

[مشبب بن حماد القحطاني]

العلامات مثل ماذكروا الاخوان جزاهم الله خير لكن أحيانا ماتكون داله عاللقاح ..لكن ركز على كلام أخوي محمد ابوعدوة

[عبدالرحمن التركي]

من العلامات ترفع راسها فوق ولا ترمش بعيونها اي ثابته .. ترفع الذيل وتوزر
توقّف عند الفحل ولا تهرب

[طلال الروقي]

صعب التفريق بين المعشش والمعشر الا على الفحل هو باذن الله القادر على التفريق

فيه بعض العلامات قد يستدل بها على العشار
1- تغير شعرة المطية ( تشين مع العشار )
2- ارتخاء حياها
3- يشين وجه المطيه في بداية العشار
4- تستلطف وتستدق المطية بداية عشارها

وهذي العلامات عندي انا شخصيا اهم من المشاول

كلام ميه ميه

[بندر الرويلي]

ما قصروا الاخوان لكن الفحل بيعلمك لقحة ولا لا

[مبارك الرويلي]

الله يعطيكم العافية ما قصرتو والله ونعم بكم وبهالمنتدى الطيب اللي استفدنا منه واجد وشكرا لكل واحد رد على تسألاتي
أذن العلم بعد الله عند بليهان

[حاتم العماري]

المعشش تشاول وتهرب من الفحل ولو وقفت بتشوفها حذره وعينها فيها التفاته للفحل وحركتها واجد واكثرهن تطلع برا من البل وتبعد لا شافت الفحل جاي للبل
اللقحه تشاول ولا تهرب ابد
بالاضافه لشين وبرة المعشر واحيانا تستلطف ويقل اكلها اول العشار
تقبل تحياتي

[مبارك الرويلي]

الاخ حاتم الله يجزاك بالخير ما قصرت على هالمعلومه والظاهر انها المأخوذة معشش لاكن والحل مع المعشش لأنها قبل ثلاث ايام قامت تشول يوم شافت الفحل وهربت عنه لاكن ماخلاها الجمل طرحها وضربها جننتني هالناقة

[وافي مليح بن موطان]

الفحل ابخص منا كلنا

لكن اذا كان هالموضوع تكرر اكثر من مرة دور خبير ينظف الناقه ويقطع عنها

[بندر الرويلي]

ما قصروا الاخوان كفو و وفوو .....
مالك الا يا راعي العليا توكل على الله وتشوفلك رجال خبير يدخل على الناقه ويفتش قراينها وينظف حياها من الصيد انا كانت عندي ناقه مثل ناقتك ويوم ادخلنا عليها لقينا قراينها منسدة ومحتقن الدم فيها وهذا اللي يخليها تشاول

[محمد الوهبي التميمي]

اذا تشابهت الامور عليك
اقرب بيطري يحلل الدم وفي ساعه تعرف وش الموضوع

[فهد الهوامله]

هذا الكلام الصحيح
من حاتم العمارى 100/100
المعشش تشاول وتهرب من الفحل ولو وقفت بتشوفها حذره وعينها فيها التفاته للفحل وحركتها واجد واكثرهن تطلع برا من البل وتبعد لا شافت الفحل جاي للبل
اللقحه تشاول ولا تهرب ابد
بالاضافه لشين وبرة المعشر واحيانا تستلطف ويقل اكلها اول العشار