حواره عمرها اسبوعين تموت فجاءه

[سلطان الودعاني]

جاء عندنا حواره واول ماجات طيبه وكنا نطعم امها رودس فقط وقاطع عنها الشعير والشوار الي انا مسميه بعد ذالحواره( السم ) فالحليب على الحيران الي توها مولوده وبعد اسبوعين عطيتها شعير وشوار وفعلن جاء الحواره اسهال عزكم الله وعطيناها بخاخ ووقف وبعد ثاني يوم قامت الحواره لجات تمشي يختل توازنها كانها بتطيح لين نعنز لها واتصلت على دكتور وقال عطها ابره طير 4 ملي فاللحم ولا لها ضرر ان فاد ولا ماضر لانها فيتامينات وعطيتها ايضا بنسلين فالفم 5 ملي بعد علشان ينشطها والله ماجاء بعد ساعه الا الحواره يكلمني الراعي انها ماتت

اول حاجه العوض من الله والحلال يتعوض دام الانفس طيبه لكن سوالي هل السبب ( ابرة الطير) هي السبب ولا ( الشعير والشوار ) .


ارجو من اهل الخبرة يفيدونا

[محمد الوهبي التميمي]

معوض خير ياسلطان
اللي ذبح الحواره هو البخاخ اللي مسك بطنها معد تخرج
الاسهال اسبابه الإفراط في الحليب
وعلاج الاسهال هو الماء البارد وتخفيف الحليب كعلاج اسعافي
او مضاد حيوي عن طريق الفم

[عبدالعزيز البريدي]

جعلها فدى راسك والله يعوضك بابرك منها

[بدر النفيعي]

معوض خير اخوي ،،

السبب ذكره لك أخوي محمد الوهبي ،،

[بندر الرويلي]

معوض خير ان شاء الله
كم ضغطة من بخاخ الذراق حطيت لها ؟
يااخوان انصحكم الضغاط لا يتعدى 3 ضغطات باليوم واذا انقطع الذراق اقطعه ( مجرب ) على طول لانه يخلي الحوار ينكتم وندخل في مشكله ثانيه
وللمعلومية الشعير حار على بطن الحوار والشوار يكثر الحليب والانتقال التدريجي للاعلاف مهم
تنظيف الديد بعد كل عطفه شي ضروري وعدم التنظيف يذرق ويذبح الحوار

[حمدان التميمي]

نعم ...

بخاخ الذراق ( الضغاط ) البني
خطيررر وذبح عندي حااشي العام اللي راح بسبب انه انكتم بعد العلاج بـ 3 ساعات

الله يجعله فادي اهله...

[بندر الرويلي]

معوض خير ان شاء الله يا حمدان
الله يرزقك خيراً من اللي راح

[ناصرمنصورالروقي]

الله يخلف عليك

[إبراهيم مزعل العتيبي]

الله يعوضك خير منها
لاكن انصحك اذا ولدت عندك ناقه خلها اقل شيء اسبوع لاتطعمها اي علف فكها على يدها
واذ كان ولابد عطها شويت شعير لاتعطيها برسيم يصير الحليب حار لين يجدل الحوار