استفسار لاهل الخبرة

[فهد بن عبداللطيف بن شديًد]

السلام عليكم ورحمة الله وبركاته,,,,
عندي استفسار يااخوان حول ناقة لقحة من ست شهور وقبل كم يوم شك فيها الراعي وعرضها على الفحل ولا شولت :( فالسؤال هنا هل عدم التشويل يعني انها كسرت لقاحها أو فيه حالات ما تشول الناقة ولقاحها باقي علما ان الناقة ما تهدر
ارجو من الاخوان الافادة ايضا عن جميع العلامات اللي تدل ان الناقة كسرت او فيخت ....... مشكورين ماجورين

[مسعود العماري]

الاخ/ فهد

هل انت تعرضها على الفحل اللي لقحت عليه؟

لان في بعض الحالات الناقة ماتشول من الفحل اللي عشرت عليه

وتسمى هذه الحالة عند البعض (( نايمه)) فلا بد انك تعرض على فحل آخر

وكذلك هل لاحظت بطن الناقة تغير ((كبر))

وتقول الناقة لها ست اشهر فاذا كنت تقصد بذلك

من تاريخ اضرابها فاحتمال انها كسرت بعد

شهر او شهرين من اضرابها ولا بان لك شي

واذا كانت من ستة اشهر وهي تشول

وما عاد شالت فإحتمالين:

1- الناقة اصعدت

2- او ان الناقة ان شاء الله انها معشر واعرضها على فحل ثاني

علما ان الوقت الحالي ما يفيدك شي من ناحية الاضراب

ولكن للاطمئنان وللاستعداد للفترة القادمة.

[فهد بن عبداللطيف بن شديًد]

الله يجزاك خير اخوي مسعود على تجاوبك السريع , والفحل اللي عرضتها عليه غير اللي اضربها والظاهر انه مثل ماتفضلت الناقة اصعدت لأنه الى فترة بسيطة وهي تشول .
ودي اعرف اخوي مسعود هدر الناقة وش يعني في موضوع اللقاح من عدمه

[محمد بن شريه المطيري]

بسم الله الرحمن الرحيم
اخوي الهدر شي عادي الابل تلعب مع بعضها واتهدر وشي عادي
ولا كن الناقه الي اتهدر وتبي تضرب الابل هذي مافيها عشار
والابل بوقت الصيف تصعد وتكسر من كثر الهجيج او الناقه اكسرت من وقت وانت ما لاحضت عليها

[فهد بن عبداللطيف بن شديًد]

جزاك الله خير اخوي محمد ,,,, والله لا يهينك على التوضيح