" اخذ من شوار الرجال دليل"

[مبارك المري]

الاخوان الكرام

اسعد الله اوقاتكم بكل خير

الموضوع يا طوال العمار ان عندي بعيرهديناه جذع وثني والسنة ذي رباع ولا الله كتب له يلقح

مع العلم انا كل سنة نعطية بودرة E-Selenium و مجموعة فيتامينات

ومؤخرا سوينا له تحليل وطلع معه قلة كبيرة في الحيوانات المنوية

والحقيقة اني ماني بعارف وش اسوي معه وخايف من الاطباء المتعيلمة اللي كل واحد منهم عنده راي

ارجو من الاخوان اللي عندهم خبرة في حالة مشابهة المساعدة والله يكتب لهم الاجر والعلم الغانم

وسؤال اخير عن هرمون الذكورة (التستسترون) هل بيفيده وهل له مضار على البعير

وتقبلوا شكري وتقديري لكل من بيمر على الموضوع حتى ولو ما كتب رد

[طلال الروقي]

يامرحبا يامبببببببببببارك ..
عسى الله يبارك لكم فيه بعيركم ويرفع عنه ما أصابه ..

جربت طال عمرك الحلبه والمريس ( عصير التمره )

[مبارك المري]

الله يرحب بك ياطلال
شاكر لك جدا على تفاعلك السريع ولاهي غريبة منك لانك في الحقيقة شعلة من النشاط والتفاعل في المنتدى

والله لايخلي منتدانا منك ومن امثالك

وماك لوى ماجربتها وياليت لو تعطيني تفاصيل اكثر اذا سبق وجربتها

[مسعود العماري]

مرحبا أبو هادي

فيه واحد من الربع صارت عنده الحالة في أثنين من البعارين الغالية

وعالجها له شخص وألقحت ولله الحمد وأخذ 5 آلاف على البعير

وبرسل لك الرقم وخذ من راسه

وأسأل الله عز وجل أن يمنحك من بعيرك ما يسرك

وتقبل أطيب وأرق التحايا

[محمد الوهبي التميمي]

مرحبا اخوي وصديقي مبارك المري
اعتقد ان الامر يحتاج لدقه اكثر في التشخيص
بعرض الحاله لأطباء يشار لهم بالبنان في مدينة الرياض وأخذ معلومات عن الحاله وإفادتك
والله لا يخيب رجاك يارب

[بدر النفيعي]

أرحب أخوي / مبارك المري ،،

ان شاء الله أن البعير طيب بإذن الله ،،

حاول أنك تعرض البعير على جامعة الملك فيصل أحسـن ،،

لان فيه قسم متخصص بهذا الشأن لعل نجد عندهم العلاج المناسب ،،

بإذن المولى تنتهي إجازتي وبسأل لك كيفية العلاج ،،


والاخوان ما قصروا كفوو ووفوو الله يبارك فيهم ،،

[خالد الفالح]

الحلبه مع العجين القم يومي
و
الثوم منقع في الماء كل 3 ايام

وفالك التوفيق

[وافي مليح بن موطان]

البصل جربه لمدة شهر كامل كل يوم حبتين كبار ولا تخليه يضرب

واذا اعشر البعير ادع لي بالبركه واحجز لي سراء :mwalat33:

[مبارك المري]

ابو محمد شاكر لك مرورك واهتمامك وفي انتظار رقم الرجال

وعسى الله ينفع به

[مبارك المري]

محمد التميمي الله يعطيك العافية على اهتمامك وبيض الله وجهك

وفي انتظار ارشاداتك ولا خلى ولاعدم

[مبارك المري]

بدر الحقيقة ان اول شي فكرت فيه هي الجامعة ولكن ماعندي خلفية عن مستوى العلاج فيها

باذن الله بيكون لي تواصل معك لمزيد من التفاصيل

[مبارك المري]

خالد الله يرحم والديك على النصيحة

والحقيقة انه ذكر لي وصفات شعبية كثيرة بحيث اني ضعت وش اجرب منها

اذا كان لك تجربة مع حالة مشابهة لبعيري ارجو التكرم بذكرها

ولك جزيل الشكر والتقدير

[مبارك المري]

وافي عز الله انك وافي واشكرك على رسالتك على الخاص

واكرر نفس الكلام اللي كتبنه لخالد

[خالد بن عصاي]

اخوي مبارك السلام عليكم

بعيرك يسرح مع البل اذا ما يسرح حاول كل يوم من الان يسرح لو لوحده


عطه الوصفة التالي وربي يرزقك منه الانتاج الطيب


حلبة مقدار نصف كوب شاي + رشاد نصف فنجال قهوة + حبة سوداء نصف ملعقة صغيره

( الصباح ) لقمة مع شعير او مكعب

( طبعا منقع في ماء - الماء خفيف فقط عشان يمسك خلطة القمة )



(الثوم او البصل ) لوحـده (العصر )


وفيه فيتامين مقوي عام للجسم يعطى مع الماء لمدة اسبوع كامل بحاول اجيب لك اسمه

وامنع البعير عن الضراب لمدة عشرين يوم

[ذيب بن علي]

جوع البعير من الصباح الى المغرب لا تعطيه شي ولا جا عقب المغرب عطة شعير وحلبه اخلطها مع بعض اما لقام او في الحوض اهم شي نفس كمية الشعير تحط حلبه وسو ذي الحركة لمدة سبعه ايام وخلال السبعه ايام لا يضرب وبعدها هد البعير ون شالله يلقح والسلام ...

[فهد الأحمد]

مرحبا يا بو هادي

حصلت قبل فترة مثل هذه الحالة في بعير عندنا علماً بأنه كان يلقح من أول
ثم حصل معه نوع من الضعف

صرنا طال عمرك .. نجيب الحلبه ونفوحها في ماء وبعد ما يبرد الماء نعطيها البعير يشربه على الريق وبشكل يومي

بالإضافة لقوم فيه فصين ثوم وملعقة صغيرة حلبه مجروشه.

والحمد لله القح البعير بعدها

وسلامتك.