القعود ... والرضاعه

[ممدوح احمد الشريف]

السلام عليكم ورحمة الله وبركاته


يا اخوان عندي قعود من انولد وحنا متحرصين عليه ومقللين عليه الحليب ومجوعين امه .. ويرضع كميه بسيطه من الحليب في اليوم

امه على التبن اكرمكم الله وحليبها قليل وفوق كذا نحلب عنه ونعزل امه الظهر

والحين عمر الحاشي خمسه اسابيع ... وش السواة نكمل على ما احنا عليه والا ندرج عليه زياده في الحليب ..

احس اني قربت اجيب العيد في القعود واذا ما تغذى زين بينكسر حاله ..

علما ان القعود يستاهل التعب والحرص ولا ودي اضره بجوع والا زيادة شبع

والله يرعاكم

[محمد الوهبي التميمي]

انتهت مرحلة الخطر
اشملها الصباح الباكر وابهلها العصر وشاركو الحوار في حليب امه
اقطع التبن وتدرجها بالبرسيم

[عبدالعزيز الفضلي]

اما طريقتي انا


اخليه مع امه حتى الظهر اذا صلى الظهر العامل في المفلا شمل البل

واذا صلينا المغرب حلبنا وخلينا واحد من الخلوف يرضعه الحوار

هل بعد طريقتي صحيحه او لا

اتمنى تعليق بعض اهل الخبره والاختصاص والتجربه

[مثيب محمد]

اما طريقتي انا


اخليه مع امه حتى الظهر اذا صلى الظهر العامل في المفلا شمل البل

واذا صلينا المغرب حلبنا وخلينا واحد من الخلوف يرضعه الحوار

هل بعد طريقتي صحيحه او لا

اتمنى تعليق بعض اهل الخبره والاختصاص والتجربه

اوافق اخونا عبدالعزيز الرأي وهي الطريقه الصحيحه انا كانت ابلك مجاهيم

[فهد الأحمد]

أخوي أبو أحمد

الجو ذالحين بارد والقعود ما يضره الحليب بإذن الله في هالعمر
لأن مرحلة الخطر تكون في الأسابيع الأولى
حالياً أنصح بأعطاء أمه شعير وعقبه برسيم كعشاء
والصبح أعطها برسيم ولكن بكميات متدرجة لأنها في حاجة البرسيم في الوقت الحالي
وعلى العموم ما أنصح بأنك تشمل أمه خله يرضع .. الجو بارد والحليب بيدفيه ويقوي عظمة ولا راح يضره بإذن الله

وسلامتكم

[فيصل الخييلي]

وعليكم السلام

ياهلابك اخوي ابواحمد

ماقصرو الاخوان انا مع كلام اخوي فهد الاحمد

بس بدال الشعير مكعب الوافي

[وافي مليح بن موطان]

يالربع كلامكم سليم لو هي ولاد صيف

في هالايام خلو الحيران مع امهاتها على طول لكن تحلب امه بعد كل رضعه على شان مايرد الحليب

الاسبوعين الاولات هي اهم مرحله في نمو الحوار

[بدر النفيعي]

أخوي أبو أحمد

الجو ذالحين بارد والقعود ما يضره الحليب بإذن الله في هالعمر
لأن مرحلة الخطر تكون في الأسابيع الأولى
حالياً أنصح بأعطاء أمه شعير وعقبه برسيم كعشاء
والصبح أعطها برسيم ولكن بكميات متدرجة لأنها في حاجة البرسيم في الوقت الحالي
وعلى العموم ما أنصح بأنك تشمل أمه خله يرضع .. الجو بارد والحليب بيدفيه ويقوي عظمة ولا راح يضره بإذن الله

وسلامتكم

نعم هذه هي الطريقه السليمه ،،

وكل الاخوان الي علقوا على الموضوع كلامهم أيضاً سليم ،،

[بندر الرويلي]

انا رايي خلها مع حوارها هالايام وعطها البرسيم تدريجياً واحلبها نظفها بعد كل عطفه واذا كثر حليبها شملها الساعه 10 الصبح ولا اعزل حوارها بالحوش وخلها برى تسرح وفك شمالتها الساعه 3 العصر واحلبها وخلها تمسى مع حوارها لليوم الثاني الساعه 10 الصبح واهم شي المسراح والتنظيف على شان ما يخبش ديسها من البرسيم