وش علة الحوار

[خالد بن عبدالعزيز]

السلام عليكم
ومسى الخير ياخوان
بفضل من الله ومنة انتجت ناقة
لكن حوارها ضعيف جداً وله فوق الثلاث ايام وهو مترخي ولا يثور
وفيه خمول وضعف عجيب وغريب ما ياقف الا معضد له ،،،
عطيته فيتامين لكن هو هو ما تغير شي ،،
كان احد عندة نصيحة نتمنى ما يبخل بها لنا ،،،
والله يبارك بالجميع ويجزاكم بلخير

[عالي العماري القرني]

كل عام و أنت بخير

جاني حوار مثل حالة حوارك

و صار كم يوم ما يرضع و لا يقوم إلا أقومه وأرضعه و بعدها إشتدت أعصابه وقام و رضع من حاله علما إني ما عطيته شي من الإبر أبد لا فيتامين ولا غيرها بس توكد إنك عوشته زين و كلها صبر أيام والله يبارك لك

[محمد الوهبي التميمي]

هلابك ياخالد
لاتعجل عليها بالادويه عليك بالرضاعة المتوازنة لها ولاكملة اسبوع بتشوفها طيبه

[خالد بن عصاي]

عندي حوار له شهر جاه مرض الجرب والقرافة في فمه وطاح عليه عمود على العيز ولا عاد يقوم الحوار لكن حاولت معه والله الشافي والمعافي

اول شي عطه حليب كل ثلاث ساعات مقدار ماء صحة ابو ريال ولاتنسى فيه حلمة طويلة وناعمة عشان هو اللي يرضع من الحلمة

وبعدين عطه ماء الحلبة الصباح والمساء (يعني حط الحلبة في ماء واشخلها وعطه الماء فقط لكن خلها تربص الحلبة وتنقع فالماء

ولاتعطيه الحليب وهو بارك لالالا قوم الحوار وشربه وهو واقف وان شاء الله ما قدامه إلا العافية

مع التحية

[فيصل الخييلي]

وعليكم السلام

يامرحبا ياخالد

عطها مضاد حيوي شراب

لاتستعجل على الحوار يمكن خمول ويروح

والله يشفي الحوار وإنشاء الله بطيب

وتقبل تحياتي

[خالد بن عبدالعزيز]

الله يجزاكم بلخير جميعاً
ووالله ان الواحد يفرح الى لقى اخوانه يتسابقون بالفزعه والطيب
والله لا يريكم مكروه في حلالكم وعيالكم
والله يدلنا واياكم لما فيه الخير

[خالد بن عبدالعزيز]

الله يجزاكم بلخير جميعاً
ووالله ان الواحد يفرح الى لقى اخوانه يتسابقون بالفزعه والطيب
والله لا يريكم مكروه في حلالكم وعيالكم
والله يدلنا واياكم لما فيه الخير

[خالد بن عبدالعزيز]

اشكر الجميع على تعاونه
ونبلغكم ان الحوار ودع عسى الله يخلف بالبركة
والله لا يريكم مكروه بحلالكم وعيالكم ومالكم

[وليد بن إجليغم]

الله يعوّضك بخيرٍ منه ولعلّ بالأمر خيرة وان شاء الله تلقح على بعيرٍ طيب