عاجل البكره تخرج دم

[سعد بن ربيع]

عندي بكره لها ثلاث ايام مولوده اليوم تذرق مويه حمراء اللي عندي خبره اوطريقة علاج
لايخليني جعل الله مايخليه ويجزاه خير

[عيدالمنصورى]

لاتستعجل على البكره اصبر عليها
يمكن مزع ويروح اذا كان رضاعها طبيعي

[سعد بن ربيع]

ياعيد لاهنت
بس البكره طايحه ماهيب يم الرضاع
والاسهال مستمر دم معاد فيها حيل تقوم

[فيصل الخييلي]

طيب عطها مضاد حيوي شراب

ليكون تخلي البكره ترضع الظهر ترى ماهي زينه رضعت الظهر تذرق الحوار تكرمون

ولاتخلي الحواره ترضع من ١١ ظهراً الى ٤عصراً

واتمنى أني افدتك

[سطام الخالدي]

أخوي سعد
عاجل وبسرعة
إلين يفيدونك الاخوان الاكثر خبرة
هذا انشاء الله بيفيدها
اطبخ كمون ويانسون وصفه وخله لين يبرد الين يصير دافي وغره في فمها
(ربع فنجال كمون مع ربع فنجال يانسون والماء كثر علبة الماء ابو ريال)
ولا تخليها من الماء
والله يشفيها

[سعد بن ربيع]

لاهنت يافيصل غطلتي خليتها الظهر ترضع

لاهنت ياسطام

استعملت الكمون لكن خلطته مع لبن مع البخاخ اللي ضد الاسهال في قارورة مويه صغيره والنافع الله والشافي

واللحين اشوى من قبل الحمدالله

[وافي مليح بن موطان]

اخوي سعد الجو الان بارد

ولا يضر الحوار هالايام الرضاعه الضهر ابد ابد

ولا تردها عن امها ان كان تبي شوري

لايجتمع جوع ومرض على حوارك

مع هالراي وخصوصا الماء الماء للحوار الي يذرق
(ربع فنجال كمون مع ربع فنجال يانسون والماء كثر علبة الماء ابو ريال)
ولا تخليها من الماء

[محمد الوهبي التميمي]

البكره تحتاج لمضاد حيوي
ولاتخليها على هالوضع استشارت الدكتور وصرف العلاج ضروري

[سمير بن محمد]

في ابر في الصيدليه مجربه ولا يحضرني اسمها تلقاها في الصيدليه انا مجربها العام ولله الحمد جابت نتيجه طيبه وعطها ماء بارد .

[محمد سالم اليامي]

علبتين زبادي مخلوطه مع شوي ماء حطها في مرضعه وترضعها ووسع شوي خرم المرضعه وان شاء الله ما تشوف شر وكرر عليها كل ساعه والا ساعتين اهم شي لا تخليها من منها ولا هو لازم تخلصها كلها ونضف ديد امها يمكن السبب حليب الام تاكد من نظافته وانه ما هو دم والا صديد

[عيدالمنصورى]

وصفك للحاله كان ناقص ياسعد لم
تعطنا المعلومه كامله ولا الومك

[ناصر بن جاسر]

اخوي سعد

عان علت بكرتك في حوارتن ما تت وقعودن عندي عمره الحين اربع ايام وجاه سهال مع دم

المراد اول ما جاء مزين منه ويرضع من نفسه ويمشي وشان ثاني يوم

وكلمت شاب عنده علوم وامراض البل والحيران ونصحني

اجيب له عصار من البيطري اسمه سكوريان سبع عصرات في الصبح ومثلها بالمساء

واكويه بمطرق صغير بالعرض من فوق ذكره

اللهم لك الحمد ما جاء تالي النهار الا وهو يبرك وركز راسه

اهم ما في الامر اني كنت ارضعه يومه طايح رضعه خفيفه ما اشبعه

خوفن يشبع وانا مدري عنه ويموت

هذا ما حبيت اوضحه لك

[وليد بن إجليغم]

عطها علاج المعوي شراب بأسرع وقت وعسى الله يشفيها.

[وليد بن إجليغم]

علوم البكرة يا سعد