وش رايكم يالربع

[سعود الغبيوي]

عرض علي واحد هالبكرة مع امها وش رايكم فيها وكم اعطيه فيها مع امها









http://im11.gulfup.com/2011-10-31/1320057506241.jpg (http://www.gulfup.com/show/Xrgqyjftmusgkc)

[طلال الروقي]

ينقل للقسم المختص

[سعود الغبيوي]

يالربع عطوني رايكم لو مااعجبتكم

[فيصل الخييلي]

يامرحبا ياسعود

اولاً البكره ماصورتها كلها وامها بعد

البكره رقبتها زينه وراسها وسط ولاكن زقما وهذا الي في الصوره

[وافي مليح بن موطان]

انت ماعطيتنا علوم الناقه

السن - الهداوة - الحليب - سالمه من العيوب وصورة الناقه

على شان يقدرون الاخوان يعلمونك بالقيمه

اما البكرة لا تحسبها الا قصب

[مساعد العتيبي]

اذا كانه على البكره

فالنظرة من الصوره ذبيــحه ..

[جابر ابوشهاب]

ارحب يا سعوود

البكره عاااديه جداااا والواضح من امها عمرها فقط والعمر ما فيه كلام القارب منتل واسناد

وشكرا

[سعود الغبيوي]

العلم كله على البكرة امها ماهي في الحسبه
البكره جدها ابو ابوها الغاشم تبون نحتريها لين تجي مفروده

[سعود الغبيوي]

انت ماعطيتنا علوم الناقه

السن - الهداوة - الحليب - سالمه من العيوب وصورة الناقه

على شان يقدرون الاخوان يعلمونك بالقيمه

اما البكرة لا تحسبها الا قصب
ابن موطان البكره وامها شريتها وتوكلت على الله
لان من جابها لي سطام المغيري ان كان تعرفه
الناقه سالمه من العيوب وهداوه وحليبها وسط
وانا اهتمامي بالبكرة
باقي اعرف انت ابن موطان الدماسي والا اسم على اسم

[مشعل الشويش]

... من المعلـوم : أن طلب الرأي في مطيـه من عضو لايملكها ممنـوع لإسبابً لاتخفى على الجميـع ...

............

ولكن بمـا أن الحواره ملكك وعلى حظك :

وسأكون صريح معك أخي الكريـم

فـ والله مايشريها القناي !

ولاهيب عاديـه .. بل مقصـب من أدنى مستوى ولن أقول رديّه لن عطايا الله مافيها رديـه ...

ولكن نصيحة أخو لاتحطها وسط ذودك نهائياً ..

ماهيب طالعه لامفروده ولاحقه ولا راح تطلع أبد هالبكره لو أن ابوها الغاشم وأمها حشاره !

فـ أنصح الجميـع القناي يدور البكره الموجهه اللي فيها رق وحلا ووجهً ظافي ولايلتفت للشائعات .

ماينفع السـاس دون الراس خصوصاً فالبكره ياأخوانـي ...

.......

أمـا القيمـه قيمـة البكره 3000 ريال

وامها ماشفتهاااا .

[وافي مليح بن موطان]

ابن موطان البكره وامها شريتها وتوكلت على الله
لان من جابها لي سطام المغيري ان كان تعرفه
الناقه سالمه من العيوب وهداوه وحليبها وسط
وانا اهتمامي بالبكرة
باقي اعرف انت ابن موطان الدماسي والا اسم على اسم


الله يبارك لك فيها وفي امها وانا اخوك

وسطام المغيري بسلامته معرفه ولا ادري وش قصدك بسؤالك تعرفه ؟ قصدك معنا في المنتدى ؟

ومالك لوى مانيب دماسي ولا خبرة في الدماسين ابن موطان !!؟

وعلى العموم الله يبارك لك وانا اخوك في حلالك

[احمد الشهراني]

اقول ان القارب زين

[مشبب بن حماد القحطاني]

الله يرزقك بأطيب منها وانا خوك البكره عاديه جدا وماأشوف بها زين لكن سنها بعد صغير وصعب نقطع بها الكلام من الآن ....من يدري لعل شيء يتبدل.....عسى يرزقك

[سعود الغبيوي]

شكرا لكم الله لايهينكم على الردود الطيبه

[برجس محمد البرجس]

اقول ان القارب زين


اي قااارب !!!!!!!!
لايكون قصدك الغاااارب

[سعود الغبيوي]

يقصد غاربها مير من العجلة كتبها قارب