وش علة الناقة ؟؟؟؟

[نايف العجمي]

مساكم اللله بالخير يالربع عندي ناقة جاها مرض واشك انه هيام الناقة اذا تعلفت شوي صدت من اماتها شوي وبدت ترفع راسها وتنزله وتمد رقبتها تيبي تطرش (تكرمون) ويطلع نوع زبدو من فمها وديها فيه خباش يروح ويجي وله اكثر من اسبوعين ماراح وحالها انقضى وابي معرفتكم وخبرتكم وش هالمرض والناقه ماطلع فيها نفاخ عشان اجزم انه هيام وبانتظار ردكم لاهنتوا ودمتم بخير

[بدر النفيعي]

..زي ما ذكرت أخوي أقرب مالها الطيررر ،،

ولكن قبل شيك على حلق الناقة يمكن فيها شيء ؟؟

وإنتظر رأي الاخوان لربما يفيدونك أكثـرر ،،

[وافي مليح بن موطان]

ناقتك بلاها والله اعلم في حلقها او في فمها

استبعد الهيام والطير ماهذي باعراضها

اعتقد ان اعراض ناقتك قد حصلت في ناقه عند الاخ محمد الوهبي التميمي

ولها كوية يفيدك عنها ابو صالح

[محمد سالم اليامي]

ناقتك فيها دود في البطن ومارية صحة كلامي انها تاكل في الشعير والمكعب ولا يخالف معها لكن اذا اكلت البرسيم زاعت جرتها ولاهي تاكل فيه بزياده
عطها حبوب الدود المركزه اذا ما هي لقحه وكرر بعد اسبوعين اما اذا هي لقحه عطها الشراب وككر عليه بعد اسبوعين

[عبدالله ال حرب]

على ما اعتقد والله اعلم ان في حلقها شي وهذا هو اللي يزبد في فمها ويخليها ترفع راسها وتنزله وهذا الشي صار مع بكره عندي بس الحمدلله اكتشفته في نفس اليوم ولقيته غصن شجره

[فيصل الخييلي]

ناقتك في حلقها شي أكيد وكل الكلام الي انت قلت يدل ان في حلقها شي

عطها زيت زيتون وعسل صبه في حلقها

ناقتك لقحها

والله يشفي ناقتك

[محمد الوهبي التميمي]

ناقتك علاجها بعد الله معروف يانايف وسهل جداً
اولا محل ابلك وين ؟
وابشر بالشور الطيب انتظر إجابتك

[نايف العجمي]

مشكور ياخواني على تفاعلكم والناقة عشرا بس حنا عطيناها علاج التهابات للمعدة والحلق ولا نفع والبل من دون هجرة سعد علي اليمين وانت مع خط الدمام السريع والله يحييك يامحمد والجميع اذا بتشرفونا وعطنا العلاج لاهنت اذا متاكد منه ومشكورين جميعا

[محمد الفاضل]

ياناااااااايف
ناقتك مافيها الا العافيه
المشكله في العلف الناقه كل ماتاكل العلف( تغص)
غير نوع العلف لها والحاله هذي تحصل عندي كثير
بعض البل معها مشكله من بعض العلف اذا اكلته غصت
وقامت ترفع رقبتها وتنزلها ويطلع من ثمها زبد وعلف مطحون
لين تاخذ لها قرابة الربع ساعه وفي ذا الوقت يكون العلف خلص
وبكذا تضعف الناقه

[محمد الوهبي التميمي]

اطلع على هالرابط يانايف واي استفسار انا جاهز
http://www.mzayan.com/vb/showthread.php?t=38601

[محمد مسلى الرشيدى]

مساكم اللله بالخير يالربع عندي ناقة جاها مرض واشك انه هيام الناقة اذا تعلفت شوي صدت من اماتها شوي وبدت ترفع راسها وتنزله وتمد رقبتها تيبي تطرش (تكرمون) ويطلع نوع زبدو من فمها وديها فيه خباش يروح ويجي وله اكثر من اسبوعين ماراح وحالها انقضى وابي معرفتكم وخبرتكم وش هالمرض والناقه ماطلع فيها نفاخ عشان اجزم انه هيام وبانتظار ردكم لاهنتوا ودمتم بخير
الناقة فيها نحاز ابرتين جيرموسين وتطيب وعطها حبوب الدود وبعد اسبوعين اعد حبوب الدود ونشالله بعد يومين تشوف الفرق

[نايف العجمي]

امس عقلنا الناقه بنعطيها علاج ضد الالتهابات في البلعوم والمعدهحصلنا في اخر لسانها جروح زي جروح الحروق اكبر من اظفر الاصبع ؟؟؟ وش السبب وهل هذا من اعراض الريشة ؟