متى يفرد الحاشي عن امه ياهل المعرفه والخبره

[أحمد بن عبيد الحميد]

السلام عليكم ورحمة الله وبركاتة

الله يبيض وجوهكم عندي سؤال عن الحاشي متى يفرد عن امه وكيف هي طريقة فرده عن امه وهل هذه الطريقه فيها فائده للحاشي وامه ,,, واشكركم مقدما,,,

[حاتم العماري]

الحاشي ..المزيون خله مع امه سنه
الحاشي المقصب والعادي من 6-7 شهور وافرده على البرسيم والمكعب اوالشعير والماء الناقع
تقبل تحياتي

[محمد الوهبي التميمي]

اذا هب بعيرك اعزل الحاشي وأكرمه شرط عمره من فوق السبع شهور

[محمد ابو عدوة]

مرحبا يابن عبيد ويعزل الحوار عن امه في نهاية سبتمبر للقصب والبكار المقنوي حتى تستعد امه للضراب وقت الهياج اول البراد والحاشي الغالي يكمل سنه .

[ناصر عيسى المنصوري]

الاخوان ماقصروا
بس انا بضيف ملاحظه : طريقة الفرد خل الحاشي في شبك وامه في شبك وشملها ولايسرح معاها الا مشمله
وخف عنها الماء والطعام حتى تغزر لين اتشص اي ينشف ديدها من الماء واللبن

وانتبه انكان الحاشي قعود لاتحطه في شبك معه اعجوم يكسرنه
حطه مع حشوان سناينه او حقايق

[ناصر الجرباء]

السلام عليكم فيه طريقة مجربها انا مع الحشو المفرود من امه ، وكيف نحافض على صحته ولايكسر بعد الفطام من الحليب وخصوصا الحشوان المقاني ، وهي طبعا ان يتم فطم الحاشي بعد 6 اشهر ، وكما ذكر ان يكون البرسيم متواجد امام الحاشي طوال اليوم ، ويتم تعليفها بالمكعب والشعير ويضاف اليه بودرة بدائل الحليب (حليب الطلوق) الكيس 25 ك تقريبا سعره 200 ريال ، كل حاشي من 3 الى 4 بيالات بالتدريج ، بدون ان يذوب في الماء وتجدون مايسركم الحاشي تزين حالته وكانه يرضع امه واحسن.

[عبدالله حمد العتيبي]

الحاشي ..المزيون خله مع امه سنه
الحاشي المقصب والعادي من 6-7 شهور وافرده على البرسيم والمكعب اوالشعير والماء الناقع
تقبل تحياتي

كـــــــــلام سلـــــــيم

[عبدالعزيز البريدي]

يا الربع والي عنده حوارة مزيونه عمرها من 7-8 شهور

ومجبور يفردها وش السواة

[مشعل الشويش]

ماقصروا الاخوان .

ومثل ماقالوا الحاشي الطيّب خله يكمّل سنـه عشان يطلع ويزين .

والمقصب او العادي من 7 شهور وحول اقل من 7 شهـور لاتفرده عن امه .

وانا ماانصح انه يسرح مع امه حتى ولو كانت مشمّله .

.....

وبخصوص سؤال الاخ : عبدالعزيز .

كانك مجبور على فردها عن أمها دوّر لك ناقةً تلعه وطويله وضيّر الحواره عليهاا .

هذا كانك مجبور جداً أنك تفردهاا مع ان الضيار في هالمرحله صعب شوي ..

ولكن مافيه حل غير الضيار كانك تبي ( البيـع ) !

انا فردت لي حوارً طيّب جداً عن امـه بعد 6 اشهر لني بعت أمه واكرمته ولاخليت عليه قاصر ولكن انكسرت وبرته وشان اكثر من شهر رغم اني ماخليت عليه قاصر

ولكن بعد الشهر جاء فيه صوره ولله الحمـد ...

[فهد بن عطاالله المطيري]

هلا بك اخ احمد

شف العادة يفرد الحاشي بعد ان يظهر سهيل والنجوم التابعه له فمن المعروف ان سهيل ونجومه التابعه له وعددها 52 يوم

يبدأ هياج البعارين ويبدأ الضراب ... لذلك يبدأ االبدو وأهل العرف في فرد الحشوان عن امهاتهن بغض النظر عن عمرها لو كان الحاشي اولاده اواخر الشتا

ومن ناحية كيف يتم عزل الحوار ... تكون بتشميل امه وبعد اربع ايام يتم تنظيف ديد الام من الحليب حتى اذا غرزت وولدت السنه اللي بعدها ما يعزز ديدها يصير عزوز

شمل وخله يرضع وكل خمس ايام مره لمدة شهر ونصف تقريبا وبعدها ابعده عن امه بالشماله

وراح يعتمد على الاكل بالتدريج وينسا امه
دمتم بخير

[حاتم العماري]

الحواره المزيونه المجبور على فردها
شف لك ناقه شبب طويله ملاقي مافيها من الزين الا طولها وديدها..
واول ماتلد اسحب ولدها بدون ماتشوفه ولا تشمه ودخل الحواره مفقره ومبلمه وامسحها بسلا الناقه/اكرمك الله
وبتركبها باذن الله
وتراك لو عزلتها حسب ماقلت لك في المشاركه السابقه بتشين ايام وترجع للزين اهم شي البوفيه المفتوح
تقبل تحياتي

[طلال بن عقاب]

شباب ماخلو شي الله يعطيهم العافية

[سعدبن سالم]

بعد سبع شهور اذا اكرمته ماايضره بس بعضهم يعزل الحوار ولا يكرمه هذي حيران فاخره تنشرا وتباع بدون امهاتها ماتنقص اذا راعيها يكرمها حتى الدق من مفاريد وحقايق لازم تعزل وتطعم بلحالها

[منير البقمي]

عادةً الحشو تفرد مع طلوع سهيل

وكل وظرفة اذا قيه شي يجبرك على فردها او خلها ترضع خاصةً البكرة او القعود الفحل

[عبدالعزيز البقمي]

المفرود يطلق عليه مفرود بعد مرور سنه عليه

ان كان الحوار طيب سوا بكره او قعود خله افرده بعمر سنه

وان كان غير ذلك انت وسواتك معه

اما عن طريقة الفرد

ان كانت ابلك تسرح شمل امه وخله يفلي مع الابل

ومعاد عليه ياكل مع البل ويشرب معها

..

[بركات هنيدي السلمي]

للاهل الخبره عندي حشيان وبكار فردتهن عن امهاتهن وحطيتهن بشبك واكرمتهن حالهن زان الحمدالله
وصار لهن بالشبك شهرين والنياق ضربتهتن بعضهن شدت لقاح وعندي رحيل لازم افك الحشو مع امهاتهن
هل يوجد تاثير على النياق من الحشو وهل من الممكن ان يرجع الحاشي ويرضع امه بعد هالفتره ؟

[طلال الروقي]

احسن حل وانا اخووووك شمل النياق ،،
احتمال ان بعض الحشو ترضع امهاتها
وامكن ترجع وتعطف على ولدها
انا قبل سنيات فطمت مفردوة عن امها ثلاث شهور
وفكيتها على امها وارضعتهااااا بعد هالمده .

[بركات هنيدي السلمي]

طلال الروقي
بارك الله فيك ,,,
وهذا اللي انا خايف منه وكلامك عين العقل والصواب

[فلاح العقيلي]

البل فيها طبايع مختلفة

ولا نستطيع نجعل قاعدة عامة لكل ابل العالم

وهي ينطبق عليها ما ينطبق على بني آدم

بالنسبة للنياق اللي تعطف بعد شبك الحوار أو تترك الحاشي يمصمص على كيفه
لابد من الشماله
وبعض البل من يوم تفرد الحاشي يومين وتغرز وتطرد الحاشي فهي أطباع

تجربة صحيبن لي يدق الناقة ابرة هيام بعد العزل ويقول انه ينشف الحليب ويبعد الوريم ويزين الناقة



....
بالنسبة للي يبي يضير الحاشي ما أزيد عن الأخوة إلا لابد إن الحاشي يجوع ولا يلقى إلا الديس


...


بالنسبة للي عنده بكرة غالية وصغيرة عن الفرد


.....

يحط أي حليب مع طحين بالموية يومياً ويغنيها عن حليب أمها
طبعاً مع العلف والشبك
ولو حطيت سكر معه يكون أفضل



......
..
.



ومرحبا