تحميل اللقحه في الدينا .. هل من خطر؟

[فهد العضياني]

السلام عليكم ورحمة الله وبركاته


مساكم الله بالخير جميع

ياخوان عندي نياق ابغا اغير مكانها ولازم احملها في دينا والبل فيها لقحه لها عشره شهور هل فيه خطر عليها لا قدر الله

والا انتظر لين تولد وانقلها .


وشاكر لكم الافاده مقدماً

[حاتم العزيزي]

اذا لابد من تحميلها دور ونش هدروليك .. الونش السلسله ماهو طيب لها

[صالح بن حسن البقمي]

ماانصح بالونش لانها يتلها تل السلسه اطيب

[فهد العضياني]

احترنا معكم
الهيدروليك احسن والا السلسله

[صالح بن حسن البقمي]

انا قلت وجهة نظري واهل الخبره ادرى مني وابلك لقحات مبطي وانشالله ماعليها خوف الله يوفقك

[فهد الثاقب]

يارجال معاد الا شهرين اصبر والله يرزقك من خيرهن

[خلف المطيري]

توكل على الله وان شاء الله مايصير الا
كل خيرر

[مشعل الشويش]

يارجال حمّل ابلك في اي نوع متيسر من الدنان ودوّر الرجال اللي يحرص عليهاا فالممشى وفالطرح

حنا نشيل لقحات بعضها ملاقي

ماعليها خوف بإذن الله

[وافي مليح بن موطان]

لا بالله عليك بالسلسلة اخير من الهودرليك واجد

وابلك باذن الله مايضرها الشيل

الشيل شر على المعشر

[بندر بن معيض المطيري]

نعم السلسله ابرك واجد

وان شاء الله مايضرها الشيل

[فهد العضياني]

الله يعطيكم العافيه على المشاركه والإيضاح

[ممدوح احمد الشريف]

السلسله افضل بواجد ... واللقحه مايضرها التحميل الا اذا كانت معها بديه

شريت لي ناقه من ابل ال الصباح ساملينها لقحه من شان البديه .. وشريتها وبعد ما نزلتها في العزبه بكم يوم نزفت حتى ماتت الله يعوضنا عنها بخير منها

واذا اللقحات غوالي استخر عن التحميل وكل تاخيره فيها خيره

[بندر الرويلي]

الهيدرلك (الونش) افضل اذا راعي الونش خبير مو عليمي (مجرب) هذا من وجه نظري والله اعلم

[طلال بن عقاب]

الامور طيبة حملها والي الله كاتبة بصير انا حملت ناقة ماخض من السعودية إلي الكويت وسلمت

[صدام اليامي]

الهيدروليك والسلسلة سوا
أهم شي في طريقة يعرفها بعض أصحاب الدينات وهي (التفخيذ)
يقوم يتحميلها وشدها ورفعها عن طريق الفخذ وانشاءالله مايجيها خلاف .
تحيااااااااااااااتي لللللللللللللللللللللللللجميع

[محمد بن صنهات]

مرحبا يافهد
حملها وتوكل على الله وماهيب شايفه شر


ومعلووومه هاااامه جدآآآ
اذا بتحمل العصر مثلآ لا تذوق البل شي من الصباح لا ماء ولا طعام
وافضل السلسله على الهيدروليك لانه يرفعها متر ويدفها وتعطيها حريه الحركه
اما الهيدروليك فهو سريع لاكن ماكل واحد يعرف له وان عسرها الفقار مايمديها تحرك ولا يتعدل واكثر الضلاع منه
وموفق ان شاء الله

[فهد الأحمد]

مرحبا يافهد



حملها وتوكل على الله وماهيب شايفه شر


ومعلووومه هاااامه جدآآآ
اذا بتحمل العصر مثلآ لا تذوق البل شي من الصباح لا ماء ولا طعام
وافضل السلسله على الهيدروليك لانه يرفعها متر ويدفها وتعطيها حريه الحركه
اما الهيدروليك فهو سريع لاكن ماكل واحد يعرف له وان عسرها الفقار مايمديها تحرك ولا يتعدل واكثر الضلاع منه

وموفق ان شاء الله



مع رأي أخوي محمد

[فهد العضياني]

مشككورين على المشاركه والنصائح الطيبه

والله لا يريكم مكروه في عيالكم وحلالكم

[عبدالعزيز ساعد]

يا اخوي فهد ان شاء الله ما عليهن خلاف بس اهم شي الشيل الراكد,,,,,,,, واذا حملتهن ارخ الفقار عليهن شوي بحيث تراح الناقه في بروكها في الدنه واذاجيت تنزل شده زي قبل يوم حملتها,,,, والله يحفظهن من كل شر