الفزعه فحل البل وجعان

[ناصرمنصورالروقي]

السلام عليكم
ياربع عندي البعير فحل البل يخطفه مرض ينفخ بطنه ويترك العلف والماء ويعذر عن البل
يقعد في المراح مايسرح يومين ثلاثة ثم ينفش بطنه ويصحصح ثم ياكل العلف بس على خفيف
مع العلم انه اول ملاحظة علية في بداية المرض كان يرفع راسه ويمس رقبته فوق كن صايبة طير
ولا يداني لمس لهاته كويناه عن الريشية وتحسن من مس رقبته عطيناه حبوب دود ثم شراب دود
ثم طب شعبي خلطات حلبة وكربيت ثم زيت عافية ثم ابرة هيام مع انه لايشرب ماء بزيادة عيونه لاتدمع
لايوجد به انتفاخات حول رقبته ولا حول بطنة اقصد انتفاخات خارجية .له حول 4 اشهرتقريباً وحاله ينزل
لاهنتُ يالربع من قد مرة عليه الحالة لاينسانا وله دعوة بظهر الغيب

[بدر النفيعي]

حياك الله أخوي ،،

أسئل الله أن لا يريك مكروه وأن يجعلها آخر الاضرار ،،

أول / حالة البعير أقرب ما نقدر نقول عنه أنه { طير } وإذا تبي تتأكد أكثر حاول تعمل للبعير تحاليـل وأرسل لي النتاائج حتى نقدر نعرضهاا للأطباء ،،

تحياتي لك ،،

[بندر الرويلي]

ما راح يقصرون الاخوان
لكن رايي انك تحلله تحليل شامل وتعرض التحاليل على كم بيطري وشف وش تتفق ارائهم عليه
واتوقع انه ماكله شي ياكيس بلاستيك ياشي من هالقبيل
الله يشفيه ان شاء الله

[ناصرمنصورالروقي]

جزاكم الله خير اخواني
بس المشكلة ماحولي مختبرات عساس اكشف عليه
موقعي غرب عفيف 80 /كلم .ولاحولنا مراكز بيطرية تعمل تحاليل
الله المستعان وش الدبره يالربع

[محمد الوهبي التميمي]

مرحبتين ابو منصور ويعل البعير مايشوف شر
اولا
ابومنصور بسئلك عن طعام البعير وشهو بالضبط

الشي الثاني موضوع المختبر حله عندي
طلع دكتور من اقرب مكان لك وخله يجيب عبوات فاضيه للدم وخل يسحب من الوريد وعبى لك عبوتين
وحط العبوات بكيس الثلج العادي
واقرب واحد من ربعك جاي لرياض عطه العبوات وانا بستقبله عند نقطة تفتيش اللزديه
وبرتب الموضوع مع المختبر
يوم واحد ومرسلين علاجه لك ياابومنصور
وتراها سهله جداً انتظر تواجدك

[ناصرمنصورالروقي]

ياهلا اخوي محمد علمك غانم
وبيض وجهك والله يبارك لك في حلالك ومالك
بنسبة للعلف مكعب الصوامع من يوم اطعمته وهو شايلن شره
استمرينا عليه لين توفر الشعير بعد العيد
اما بنسبه لتحليل وسحب الدم باخذ بشورك وجيب الصيدلي خلال
اليومين ذي وبرد لك خبر لاهنت يامحمد

[محمد الوهبي التميمي]

طيب ياناصر رتب الموضوع أهم شي يكون ايام الاسبوع
ووصولها في نهار لي عشان المختبرات ووقاتهم
وعلمني على الخاص موعد الارسال وبزودك برقم جوالي

[ناصرمنصورالروقي]

الله يوفقك ويكتبلك الاجر
ويرحم والديك وبينا اتصال ان شاء الله

[ناصرمنصورالروقي]

اخواني اليوم بشرني اخوي محمد الوهبي التميمي بعد الرسال عينات الدم اليه
وعمل فحص شامل للبعير اتضح ان البعير ســليم من جميع امراض الدم وستبعاد
الهيام كذلك

اشكر اخوي/محمد التميمي على استقبال المرسول ونتظاره حيث انه وصل في ساعات متأخرة من الليل ومتابعة الفحص ولايستغرب الطيب من اهله
والله يقدرنا على رد الجميل
وكذلك اهتمام الاخوان من اعضاء المنتدى المبارك.
اخواني مازال البعير على نفس الحاله الحال ينزل واذا اكل شي ينتفخ بطنة ويترك المسراح مع اماته
وذا خف بطنه يسرح وتزين اموره يومين حول حتى تنكس حالته وش الدبره يالربع

[حمد الحريّص]

وعليكم السلام ورحمة الله وبركاته

الله لايوريك مكروه لا في مالك وعيالك وحلالك

مامرت علي هالحاله لكن اتوقع مشكلة البعير في بطنه

طيب جربت الثوم ؟؟؟

=============================

ومحمد التميمي طيب ولا يستغرب عليه الطيب

[مطلق الناقول]

وعليكم السلام ورحمة الله وبركاته

ممكن تكون المشكلة في اللهاه ملتهبة واحد من الربع صارت معة تقريبا نفس المشكلة صارت اللهاه ملتهبة شالها وتحسن البعير
واللة يوفقك ويسلم فحلك
تحياتي للجميع

[ثامر المطيري]

السلام عليكم و رحمة الله وبركاته
حصلت حالة مشابه لبكره عندي تاكل وإذا بدا حالها يزين ماعاد تاكل وشانت. عطيناها علبة زيت زيتون وزان حلها و تعدل أكلها
وزيت الزيتون زين في كل أحواله

واذا كان البعير مزيون شف يمكن مرك حار عين وإقر على الزيت وشربه ما مقري. وانتبه بارك الله فيك توسوس ترى العين تجي من المعجب وحادثة الصحابة دليل كافي

الله يشفيه لك

[ناصرمنصورالروقي]

وعليكم السلام ورحمة الله وبركاته

ممكن تكون المشكلة في اللهاه ملتهبة واحد من الربع صارت معة تقريبا نفس المشكلة صارت اللهاه ملتهبة شالها وتحسن البعير
واللة يوفقك ويسلم فحلك
تحياتي للجميع



اهلا اخوي مطلق وحياك الله
وش علامات التهاب اللهاه واعراضها الله لايهينك
لاحظت ان البعير ماتطلع لهاته وحنا نفارسه ونجاهده يوم نغره بالعلاجات مع حلقه والزيوت

[ناصرمنصورالروقي]

وعليكم السلام ورحمة الله وبركاته

الله لايوريك مكروه لا في مالك وعيالك وحلالك

مامرت علي هالحاله لكن اتوقع مشكلة البعير في بطنه

طيب جربت الثوم ؟؟؟

=============================

ومحمد التميمي طيب ولا يستغرب عليه الطيب

وعليكم السلام ورحمة الله وبركاته
الله يجزاك خير ويشرك من دعواتك والمسلمين
والثوم والله ماجربته لحد الان


ومحمد التميمي الله يبيض وجهه

[ناصرمنصورالروقي]

السلام عليكم و رحمة الله وبركاته
حصلت حالة مشابه لبكره عندي تاكل وإذا بدا حالها يزين ماعاد تاكل وشانت. عطيناها علبة زيت زيتون وزان حلها و تعدل أكلها
وزيت الزيتون زين في كل أحواله

واذا كان البعير مزيون شف يمكن مرك حار عين وإقر على الزيت وشربه ما مقري. وانتبه بارك الله فيك توسوس ترى العين تجي من المعجب وحادثة الصحابة دليل كافي

الله يشفيه لك


وعليكم السلام ورحمة الله وبركاته
استخدمت زيت عافيه
والعين حق والله يحمانا وياك والمسلمين من شرالنفوس والعيون
الله يجزاك خير على دعواك

[حاتم العزيزي]

الله يشفيه ان شاءلله .. واللي اتضح لي من كلامك بعيرك بلاه في بطنه وبس .. كنك توصف واحد من العيال يوم يلتهب عليه القالون .. لكن جرب العلاجات الشعبيه اللي للبطن مثل الحلبه واليانسون والبابونج .. واخوي ثامر صادق ترى زيت الزيتون طيب بالحيل .. بس شرط يكون زيت زيتون اصلي .زيت العافيه ماينفع

[ناصرمنصورالروقي]

الله يشفيه ان شاءلله .. واللي اتضح لي من كلامك بعيرك بلاه في بطنه وبس .. كنك توصف واحد من العيال يوم يلتهب عليه القالون .. لكن جرب العلاجات الشعبيه اللي للبطن مثل الحلبه واليانسون والبابونج .. واخوي ثامر صادق ترى زيت الزيتون طيب بالحيل .. بس شرط يكون زيت زيتون اصلي .زيت العافيه ماينفع


الله يجزاك خير اخوي حاتم
ولاهنت

[خالد الحريص]

مساك الله بالخير أخوي

ممكن البعير آكلن باغه أو أنه كان ينتف الشعر وتكورة في بطنه

هذه قد تكون من الأسباب

[ناصرمنصورالروقي]

[QUOTE=خالد الحريص;539766]مساك الله بالخير أخوي


ممكن البعير آكلن باغه أو أنه كان ينتف الشعر وتكورة في بطنه

هذه قد تكون من الأسباب

مساء النور
احتمال كبير جداً
الله يكتب الي فيه الخيره
لاهنت

[محمد الوهبي التميمي]

هلا وغلا ابو منصور واجب علي خدمتك وشرواك
وللمعلوميه مازال البحث جاري عن بعض الحلول مع بعض الاطباء بخصوص فحل ابلك
وللأسف كلهم اقرو بوجود عائق في قناة الجهاز الهضمي مسبب سدد ولا اشارو لي بعلاج واضح
أنا متابع معهم وحاول تكرر استخدام زيت الزيتون في فترة الصباح لحد مانلقى العلاج المناسب

[عبداللطيف السعيدي]

هلا أبو منصور ،،
هل البعير يدمن طبيعي ..؟؟؟
والا يبطي مايدمن ..؟؟؟
وهل البعير وهو بارك يسدتخل ؟؟ يعني يقرب أحد رجليه لبطنه ؟؟
بانتظار اجابتك ،، والله يشفي بعيرك .

[ناصر بخيتان]

هلا وغلا ابو منصور واجب علي خدمتك وشرواك
وللمعلوميه مازال البحث جاري عن بعض الحلول مع بعض الاطباء بخصوص فحل ابلك
وللأسف كلهم اقرو بوجود عائق في قناة الجهاز الهضمي مسبب سدد ولا اشارو لي بعلاج واضح
أنا متابع معهم وحاول تكرر استخدام زيت الزيتون في فترة الصباح لحد مانلقى العلاج المناسب
شرواك الطيب ولا ينفع الامن ابوه ينفع
والله لايهينك ويقدرنا على رد جميلك
وبالنسبه لزيت نعطيه نهايه الاسبوع حسب تواجدنا عنده
ولاسبوع ذا يمكن نقطع الهاته شور اخونا (الناقول) والله يكتب الي فيه الخيره

[ناصر بخيتان]

هلا أبو منصور ،،
المهلي مايولي ويامرحبا
هل البعير يدمن طبيعي ..؟؟؟
والا يبطي مايدمن ..؟؟؟
الله لايهينك
يبطي مايدمن وصغير دمنه تقول دمن (مفرود)
وهل البعير وهو بارك يسدتخل ؟؟ يعني يقرب أحد رجليه لبطنه ؟؟
صحيح يضم رجليه تحت بطنه مره

بانتظار اجابتك
ونا كذلك بانتظار ردك على احر من الجمر
،، والله يشفي بعيرك .
الله يجزاك خير ويبارك في حلالك ومالك




لاهنت على المشاركة والله يكتبلك الاجر

[عبدالله بن محمد]

حياك الله اخوي ناصر كلام الناقول قريب للصحه لحاله مشابهه بناقه فيها غصه وكويناها والحمدالله مهوب شرط يكون فالجهاز الهضمي حسب ماذكرو الاخوان وافعل السبب والله يكتب الخير انشاءالله

[مسعود العماري]

البعير فيه جرح

وله علاج عند الدكاترة

وأما الطب الشعبي فيكوى مشط على مخفق الكلوة من يسار


ولا تتأخر في العلاج البيطري وان مانفع فآخر العلاج الكي

[ناصر بخيتان]

حياك الله اخوي ناصر كلام الناقول قريب للصحه لحاله مشابهه بناقه فيها غصه وكويناها والحمدالله مهوب شرط يكون فالجهاز الهضمي حسب ماذكرو الاخوان وافعل السبب والله يكتب الخير انشاءالله


هلا اخوي عبدالله
والله انا في حيره من امر البعير
شوركم علّي ينشاما هل اكويه او اقطع لهاته او اكويه وقطع لهاته سوى

[محمد الوهبي التميمي]

ناصر اللي يمسيك بالخير مره ثانيه

اود تذكير الاخوه المشاركين في الموضوع عن الأعراض اللي موجوده في البعير

السلام عليكم
ياربع عندي البعير فحل البل يخطفه مرض ينفخ بطنه ويترك العلف والماء ويعذر عن البل
يقعد في المراح مايسرح يومين ثلاثة ثم ينفش بطنه ويصحصح ثم ياكل العلف بس على خفيف
مع العلم انه اول ملاحظة علية في بداية المرض كان يرفع راسه ويمس رقبته فوق كن صايبة طير
ولا يداني لمس لهاته كويناه عن الريشية وتحسن من مس رقبته عطيناه حبوب دود ثم شراب دود
ثم طب شعبي خلطات حلبة وكربيت ثم زيت عافية ثم ابرة هيام مع انه لايشرب ماء بزيادة عيونه لاتدمع
لايوجد به انتفاخات حول رقبته ولا حول بطنة اقصد انتفاخات خارجية .له حول 4 اشهرتقريباً وحاله ينزل
لاهنتُ يالربع من قد مرة عليه الحالة لاينسانا وله دعوة بظهر الغيب

[محمد الوهبي التميمي]

ناصر لاتستعجل على قطع لهاته الا بأمر قاطع وتاكيد انه هي السبب
أنا آراء ان مالها علاقه نهائي لان الأعراض بعيده عنها
ولاابي احيرك اكثر بس اصبر هالاسبوع نشوف آراء باقي الاعضاء وأعيد الاستشاره أنا لبعض الاطباء الشعبيين

[عبدالله بن محمد]

طيب اخوي ناصر قبل الكي وقبل كل شي في طريقه ليحتل البعير بيالتين رشاد وبيالتين شاي ورق في مويه ابو ثالثه ريال ورجها وعطه اياه مع قارورة زيت زيتون واحد لتر الجوف اونادك ولا ياكل برسيم رودس بدون شعير ومكعبات والله ينفع بها انشاءالله

[ناصر بخيتان]

البعير فيه جرح

وله علاج عند الدكاترة

وأما الطب الشعبي فيكوى مشط على مخفق الكلوة من يسار


ولا تتأخر في العلاج البيطري وان مانفع فآخر العلاج الكي

هلا اخوي مسعود
الطب البيطري جربناه ولانفع والنافع الله
لاكن وش رايك في قطع لهاته مع الكوي وراي الاخوان الله لايهينكم

[ناصر بخيتان]

ناصر لاتستعجل على قطع لهاته الا بأمر قاطع وتاكيد انه هي السبب
أنا آراء ان مالها علاقه نهائي لان الأعراض بعيده عنها
ولاابي احيرك اكثر بس اصبر هالاسبوع نشوف آراء باقي الاعضاء وأعيد الاستشاره أنا لبعض الاطباء الشعبيين

الله يبيض وجهك يابو صالح على الاهتمام بأمر البعير ويرحم والديك
وبأخذ برايك وبأجل القطع والكوي اسبوع والله ان البعير حاله ماعد يسر الاعدو ولاصديق
كل يوم في نزول بس الله يعين

[محمد سالم اليامي]

جرب تعطيه زيت سمسم لحاله مع زيت الخروع

[ناصر بخيتان]

طيب اخوي ناصر قبل الكي وقبل كل شي في طريقه ليحتل البعير بيالتين رشاد وبيالتين شاي ورق في مويه ابو ثالثه ريال ورجها وعطه اياه مع قارورة زيت زيتون واحد لتر الجوف اونادك ولا ياكل برسيم رودس بدون شعير ومكعبات والله ينفع بها انشاءالله

هلا اخوي عبدالله
والله اني احاول على حله بس المشكله كل الزيوت عيت تحل المأخوذ تصدق طبختله (حنظل) مل 10لتر ولاسوت له شيء
ولاكني بجرب طريقتك عس الله ينفعه والله يكتبلك الاجر وللاخوان
الله لايهينك وش قصدك امنعه من الشعير والمكعب ولا البرسيم والرودس

[عبدالله بن محمد]

مرحباً ناصر قصدي لاياكل برسيم ولا شعير ولا مكعبات رودس ويكفيه لان البرسيم يسبب الانتفاخ والشعير

[ناصرمنصورالروقي]

مرحباً ناصر قصدي لاياكل برسيم ولا شعير ولا مكعبات رودس ويكفيه لان البرسيم يسبب الانتفاخ والشعير
مشكور اخوي محمد على النصيحة
فالحقيقه اني اعطيه برسيم وشعير والبرسيم يسبب النتفاخ للمطيه الصاحيه كيف عاد المريضه
الله يجزاك خير على التنبيه

[عبداللطيف السعيدي]

هلابك ..
بعيرك والعلم عند الله فيه عسر هضم ..
أو تلبك ف المعده ..
وعلاجه تعطيه برسيم رطب ،، تحشه وتعطيهياه ,,
واذا ماعندك ،، تلقى عند البيطري علاج التلبك ،، والله مايحضرني اسمه ،،
بس الوكاد انه بودره في كيس ,,
اسأل الله أن يشفي بعيرك ..

[ناصرمنصورالروقي]

جرب تعطيه زيت سمسم لحاله مع زيت الخروع

هلا اخوي محمد
للاْسف جربت جميع الزيوت ماعدا الخروع
ان شاء الله استخدمه وردلك خبر
الله يجزاك خير على النصيحه

[ناصرمنصورالروقي]

هلابك ..

بعيرك والعلم عند الله فيه عسر هضم ..
أو تلبك ف المعده ..
وعلاجه تعطيه برسيم رطب ،، تحشه وتعطيهياه ,,
واذا ماعندك ،، تلقى عند البيطري علاج التلبك ،، والله مايحضرني اسمه ،،
بس الوكاد انه بودره في كيس ,,

اسأل الله أن يشفي بعيرك ..


مرحبا اخوي عبداللطيف

البرسيم لاوالله ماحولي رطب الديره الي انافيها الدرع العربي ارض جرد ولاحولي مزارع
والبودره ابي اجربها
الله يباركلك في حلالك ومالك

[ناصرمنصورالروقي]

الشكر اخوي المشرف/ طلال الروقي
على سرعة استجابته لتجديد عضويتي بالمنتدى بعدمافقدة كلمة المرور
ولاهي غريبه على مشرفي واعضاء هذا المنتدى المبارك
الفزعه وحب الخيرللجميع والتعاون والشكر موصول للجميع

[ناصرمنصورالروقي]

البعير ياخوان مات عسى الله يخلف علينا بلي ابرك منه
اشكر جميع من شارك وقدم دعاء ونصح ومرعلى الموضوع
والله يبارك لكم في حلالكم ومالكم وجزاكم الله خيرا

[محمد الوهبي التميمي]

الله يعوضك باخير منه ياناصر وجعله فداء راسك

[طلال الروقي]

الله يعوضكم بخير منه بالدنيا والآخره يابو منصور ..
وعساه فدوة لأهله .

[عبدالله بن محمد]

الله يعوضك خير الحمدالله على كل حال وعساه فدوة اهله

[ناصرمنصورالروقي]

الله يجزاكم خير اخواني

[محمد سالم اليامي]

الله يعوضك بالي اطيب منه
وفادي راسك وعيالك

كان ودي انك شقيت بطنه تشوف ويش المشكله فيه اكياس بلاستك والا لا