هل الناقة مقروصة؟

[عبدالرحمن الوهبي التميمي]

صبحكم الله بكل خير

اخوكم ماش خبرة بالبل ولا نستغني عن قزعتكم

عندي ناقة لقحة

امس الصباح وصلت للمفلا ما بها الا العافية

شوي يوم شفتها ضلعت من يدها وبركت

تفقدت اليد ما بها لا شوكة ولا شيء الا تقطة دم صغيرة من فوق اليد

قامت تمشي ورا البل وتبرك لين وصلت الشبك وبركت ويدها وارمة

تفقدتها ثانية اشوف تقطة الدم وجنبها وحدة اصغر منها فوق اليد

جزمت انها مقروصة

لكن الناقة تجتر

رحت للبيطري وعطاني 3 ابر


1مضاد حيوي ( ستريب توبنسلين )
phenylbuta-kel 2
3- هستاكيور

ورشيتها بالماء والرجاء بالله سبحانه

اليوم الصباح يدها لا تزال وارمة وتضلع منها لكن باله زين


وش راي الاخوان اهل الخبرة؟

وجزا الله كل من رد خير الجزاء

[طلال الروقي]

وعليكم السلام ورحمة الله
عساك ماتشوف شر بحلالك يا عبدالرحمن ..
والمقروصة مالها الا المضاد الحيوي ..

[سعد حمود العوني]

المقروصه تلقاها تعرق بالحيل
ومالها الا المضاد الا اذا صارت توها مقروصه
فيه عرق فالعرنون قدام العين افصده
وانشاءلله تطيب

[محمد الوهبي التميمي]

هلا اخوي عبدالرحمن
بشرني عن حال الناقه اليوم؟

[عبدالرحمن الوهبي التميمي]

وعليكم السلام ورحمة الله
عساك ماتشوف شر بحلالك يا عبدالرحمن ..
والمقروصة مالها الا المضاد الحيوي ..

يا مرحبا بخوي طلال

والله لا يهينك على المرور


المقروصه تلقاها تعرق بالحيل
ومالها الا المضاد الا اذا صارت توها مقروصه
فيه عرق فالعرنون قدام العين افصده
وانشاءلله تطيب


مشكور اخوي سعد

والناقة ما لاحظتها بعرق بالحيل


هلا اخوي عبدالرحمن
بشرني عن حال الناقه اليوم؟

يا مسهلا باخوي محمد

ومشكور على حرصك

والناقة اليوم الصباح ما جاز لي حالها

حطيت لها البرسيم ولا لدت له

واليد لا تزال وارمة

[بندر الرويلي]

علاجك زين لكن المفروض انك فصدت مكان القرصة

[بندر الرويلي]

تكشيط (تقطيع سطحي) لمكان القرص بموس نظيف شي مهم وانا اعتبره من الاسعافات الاوليه للناقه قبل العلاج
والبل تسلم غالباً من الموت لا قرصها شي وكشط مكان القرصه الا اذا قرصت من الديد غالباً ماتسلم وماينفع معاها شي الا بأذن الله
والله اعلم