هل الشيء الي أسويه صح؟؟

[خالد المضياني]

بسم الله الرحمن الرحيم
السلام عليكم
ورحمة الله وبركاته
كيف حالكم ياأهل مزاين؟
حبيت أستفسر منكم عن شيء
أنا يوم اشوف الناقة أو الفحل المطلوب
رأي الأخوان به ، أول ماأناظر لراسه وتحديدًا
(العرنين - السبال - اللحى)
بعده للسنام(هل هو متقدم أو لا؟)
وبعده أبدأ أتشعب بمواري الزين
فهل الطريقة ذي صحيحة أو لا؟
يعني بالطريقة ذي أقدر أحكم على الناقة هل هي زينة أو لا؟؟
وشكرًا

[حاتم العماري]

وعليكم السلام ورحمة الله وبركاته
أعتقد أن تبدأ بالأشياء الرئيسية كالراس والرقبة والسنام والغارب والجنب ثم تنتقل للثانويه بدون أن تعطي أهميه كبيره للترتيب
المهم أن تلاحظ كل هذه الامور
وأنت خطير واعتقد ستصبح من الخبراء قريبا
تقبل تحياتي وتقديري

[خالد المضياني]

وعليكم السلام ورحمة الله وبركاته
أعتقد أن تبدأ بالأشياء الرئيسية كالراس والرقبة والسنام والغارب والجنب ثم تنتقل للثانويه بدون أن تعطي أهميه كبيره للترتيب
المهم أن تلاحظ كل هذه الامور
وأنت خطير واعتقد ستصبح من الخبراء قريبا
تقبل تحياتي وتقديري
هلا بك ياحاتم
والله أنك شجعتني بردك
ماهو بس شجعتني الا والله طنختني
وأنا يوم دخلت المنتدى ماأعرف شيء بالزين
(بالعكس كانت عندي نظرة خاطئة وكنت أكره بعض
مواري الزين مثل اللحى والسبال الوافية كنت أكرها)
وبديت أتعلم من الي مثلك وشرواك بالمنتدى ، والحمد لله
الحين بديت أميز بعض الأشياء ، ولكن المشكلة عندي هي:
-وش الأشياء الأساسية؟؟
-ووش الأشياء الثانوية؟؟
-ووش الأشياء الي ماتعيب؟؟
أنا أقول
الأشياء الأساسية هي
الراس بشكل عام(كبير - سبال ولحى وعرنين زينة)
السنام
الرقبة
العيز والغارب
الذيل
الجرم(الطول والجنب)
الأشياء الثانوية
اللون
الأذن
الاسناد


وفيه أشياء أجهلها
أو ماقدرت أميزها
أو ماقدرت أصنفها
لذلك أبي أستفيد منكم
وأشكر لك ردك الجميل
وهلابك

[عبدالله بن مطلق المزحمي]

الاخ خالد المضياني

نسال الله العظيم ان ينفعنا وياك

فيه صنفان لايمكن انهم يتعلمون

الاول المستحي
الثاني المتكبر

واللي يبغا يتعلم اي حاجه لازم انه يكون
كما قال عبدالله ابن عباس رضي الله عنهما
ذا لسان سئول وقلب عقول

ويعلم الله انا في هذا المنتدى نفرح اذا استفاد
احد الاعضاء او ارسل لاي احد الاعضاء شكر

وفيه نصيحه للمبتدئ انه يركز على اما المجاهيم
او المغاتير حتى يتقنها زين ثم يتعلم اللون الثاني
حتى لايصير عنده تشويش

اخوك
عبدالله بن مطلق المزحمي

[خالد المضياني]

هلا بك ياعبدالله
وبيض الله وجهك على ردك الجميل
وأسأل الله أن أكون ذا لسان سؤل وقلب عقول
والحمد لله انا ماني مستحي من سؤالكم عن الشيء الي
ماأعرفه ولاني متكبر عليكم
واهل مزاين ماقصروا معي
يكفي أني دخلت المنتدى وأنا ماأعرف السبال ولا العرنين والا اللحى ولا .. ولا ..ولا
وتعلمت أسماءهن من المنتدى ، وتعلمت كيف أميز بعض زينهن
وأنا ياعبدالله مركز حاليًا على المجاهيم ، ولكن أحيانًا أتشوف الوضح والصفر والشعل
ولكن الأساس هو المجاهيم
والباقي ثانوي
أسف للإطالة
وشكرًا