هل وجود الشامه عذروب في المجاهيم ؟

[ممدوح احمد الشريف]

بسم الله الرحمن الرحيم


اسعد الله اوقاتكم وتقبل الله منا ومنكم صالح الأعمال وجعلنا واياكم من عتقاءه من النار في هذا الشهر الفضيل


يا اخوان وجدت لي ناقه مجهم مزيوووونه جدا وناقة انتاج فااخر ترفع اي بعير تنتج عليه في كل بطن من بطونها وغاليه وانااجها مبيوع غالي

والناقه مانقدت عليها الاّ وجود اكثر من شامه حمراء في اكثر من مكان في الناقه رغم انها مجهم غرابيه جدا

والناقه تنقل الشامه لأنتاجها

فهل تعتبر الشامه عذروب في المجاهيم حتى ولو كان انتاجها فاخر ؟ وهل الشامه دليل التهجين ؟ وهل يأثر وجود الشامه على سعر الأنتاج او الفحول ؟

والله لا يحرمكم الأجر

[وافي مليح بن موطان]

الشامه في نظري الشخصي انها عذروب يقدح في المطيه

واذا صارت تورثها لانتاجها بعد عذروب ثاني

الشامة نعم دليل على التهجين غالبا

[راشد الكدادي]

الشامه لاتعذرب المطيه إلا بوجهة نظر الشريطيه .. والطيبه طيبه سواء فيها شامه ولابدونها !!

[صعفق الدوسري]

السلام عليكم
ياخوك هذي اكيد ابوها بعير مجدل الدوسري ويسمونه ابو شامه او شامان وانتاجه كله يجي فيه شامه ولون انتاجه كما ذكرت غرابيه وابل نوادر في الزين والانتاج وهي معروفه عندنا في وادي الدواسر ولانعتبرها عذروب بل صارت علامة جودة هههههههههه نعرف منها اصل الناقه

[عيد العوني]

يا ابو احمد الزبون او الشريطي اول ما يحصل الشامه في الناقه او البعير يتبادر الى ذهنه انها تهجين وخصوصا باكستاني وليست في مستوى السليمه من الشامه من حيث القيمه ولكن القناي الشامه لا تعذرب الناقه الطيبه في نظره

[ممدوح احمد الشريف]

بيض الله وجيهكم والله لايحرمكم الأجر

الناقه شفت انتاجها على الطبيعه شي فاخر ماشاء الله تبارك الله

ولكن الخوف ان هالأنتاج الفاخر ان رزقنا الله منه ما يجيب قيمه بسبب الشامات اللي تورثها الناقه خاصة ان قيمتها غاليه واعتبرها مغامره

يقدم الله مافيه الخير لنا ولكم وبيض الله وجيهكم

[سيف زايد]

الأخ ممدوح إن كان مالك نظرفي الناقه
ارسلي صورتها ورقم جوالك على الخاص
عندي لها زبون

[مشعل الشويش]

الشامه ماهيب عذروب فالمطيه أخي الكريـم ..
ولكن قد يتبادر إلى ذهن البعض انها دليل على التهجين وهذا الكلام غير صحيح .
واعرف لـك احد الاخوان اللي معنا بالموقـع عنده بعيرً كفـو مجهم وفيه شآمه والرجال هاده فالبل ..
..
فـ من وجهة نظري الشخصيـه أنها لاتعبر عذروب إطلاقاً ...
..

[محمد ابو عدوة]

مرحبا ياممدوح وابل الجزيرة اللي نعرف مافيها وشوم . والوشوم علامة تهجين ويستارثها الانتاج اما الناقة الغاليه مايعذربها شامه وشامتين ويفحل ولدها .وفيه فحول طيبه اماتها زرق مجاهيم .

[شبنان الشهراني]

الله يرحم والديك يا ممدوح قل أمين

من زمان وأنا أدور أجابه على هذا السؤال ونزلت موضوع في المنتدى ولا لقيت له إجابه

هل الشامه عيب في الناقة ؟؟؟

أنا شريت بكره أبوها معديان بعير الأمير بن جلوي وأمها من أبل الشيخ مجدل والبكره كفو كفو لكن عيبها فيها الشامه اللي تقول وأمها شفتها ناقة كفو وخصم سوداء غرابيه ولا فيها شامه .

وسالفة الشامه في إبل مجدل الدوسري من بعير اسمه حشيرين يقول أنه من أبل الملك خالد الله يرحمه وهذا سر فيه وفي أماته.

وسلامتك وسلامة الجميع

[رجا ال بريك]

اخوي الشامه ماهي عذروب في الناقه ولا على كل حال ان انتاجها يجيه ماصاب امه, من ناحيت انه تهجين فاهاذا غير صحيح ان عندي بكره من فحل الابل ساسه من ابلنا وامها كذلك من ابلنا وفيها شامه ولا سبق ان صار عندن مثل ذلك وجاء انتاجها عايدي لا يوجد به شامه ان شاء الله اني افدتك

[حاتم العماري]

الشامه الصغيره ماهي عذروب
لاكنها تشوش على الشرايه لاختلاف الاذواق
وعدم وجودها افضل /يعني لوخيرت بين ناقتين متقاربه في الزين ابا اختار اللي مافيها شامه
اما لافاتت بزينها فغير
تقبل تحياتي

[محمد الوهبي التميمي]

عندي ناقه فيها شامتين واحده في جنبها وكبيره والاخرى في جنبها الاخر
الناقه عارف ساسها ولا قربها التهجين