تكفون البعير ثلاثة ايام ما ياكل

[مطلق فرحان]

السلام عليكم ورحمة الله بركاتة
يا خواني انا عندي البعير اول البدى كان مايبول
وبعدين عالجتة وبال بعد كذا على طول صار
ما عاد ياكل صار له ثلاثة ايام ودمنة صغير وبطنة
منتفخ

[سلطان العريني]

البعير يا انه معكوم يعني منسد بطنه
او انه فيه ارتفاع في انزيم الكبد وهذا يخليه ماياكل ولا يشرب
وعلاجه نفس علاج الاوادم

[منصورمحمد]

هذا والله العالم الشوكه لانه صار عندي قبل اسبوعين وجبت البيطريي وقال معه الشوكه عطاه ملين وابرة بنسلين لمده 4 ايام والحين صاحي 100%

[نواف العبدلي]

كفوا ووفوا الاخوان والله يعافي بعيرك ويرزقك منه

[فارس القصاب]

مادامه يخرج فلاهو بعاكم ، البعير يمكن يكون عنده الشوكة اذا شفت دمنه مستدق ويصعب تفتيته فتراها الشوكة ويعالجونها بكية مشط على الكلو لكنها مشوهه للبعير ، راجع البيطري يعطيك مضادات كما يلزمك تاخذ لك خمسة جوالين لبن من البقالة مع جالون زيت سمسم وتعقلون البعير وتوثقونه ثم تغرونه اولا بالسمسم ثم تلحقونه اللبن وكرر اللبن يومين غير متتاليين وان شاالله يعتق

[مطلق فرحان]

الله لا يهنكم على الردود
لاكن الدكتور قال لي ان عنده
مثل التسمم الدموي وتعفن في البطن

[مسعود العماري]

انصحك أخوي مطلق بتحليل الدم والدمن ( أعزكم الله )

تحليل شامل والنتائج تطلع لك في نفس اليوم والثمن رخيص بحدود 300 ريال

وطلع البيطري يسحب لك عينة الدم وبعد النتائج تستطيع أخذ الدواء المناسب

مع أني اشك فيه التهاب كلى

[طلال بن عقاب]

أذا البعير بوله أعزكم الله فيه دم هذا فشل كلوي ودمنته مثل صغيره ولها راس حاد هذه شوكه أسمع روح للبطري وخله ياخذ عينه من الدم والبول والدمن وراح يبين المرض وتاخذ العلاج المضبوط والمناسب .