أفيدوني !!! كيف نعرف اللي في بطن اللقحه قعود والا بكره

[متعب بن سالم]

إخواني الفضلاء
يتفق معي الجميع أنه من المؤكد ومن المُسلَّم به (( أنه لا يعلم ما في الأرحام إلا الله سبحانه وتعالى ))
وأعلم بأن الموضوع غريب نوعاً ما ولكن ما يحيرني أحياناً بأني أرى أناساً (( أصحاب خبرة وباع طويل في تربية الإبل )) يكادون يؤكدون ويجزمون أحياناً بأنه مثلاً الحوار اللي في بطن اللقحة الفلانية (( قعود )) أو (( بكره )) وهكذا وغالباً ما يصيب كلامهم وبدون أي كشوفات أو إشاعات طبية
(( .... هدفي من طرح هذا الوضوع .... ))
بأنه احتمال أن هناك علامات واضحة يعرفها خبراء الإبل تدل على نوع الحوار قبل ولادته
فإذا كان أحد عنده معلومة أرجو الإفادة لنستفيد جميعاً فهذا المنتدى وبحق قسم العيادة البيطرية بالذات من أنجح الأقسام في نظري لأن فيه تبادل للخبرات وإثراء للمعلومات الطبية التي تعتبر مهمة جدا جداً جداً لنا جميعاً
وشـــكراً للجميع 000

[طلال الروقي]

" إِنَّ اللَّهَ عِنْدَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الْأَرْحَامِ وَمَا تَدْرِي نَفْسٌ مَاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ إِنَّ اللَّهَ عَلِيمٌ خَبِيرٌ " لقمان / 34

والله ياخوووووووووك ما أحد يقدر يجزم لك ان اللي في بطن الناقة قعود والا بكره .. علمه عند رب العالمين .

ولكن في الغالب الناقة اذا كانت لقحة وبطنهااااا كبير يكون قعود .
واذا كان بطنها صغير أثناء لقاحها يكون لقاحها ببكره
والله وحده أعلم

[فلاح الرشيدي]

لو تبي بكرة ومحتاجها

خل نيتك طيبة وتصدق والح بالدعاء واستغفر ربك

الله سبحانة سيجعل الخيره في ما اختار الله ان جت بكره دعائك مستجاب
او يكفيك اي شر سوى يحييه ان كان ميت

او لك الاجر لان الله يعوضك خير منه يوم القيامة

[فلاح الرشيدي]

ما من مسلم يدعو الله بدعوة ليس فيها إثم ولا قطيعة رحم إلا أعطاه الله بها إحدى ثلاث: إما أن يعجل له دعوته، وإما أن يدخرها له في الآخرة، وإما أن يصرف عنه من السوء مثلها، قالوا: إذن نكثر، قال: الله أكثر وأطيب. رواه أحمد وغيره من حديث أبي سعيد رضي الله عنه.

[متعب بن سالم]

كلامكم سليم 100% ولا خلاف عليه
لكن حبيت أشوف وش معايير بعض الناس والا الأمر اولا وأخيراً في علم الله عز وجل وكل ما جاء منه سبحانه فهو رزق طيب ولا اعتراض والعياذ بالله
ونستغفر الله من الزلل .. وشاكر مروركم الكريم وتعليقكم القيم

[جابر ابوشهاب]

ارحب يا بوسالم

انا اول مره اسمع هذا الكلام ولا اعتقد نهااااائي على خبرتي في البل انه يعرف

ووووووووووووووووووووووو لكن تقدر تعرف بطريقه وحده فقط وهو ان تعمل للناقه تلفزيوووون

وعلى كذا بتعرف

شكرا

[طلال بن عقاب]

العلم عند الله

وأخواني طلال وفلاح ماقصرو علي الرد والاجابه دقيقه .

خل الثقه بالله موجود في كل شي .

[نواف العبدلي]

اخوي بعض الناس يخمن وهو مايدري وتطلع صدفه

وخلاص على طول كل لقحة تلقاه عندها وهو مايدري وين الله حاطة

[محمد الوهبي التميمي]

مايعلم به الا الله العزيز الحكيم

[سيف القحطاني]

جزاك الله خير يا فلاح على هالكلام الطيب

[سالم ال محمد]

مرحبا يامتعب


شيبانا علمونا بشئ وهو تخميني تقريباً أحياناً الناقة اللي تجيب بكرة هذا العام مثلاً وتلقح يعرفونها بصفنها يعني ديدها يقولون الله واعلم ان الناقة ذي قالب يعني في بطنها قعود إذا ديدها ناشف ولبنه قليل يقولون الله واعلم بكرة وإذا فيه لبن واجد وهو من عقب بكرة يقولون الله واعلم انه قعود وأحياناً تطلع تخمينات الشيبان صح مرة مع الوالد غفر الله له وكان فيه ناقة ماخض فقلت له يالله ببكرة قال ابشرك انها ماخض ببكرة ان شاء الله فقلت له كيف عرفت قال الناقة صفنها اي ديدها ناشف وهي قبل العام ولدت بقعود وديها فيه لبن واجد قبل ولادها ومن هذا المنطلق يظنون والأمر عند الله اولاً وأخيراً.

[محمد بن حمد القحطاني]

يعطيكم العافيه

طرح راائع وردود أروع

وكل شي بيد الله سبحانه وتعالى

وتبقى التخمينات منها ما يصيب ومنها ما يخيب

هذا ولك تحيتي

[متعب بن سالم]

شكراً للجميع على التفاعل والمرور الرائع
وشكراً لك أخوي سالم آل محمد على مشاركتك فعلاً يا شباب هذا ما كنت أحاول أوصل له من طرح هذا الموضوع وغفر الله لوالدك يا سالم وأسكنه جنات النعيم

[سعد حمود العوني]

اول شي ماحد يقدر يجزم وش ببطن الناقه
لكن الشيبان يقولون الناقه اللي تصنف {اي تضل واقفه لاترعى} والبل في المرعى غالبا
يكون ببطنها قعود وهذا والله اعلم

[محمد الفاضل]

ماحد يقدر يجزم والعلم عند الله سبحانه

والبدو يتوقعون مثل ماقال زميلنا سالم المحمد
اذا الناقه لقحه عقب بكره وقربت ولادتها وديدها ناش ماهوب حافل
يتوقعون ان اللي في بطنها قعود ويقولون الناقه ذي (قالب)
والعكس صحيح والعلم عند الله

[سليمان بن فهد]

الأخوة الكرام حياكم الله جميعا يقول واحد من الشيبان إن الناقة اللقحة إن جرت وطوفت فوق السنة تقريبا بشهر جابت قعود والله العالم

[ابراهيم الحربى]

العلم لله اولا وخيرآ عالم الغيب

بس انا بدلكم علي طريقة مضمونه ومجربه وسهلة ولا تخطي ابد بأذن الله الا اذا كنت مدمغ جدا وهي













بعد مايتصل عليك العامل اللي في العزبة ويقول لك الناقة الفلانية ولدت انشده

قعود ولا بكرة وانت بتعرف ان شاء الله

وسلامتكم

وأسال الله البركة

[جابر ال جابر]

الدليل الواحد اللي يستدلون به البدو هو ماذكره الاخ سالم ال محمد وقد يصيب وقد يخطي

لكن ان بغيت الدليل القاطع اصبر سنة وايام

[تركي بن عبد الله]

الأخوة الكرام حياكم الله جميعا يقول واحد من الشيبان إن الناقة اللقحة إن جرت وطوفت فوق السنة تقريبا بشهر جابت قعود والله العالم
+1

[عبدالله حمد العتيبي]

ا للـــه ا عـــلـــم

[ثلاب الحسيني]

اخووي ابو سالم واخوني الاعزاء حقيقه موضوع شيق ومشكور على طرحه


اولا واخيرا العلم عند الله سبحانه والتوقعات لها دلائل كثيره وبعضها تصيب ولافيها شي وعلمها الاكيد عند الله سبحانه.

اما بالنسبه لتجربتي انا كنت مع احد الشيبان اللي من يوم طلع وهو مع البل ماتركها الين عجز واخذه معي باستمرار للبل

وفي يوم من الايام هو اللي قالي من كيفه الناقه هذي يمكن فيها قعود وهذي يمكن بكره المهم ان مررته على 13 لقحه عندي تصدقون بالله انه جاب منهن 11 صح واخطا في ثنتين.

وسالته وشلون قالي لاتعلم احد ترها ماتصيب دايم بس اللي يعرف ناقته يقدر يتوقع وش فيها لانه يعرفها من قبل وشاف لقاحها ووبرتها وخاطرها وحالها

المهم باعطيكم زبدة كلامه يقول مع اني حاولت بعده كم مرره وماجت معي صح مثله يقول اعرفها من وبرتها ووجهها وحالها

قلت وشلون قال اللي تزين ووبرتها زينه وخاطرها زين فيها بكره والعكس قعود لان القعود انشط من البكره واكبر حجم ويمص غذا الناقه ولاهو مثل البكره.

والشايب هذا للحين عايش والله يعطيه طولت العمر ويحب البل واهلها

وسلامتكم

[صالح بن حسن البقمي]

الهرج كثر ومااقول الا العلم عند الله وبس

[متعب بن سالم]

كلنا يا أخوي صالح موقنين بأن العلم عند الله عز وجل
واستفدنا من تجارب بعض الشيبان الله يطول أعمارهم وكلامنا تبادل خبرات
وشاكر لك مرورك ومشاركتك

[عادل الضويحي]

السلام عليكم ورحمه الله وبركاته
الموضوع شيق وبقوه ومشكور اخوي على هالموضوع الشيق
العلم عند الله سبحانه وتعالى

[صالح العاطفي]

الله الي يعلم مافي الارحام
الي تشوفها قليل بروكها يندقها القعود والي بروكها طبيعي بكره
وهذا المعلومه اخر ثلاث شهورمن اللقاح شرط تواجدك بكثره عند البل
توقعات مافيه شي اكيد والحكى واجد والله المستعان

[فيصل الزعبي]

الناقه الي التسدح واجد فيها قعود والله اعلم

[اشرف العوفي]

.....أنا يقول اللي عندي وعلى الله ....


ياااااااطويل العمر...أنا قبل مده قابلتلي شايب خببببببره بالبل ونشدته عن ديد الناقة..قلتله ياعم الناقة ملاقيه خلاص بتلد ومره ينزل الحليب ومره يرجع ...لييييييييييش؟؟؟

قال.."هذا انت يالشايب" يقولون الاولين:اذا اللي ببطن الناقة. قعود يرضع امه ..طبعا وهو بوسط الرحم-----وليا كانت بكرة الحليب ماينزل ويرتفع ...يعني ماترضع


ومااااااااااندري عن الصحيح

[سلطان بن علي الروقي]

انا مع كلام اخوي اشرف العوفي وهذا اللي حنا نعرفه لكن مايبين الا في اخر اللقاح اذا حلب ديس الناقه فاذا حلب اليوم ونش بكره فهي باذن الله لقحه بقعود واذا حلب اليوم ولا عاد نش حليبه فهي باذن الله لقحه ببكره والعلم عند الله
وكذلك بقولون الشيبان اكثر الابل تباطن يعني تلد بقعود وتلقح بعده ببكره وهكذا

[بندر الرويلي]

صف النيه وخل نيتك طيبة في كل شي وادع ربك بالبكار ويرزقك ربك

[متعب بن سالم]

ياليت الاخوة المشرفين تقفلون الموضوع
يبدو ان بعض الاخوان فهمونا غلط وكأننا لا نعرف الدعاء والتوكل على الله
وشاكر مرور الجميع

[خالد العايذي]

[QUOTE=متعب بن سالم;514595]إخواني الفضلاء


يتفق معي الجميع أنه من المؤكد ومن المُسلَّم به (( أنه لا يعلم ما في الأرحام إلا الله سبحانه وتعالى ))
وأعلم بأن الموضوع غريب نوعاً ما ولكن ما يحيرني أحياناً بأني أرى أناساً (( أصحاب خبرة وباع طويل في تربية الإبل )) يكادون يؤكدون ويجزمون أحياناً بأنه مثلاً الحوار اللي في بطن اللقحة الفلانية (( قعود )) أو (( بكره )) وهكذا وغالباً ما يصيب كلامهم وبدون أي كشوفات أو إشاعات طبية
(( .... هدفي من طرح هذا الوضوع .... ))
بأنه احتمال أن هناك علامات واضحة يعرفها خبراء الإبل تدل على نوع الحوار قبل ولادته
فإذا كان أحد عنده معلومة أرجو الإفادة لنستفيد جميعاً فهذا المنتدى وبحق قسم العيادة البيطرية بالذات من أنجح الأقسام في نظري لأن فيه تبادل للخبرات وإثراء للمعلومات الطبية التي تعتبر مهمة جدا جداً جداً لنا جميعاً

وشـــكراً للجميع 000

هلا بك يابوسالم
تابعت أغلب مداخلات الأخوان وتعقيباتهم على موضوعك
والحقيقة فيه ناس أهل عرف في هالمسألة
والحقيقة الثانية ما كل شايب يعرف حتى لو انه شايب بعضهم مكانك راوح وهذا من واقع المعايشة والمرافقة
وفيه ناس بادين قريب مع البل وتعدو غيرهم بمراحل وهم توهم شباب وهذا من فضل الله عليهم
والمسألة تحتاج مع مطاول البل دقة ملاحظة لاغير
وأنا وقفت على شيء من هذا ومعرفة اللي في بطن الناقة قبل الولادة ولا أبالغ إذا قلت ان المسألة بسيطه للي تردد فيها وعنده دقة ملاحظة وكل الدعوى في البطن وكيفية التمدد والتكور فقط لاغير ولاعلاقة للوبر ولا الديس ولا جرت أو ماجرت وأكثر نجاح هالملاحظات لبعضهم في حلاله خاصة
لأن بعض النياق لها وضع خاص مثل كبر وسعة البطن
وأنا قد خضت هالتجربة بنفسي في حلالي وصحت بنسبه كبيره ولله الحمد والمنة
وفي النهاية يبقى الأمر بيد الله وتوقعاتنا ليست قطعية الدلالة ولكن تقويها الخبرة والملاحظة والمطاول وكثرة المتابعة

تحياتي للجميع