وش اسوي مع الحوار

[خالد الحجي]

يالربع مين عنده علاج لايبخل علينا عندي حواره لها 10 ايام من يوم ولدت رضاعتها ضعيفه وثاني شيء تعاني من مشكله بالرقبه الحوار يذرق طبيعي ولايوجد اسهال لكن تحس في مشيتها انها رافعة راسها للأعلى شوي واذا مسكت راسها ترغي وثاني شيء لي يومين اعطيها مضاد حيوي 3 سم بالعضل وفتامين هـ بالفم 2.5 سم بس اللي عنده خبره بمشكلة الحوار او علاج بيطري او شعبي لايبخل علينا

الحواره بعض الأحيان تقوم لوحدها وبعض الأحيان بمساعدة وتبرك وتتسدح كأنها طبيعي لكن المشكله بالراس والرقبه!!!

[علي ال مرعي]

هذي نقص فيتامينات او نحاس وعيد المنصوري راح يفيدك ولكن احرص من الكي ترا المرض جا حواره عندي وكويتها وماتت والمرض هذا شفته السنه هذي في اكثر من اربعة حيران.

[خالد الحجي]

مشكور ياعلي على ردك والله يعوضك إن شاءالله

أنا ياخوفي تطور حالته أنا قلت اسأل اذا فيه علاج او اعطيها ابر معينه فتامينات او شيء عشان ماتطور حالته للأسوأ دام انه باقي على حيله لأن قبلها حصلت مع حوار نفس بدايته وأهملته حتى أصابته الحنوه بالرقبه ومات !! وينك ياعيد ؟؟؟؟؟

[مسعود العماري]

الاخ/ خالد

هل يوجد احمرارفي عيون البكرة وخاصة من فوق؟

هل رقبة البكرة ما تثبت وراسها يلعب؟

لان احتمال ان في الحوارة دوام

وله علاج شعبي ( كي على الراس) وله مضاد حيوي ( التيرماسين)

واذا المشكلة في رقبتها فاحتمال فيها رقب وتكوى من يمين ويسار ( مطارق)

وعلى العموم لاتستعجل على الكوي لانه مثل ما قال الاخ/ آل مرعي فأنا شخصيا كويت حواره

وماتت.

فأنت اولا حاول تحدد وش المرض منه

وفي انتظار رد ابواحمد وباقي الاخوان

[عيدالمنصورى]

ابشر ياخالد
ليتك شاورتنا قبل تبلش بالادويه والمضادات
المهم عليك بالتالي وعلمني وش يصير معك لمتابعة الحاله
خذ ابرة بنسلين واسحب منها 5سيسي واخلطها مع ماء وغرها الحوار مره بالصبح ومره بالمسا ء
فقط وبعدها خذ براس الملعقه نتفة ملح ونتفة سكر واخلطها مع ربع زجاجة مياه صحه صغيره وغرها الحوار
وابعد عن الادويه والابر لين تعلمنا بالنتيجه

[فيصل بن مرخان]

الله يكون في عونك

[فهد الأحمد]

الحالة هاذي مرت علي
فيما يخص قلت شرب الحليب ورفعة الرأس لفوق
الحوار والعالم الله
فيه نحاز

[خالد الحجي]

مشكور يالأخوان على تفاعلكم وردودكم الحواره ماتت واللله يعوضنا
الحواره أول ماولدت كانت ضعيفه ورضاعتها ضعيفه ولكن سانده طولها ولا عليها ومافيها اي مشاكل وسألت الدكتور قال هذا نقص فتامين هـ 2سم بالفم واعطيتها مضاد حيوي 3سم بالعضل وكأن الحوار له يومين أفضل وتركت العلاج يوم بعدها الحواره تحس أنها ماتقوم الا بمساعده واذا مشت رافعه راسها فوق وكان فيه صوت بالتنفس عندها كأنها شخير واعطيتها نفس العلاج ولما اصبحت ماعاد قامت ومنسدحه على جنبها ورقبتها ماتنعدل تتلوا بعدها تركتها واصابتها الحنوه بالرقبه ملتويه على غاربها حتى اصبحت اليوم اللي بعده ميته وهالمشكله مرت معي في حوارين
لكن ابي اعرف وش هالمرض وكل الناس هالسنه تشتكي من هالمشاكل ودي يطرح موضوع نناقش فيه مشاكل الحيران وطرق الوقايه من ناحية الناقه مروراً بالحوار لوكم جزيل الشكر على ردودكم وبيض الله وجيهكم

[فيصل بن مرخان]

الاخ خالد اذا التوت الرقبه اهذي اشاره انها تحتضر وانشاء الله بحط موضوع
البكره اتاخرت عليها ولا كان ودي اضيق صدرك لا كن الله يعوضك
....
الحوار الي ما يقوم من ولادته بيوم واحد بلكثير يحتاج لعنايه واذا طول يموت
اخوك

[خالد الحجي]

يافيصل مساك الله بالخير

أنا ودي وبمشاركتكم نعرف وش الأسباب مروراً بالناقه لأن أكيد الناقه تكون سبب وثاني شيء نبي بمعرفة الأخوان وش أفضل شيء الواحد يسويه كوقايه للناقه أو الحوار اول مايولد ولك تحياتي

ودنا نناقش هالموضوع لأنه مهم جداً ولك تحياتي

[فهد الأحمد]

الله يعوض عليك أخوي خالد
ويرزقك بخير منها.
اللهم آمين

[خالد عبدالرحمن الحربي]

السلام عليكم ورحمتة الله وبركاتة
انا عندي حوارة والظاهر انها تشبه هذا المرض
بس الحوارة كانت سليمة في الرضاع والمشي وبعد 15 يوم صاب الحوارة اخمرار في العين والعين الثانية بياض
وعطيتها ابرة وشافت بعين والعين الحمراء على حالها وخذت وقت وطاحت والحين ماتقوم حتى لو اقومها
وانا اظن ان البلى في ارقبتها لقومناها نزلت ارقبتها او من عينها الحمراء وهي ماتشوف فيها
مع العلم انها ترضع بالرضاعة زين وعطيتها ابر وفيتامينات

[خالد عبدالرحمن الحربي]

الله لا يهينكم وش علاجها

[ناصرالموسى]

السلام عليكم أخوي خالد والله يعوض عليك بخير منها إن كان الناقة من أول لقاحها وهي عندك فيمكن إن التغذية للناقة لها دور كبير في ضعف الحوار ولذلك انا قد قال لي الدكتور إن الناقة أول ماتعشر عندك أكرمها بالعلف والشعير وغيره ألثلاثة شهور الأولى للحمل لأنها المراحل الأولى لتكون الجنين فربما إن الناقة كانت أول لقاحها لم تكرم بالأعلاف خصوصا أن عشارها العام زي هالوقت كانت الأعلاف في ارتفاع شديد وربما إن بعض الناس اكتفى فقط بالتبن وأنا أقول يمكن هذا له دور................. وسلامتكم

[راشد المطيوعي]

اخوي فدا راسك والله يعوضك باحسن منها ويبارك لك في حلالك

[إبراهيم مزعل العتيبي]

انا الي اعرفه ان هاذا الشيء يجي من شيئين
اما ضربت شمس ويسما ادوام وعلاجة البنسلين وترويش بالمويه وتوضع في ضل

اما الشيء الثاني فهيا الحبنى تجي في الرقبه والغارب وتمص دم الحوار وتكسر رقبته وعلاجة الجاره يمسح بها الحوار يومين حتى يستصح

[بركات هنيدي السلمي]

ولدت عندي حواره لديها نفس الاعراض التي اوردتها في حوارتك وهي ترفع راسها واوقات تلوي رقبتها وتقوم علي يديها وتطيح ان قمت بمساعدتها ومساندتها للرضاعه ترضع من امها
وليمن عطيتها حليب بالرضاعه ترضع الحليب اللي تعطيها وبعد ثلاثه ايام ماتت والله يعوض علينا بكل خير
الشاهد ان امها ناقه طيبه بالحليب وعندي خلفها بكر مصغر حليبها قليل قلنا نظيرها على الناقه وقمنا بسلخ جلد الحواره الميته
واثناء السلخ وجدنا سبب نفاقها وجدنا ان الحواره منبزره من قدام الديد والستار منشق ولا راد الامعاء غير الجلد
وسئلت العامل عن كيفية ولادة الناقه قالي انها ولدت واقفه وقام بسحب الحواره ويبدو لي ان العامل شد الحواره بقوه وبطريقه خاطئه او ان امها او البكار واطية عليها