تعااالواا يالربع نتناقش ونفيد الجميع ،،، ونطلع بنتايج نهائية

[خالد بن عبدالعزيز]

بسم الله والصلاة والسلام على رسول الله
فيه مقولتين او عادتين منتشرة عند بعض اهل البل
ودنا نتناقش وكل ذي خبرة يعطينا رايه بتجربته او بخبرته
ومدى صحة هالكلام ومدى واقعيتيه
الاولى / ان الفحل ما ينظر لأول انتاجه
والثانية / ان القعود اللي يصير بكر امه مايفحل حتى لو الساس والام طيب (وهالنقطه بالذات ودي نسلط الضوء عليها)
والف شكر لكل من يتفاعل ويعطينا من خبراته و يفيدنا ويفيد الجميع

[فلاح الرشيدي]

السلام عليكم

تم نقاش البكر للناقة

http://www.mzayan.com/vb/showthread.php?t=7354

اتمنا يفيدك

[فلاح الرشيدي]

الاولى / ان الفحل ما ينظر لأول انتاجه

كثير فحول انتاجها الفاخر في بدايته وفي ايضا تاليها

على حسب التفحيل

[خالد بن عبدالعزيز]

بيض الله وجهك يافلاح
وعز الله ما قصرت
انا ماكنت ادرى انه قد تم النقاش فيها
لكن حبيت اثيرها لانه كثير من الناس لها وجهات نظر مختلفه
وحبيت نطلع بكلام مقنع للجميع من واقع العلم المشترك بالخبرة المشترك بالتجربه

[حمد الغواص]

مرحبا بك اخوي خالد وشكرا على المشاركه

والشكر موصول للاخ فلاح الرشيدي للتوضيح

[خالد بن عبدالعزيز]

مرحبا بك اخوي خالد وشكرا على المشاركه

والشكر موصول للاخ فلاح الرشيدي للتوضيح

يامرحبا بك يامشرفنا الغالي واشكرك على المرور والاطراء
والشكر موصول لاخونا فلاح وماقصر
ومازلنا ننتظر التفاعل والإفادة من اخواننا بالمنتدى

[حاتم العماري]

اخي الحبيب
انا اقدر واحترم خبرة الباديه وخاصة في امور البل
ولكن اذا تعارضت مع العلم فالعلم اولى بالاقتناع
هذه جينات وراثيه جعلها الله لحفظ النوع والصفات
والجينات ثابته في الفحل ولا تتغير في اول هداده او في اخره وهي مخزون الصفات الوراثيه لانتاجه
وكذلك الامر لولد البكر ولكن هناك سبب قد يمنع من تفحيل ولد البكر وهو الجرم لان ولد البكر احيانا مايكون جبر بالشكل المغري بتفحيله مع العلم اني شفت فحول هايله في الزين والجبر وامهاتها اباكير
تقبل تحياتي

[عبدالمحسن المقاطي]

اخوي أود أن اشكرك على طرحك الجميل

الاخوان ماقصرو ولكني احب ان اضيف

ان الفحل المشهور وحيدان بكر امه ايضاً الطعم فحل مرزوق الكربي

[مبارك بن عبدالعزيز]

مرحبا خالد
لاهنت على الموضوع الطيب
النظريه الاولى انه الفحل ماينظر لاول انتاجه ربما تكون صحيحه
لبعض الفحول فيه فحول انتجت من اول سنه وفيه فحول بعد ثلاث جولات بدا يزين انتاجه
انا اعرف لي فحل هده راعيه اول سنه انتاجه عادي وثاني سنه ايضا عادي وثالث سنه
اضرب بعض البل وانتج نوادر واشتهر ومسكوا الناس عنده سرا
النظريه الثانيه
ولد البكر انا اعتقد نظريه انه مايفحل لان جرمه يكون صغير
مايصير مثل ولد الفاطر اما من ناحيه اخرى ماعتقد يضره بأي شي
وأكبر دليل وحيدان ال جهيم من افضل الفحول المجاهيم وامه بكر

[خالد بن عبدالعزيز]

يامرحبا بالجميع
ووالله اني سعيد بتفاعلكم مع الموضوع
وفرحت بهالاسماء اللي تداخلت واثرت النقاش
وافادتنا بصراحة....
وانتم الان وصلتوا للنقطة اللي كنت ابي اوصلكم لها
واللي هي ..
اذا افترضنا ان ولد البكر جرمه طلع صغير وتم تفحيله
هل الانتاج يتاثر بجرمه وصغرة ويكون تاثير صغرة باين في انتاجه
والا انه ينتج بسره واصله وعرقة من الاساس...
طبعاً كلنا نؤمن ان هالامور بيد الله سبحانه وكلها غيبيات
ولكن نتكلم عن امور علمية وتجارب وخبرات ..
الصراحة اشكر الجميع واتمنى التوفيق والرحمه للجميع

[فلاح الرشيدي]

بارك الله فيكم

يلعلم الله ماكان قصدي ان الموضوع مكرر

كان قصدي اني اعطيكم الرابط وافيد في تشعيب والموضوع

خاصه اني كررت وشاركت بالموضوع في رايي واتمنا الابتعاد عن المقولات القديمه ان الفحل ماينتج من اول طرح

بالعكس فحل خالي عبدالله الخنفور اول طرح له فاخر جدا وصحيح ان بالمستقبل يطرح افضل بس هو هو على حسب سر الناقه

وعندكم حشار بالموقع

شوفو هنا

http://www.mzayan.com/vb/showthread.php?t=32682

[خالد بن عبدالعزيز]

يا مليون مرحبا بك ياخوي فلاح
ماني مجبور على الحلف ولاني محدود عليه ..
لكن والله اني ماجى ببالي فكرة انك تقصد تكرر الموضوع وعدم الفايدة
واني خابر ان مقصدك تفيدني و تفيد كل من يمر على الموضوع ..
ولا خلا ولا عدم منك ومن خبراتك ومن مثلك يعتبر علم نستفيد منه
دون قصور في باقي الاخوان
وانت طيب ومانشوف منك الا الطيب وبعيدن عن الهقاوي الناقصة...
اشكرك جزيل الشكر واتمنى لك دوام الصحه والعافيه ..
اخوك / خالد بن عبدالعزيز الخالدي

[ناصر اليامي]

الاخ خالد والكلام للجميع

اول شي الناقه البكر هل كل بكرٍ غيرها تساوى هي وياها بالطول - جل العظم - شقتها - عمرها ؟؟؟
طبعا الجواب بيكون لا بدون جدال , فيه بكر تشره على عمرها وفيه بكر عمرها عمر فاطر وشقتها شقت فاطر من زود غلاها وهذي اللي ما فيه مانع انك تفحل ولدها
وان جاتك البكر اللي باقي ما ظهر عونها ولا ااستوفت غلاها ابعد من ولدها ولا تفحله ..

وثاني شي يا طوال العمار الفحل هل يبدا ينتج بعد برقه الاول اصابعك ماهيب سوى في فحول برقها الاول فردي وبرقها الثاني فردي وكل برق ينتج فردي
وفيه فحول ينتج برقه الاول عادي وكل ما تقدم عمره بدا يطرح الفردي

اتمنى اني ابديت عليكم ما يفيدكم وعندي كلام اكثر شموليه بخصوص هذي المواضيع لكن اعذروني وقتي ضيق

[خالد بن عبدالعزيز]

ياهلا بك ياخوي ناصر
وعز الله انك شرفتنا ونورتنا وافدتنا جعلك تحيا
ومنك ومن باقي الاخوان الطيبين نستفيد ...
وحنا وياكم وصلنا لنقطة اللي منها ودنا نوصل للنقطة الثانية
واللي ذكرتها بالرد السابق واللي هي تاثير الجرم في الانتاج
يغلب والا السر يغلب اذا افترضنا انه ولد بكر وجرمه صغير
اتمنى اننا نستفيد منكم يا اخواننا ويستفيد الجميع ...
والله يجزى الجميع بالخير ..
ونسينا نبارك لاهل الديار الممطورة والله يجعله نازل بالبركة
وجعله متبوع ولاهو بقطوع

[عبدالرحمن عبدالعزيز]

الاخ خالد
صباح الخير

اتفق مع ما قاله الاخوان وبالاخص ما سطره الاخ حاتم العماري
فالصفات الوراثية لن تختلف في البكر عن الفاطر

كما انه بكل تأكيد ان اهل البل الاولين لا يحرصون على تفحيل ولد البكر ليس لشيء سوى ان الحجم يكون اصغر من ولد الناقه الكبيره ولكن هذا في زمانا مضىء
اما اليوم وقد توافرت الاعلاف والاغذية المدعمة بأنواع الفيتامينات ناهيك عن الاهتمام الزائد به من الناحية الصحية للامهات والمواليد يجعلك لا تهتم ان كان ولد بكر والا ولد فاطر من تلك الناحية (الحجم)

اهم شيء برئيي ان يكون ذو صفات طيبه من الناحيتين الاب والام واذا توافر ذلك هد و ترجى الله في الانتاج الفاخر

وتقبلوا تحياتي

[خالد بن عبدالعزيز]

يامرحبا يابو عبدالله
وعز الله انك شرفتنا بمرورك وافدتنا بعلومك
لكن الى الان ودنا باللي يفيدنا بالنسبه للعرق او الجرم للفحل
من اللي يغلب الثاني ويجذب بالانتاج

[عبدالرحمن عبدالعزيز]

حياك الله اخوي خالد

بكل تأكيد العرق وليس الجرم
وذلك لان العرق صفات جينيه اما الجرم الصغير الناتج من كون ام الحوار بكره فهو صفات فسيولوجيه بالامكان التحكم بها
اما ان كان صغر الحجم (الجرم ) نتيجة صفة وراثية في الام او الاب فلابد ان تجده في انتاج البعير

ارجوا ان تكون الفكرة وضحت لك

وتقبلوا تحياتي

[خالد بن عبدالعزيز]

بيض الله وجهك يابو عبدالله
والله يرحم والدينا ووالديك والمسلمين عن النار