خروج دم

[فارس القصاب]

عندي فاطر مستالده وحالت لها حول سنة ونظفناها وقطعنا منها ولقحت وبعد ستة اشهر اصعدت ، مادري من حرارة الصيف او شي من البل عطن عليها المهم انها حذفت الحوار، بعدها عطيناها ابر ومطهرات واضربناها ولا درينا هي لقحت ولا لا المهم انا فكينا البعير وعدى بها دون بقية اللقاح واضربها غير ان الغريب انه كلما اضربها خرج من رحمها دم واثناء الضراب الاحظ انها اتوجع من ذكر البعير مع انه يستشمل عليها ويدخل عسوبه في حياها كامل ، من منكم يفيدنا في مشكلة خروج هذا الدم ورغى الناقة عند الضراب...سلمكم الله،،

[مشاري العتيبي]

الناقه معها التهاب حاد في الرحم وعطها بنسلين عند البيطري لمده ثلاثه ايام

[محمد سالم اليامي]

الرحم ما هو نضيف شف لك باخس والا دكتور يدخل عليها

[عبيد العجمي]

اخوي الله يمسيك يالخير ,, بالنسبه للصعاد يمكن فيها حمى مالطيه ,,
وترا الفحل مستحيل يضرب لقحه ,,
وبالنسبه للدم يمكن على ماقال اخوي التهاب ولا فيها عش .

[فارس القصاب]

شكرا جزاكم الله خير

[سلمان بن حمد الدوسري]

أرحب يافارس . أنتبه !!
نفس الحالة بالضبط صارت على ناقة عندي وجبت دكتور ونظفها وضربها البعير وطلع دم ،، جبت سوداني له خبره ونظفها وضربها البعير وطلع دم ،،، وطالت السالفه حوالي ست شهور وحنا نضرب ويطلع دم ،، الحقيقه الناقه مزيونه وتوقعت أن فيها عين ،، مع العلم أنها ماحالت كان حوارها توه مبيوع وهو أبو خمس شهور .. آخر شي بعتها بقيمة بخس على سوداني ،، مع ذكري للسوداني أن رحم الناقه فيه مشكله . وأبريت ذمتي ،، أما الأطباء كلهم يقولون نسبة عدم خروج الدم واللقاح 1% يعني إنا لله وإنا إليه راجعون .، وأنت حاول عن شخص يفهم في ((((( الرحم ))))) لأنه مهوب كل واحد يعرف يخش على الرحم لأنه حساس جداً ( بعضهم يحط فيري إذا جا يدخل وبعضهم يحط زيت وبعضهم يحط شحم وبعضهم يحاول بالمويه وأنا سمعت أن كل هذي خطأ ) وفي الحقيقه ما أدري وش الصواب ... الخلاصه أن الرحم ما ينلعب فيه اسألني راحت علي ناقه بثلاثين ألف سايقها كاش والله .

[فارس القصاب]

شكرا ياسلمان والله يعاوضك خير ، ويصلح النا ولك..

[صالح بن حسن]

نفس الحالة بالضبط صارت على ناقة عندي
ومازلت ابحث عن علاج

[فهد الأحمد]

جب لك دكتور يكشف على الناقه

حسب الشرح .. يبدو لي أن الرحم قافل.
وهذا سبب خروج الدم.

وسلامتك