علاج البل اللي تاكل الغزل

[سالم بن صمهود]

ياجماعة بارك الله فيكم احد منكم يعرف علاج للمطية اللي تاكل الغزل عندي حشوان سمان ويشبعن من العلف لكن اكلن غزل بعضهن وغزل اماتهن

[سالم بن لاحم]

حط لنا ملح او فكهن في الحمض

وترى السبب الرئيسي الحكرة في الشبك

[سالم بن صمهود]

لاهنت يابو لاحم لكن اقول ان كل انواع الملح حطيناه ولافيه فايده وفيه ناس ماعرفت ابلهم الشبوك وتاكل الغزل وانا لما سئلت البيطري وعلمته انهن سمان ويشبعن من العلف قال لي هاذي عاده سيه وعرفت انه ماعنده سالفه قلت لعلي احصل احد عنده تجربه واخذبها بعد التوكل على الله جلت قدرته

[حمد الحريّص]

راجع هذا الموضوع ربما تجد بعض الفائده

http://www.mzayan.com/vb/showthread.php?t=25118

[عبدالله الهديان]

المشكلة في العلف حيث أنه من الملاحظ أن الأبل والغنم اللي تعطى الوافي تاكل شعر بعض

[سالم بن صمهود]

الله لايهين الجميع واقول لاهلحين ماعينت الحل عسى الله يجيبه

[مطلق حمود الهاجري]

أرحب يا سالم


قبل سنتين كانت ابلنا بالكويت وشريت بكره ولحظتها تاكل الوبر وشريت أدويه كثيره بدون فائده وواجهت شخص وعلمني طريقة بصراحه نجحت معي وهي :


اشتر دواء النحاز وعقله البكرة او الناقه التي تاكل الوبر وأعطائها حقنه حسب عمرها وأحضر ( ابره ) او خلال بيت الشعر وفتح حلقها راح تلقا

الجما والهاء منتفخه اضرب الخلال او الابره بس خفيف وليس بقوه وأخذ الملح الخشن وتهك الجما والهاء ملح كثير وانشاالله تشوف شي يسرك والله

أعلم أنا عملت هذه الطريقة ونجحت معي .ولي سنتين ما لحظت أكل الوبر ...؟


والله ولي التوفيق

[فواز عبيد]

السلام عليكم ورحمة الله وبراكاته اخوي سالم جرب الشري اطحنه ونقعه يوم وبعدها رش اظهور البل وانشاء الله راح اتشوف اللي يسرك انا جربتها وجربت الفلفل الاحمر وطابت ولله الحمد

[مشعل الحطاب]

اخوي جيب فلفل بودر واخلطه مع زيت وحطه على الناقه الى توكل

[نواف الحربي]

العلاج الرمث

واذا استمرت الحاله اكثر من عشرة بعد اكل الرمث

عالجها من الدود وان شاء الله تسلم

[ناصر الشيباني]

انا اوافق الربع اللي يقولون الحبحر الحار


الفلفل الحار حطه على شعفت الحوار او الناقه اللتي تؤكل شعفتها


واذا ذاقت الناقه او القعود الحبحر ماعاد يعودها


هي بصراحه نذاله بس نعتبرها علاج :)

[حاصل اليامي]

مرحبا يا بو فيصل

كلام البيطري فيه شيء من الصحه لكن انت اشبك الحشوان بشبك وسيع وجللها كلها الين تنسى الغزل وبعدين فكها مع البل على واحد واحد يعني كل عشر ايام واحد واللي تشوفه يرجع رجعه للشبك ...وفيه طريقه الشري على غزل الحاشي اللي يوكل مجربه ونافعه

[عبدالعزيز البريدي]

اسباب اكل الوبر والله اعلم :
1- ضيق الشبك .
2- نقص املاح .
3- دود .
4- جوع .

والاخوان ما قصرو في الحلول لكن اشوف افضل حل تاخذ لها بلك ملح وتركزها عندها وتعطيها نص حبه دود وتكرمها بالاعلاف واخر حل حط الفلفل الاحمر على الشعفه ..

[تركي بن عبدالعزيز]

السلام عليكم ورحمة الله وبركاته

انا كان عندي نفس مشكلتك مع الحيران سمان وياكلون وبر بعض وسعت الشبك والحمدالله انحلت المشكله بتوفيق الله سبحانه