لمن عنده خبرة في تجارة الحشو

[خالد المطلق]

السلام عليكم جميعا

سالني احد الاقارب عن مشروع تجارة الحشو وقال ليش ماتبدأ فيه ابرك لك من تجميع الخلفات واللقحات


انا طالب من كل اهل الخبرة والمعرفة توضيح هالامر لي

هل شراء مجموعة حشو خلال السنه ثم بيعها في رمضان افضل (تجاريا) من شراء اللقحات في الصيف وبيعها بعد الولادة

كم اسعار الحشو بالعادة ...

ماهو افضل وقت وارخص وقت لشراء الحشو

كم مقدار تعليف الحشو من البرسيم باللبنة يوميا .. اتمنى التوضيح من اهل العلم لي ولجميع رواد المنتدى

[محمد سالم اليامي]

وفي السماء رزقكم وما توعدون يا خالد
شوري عليك مر السودانين وشف كم يشترون منك وكم بيبيعونك بعدا حدد الله يرزقنا وياك بالحلال الطيب لكن اشوف الغنم ابرك لك من البل وتعبها

[خالد المطلق]

مشكور يابوسالم على الرد

وبانتظار شور البقية

[سلمان بن حمد الدوسري]

مساك الله بالخير

بالنسبة للأفضل فالعلم عند الله ! يمكن رزقك في تجارة الحشو ويمكن في اللقحات .
لكن صل استخاره وشف وين نفسك بعدها بكم يوم متوجهه عليه ،،، يمكن ماتشتغل فيهن كلهن ويمكن تستمر في وحده منهن .
وفيه طريقه لشراء الحشو وهي ( إذا جاء يوم الاربعاء والخميس تمش حول قصور الأفراح اللي في القرى بشكل خاص بتحصل أحياناً قعدان في شبك قدام صالة الأفراح عانيات لأهل العرس ! خذ رقم جوال القايم على الزواج واسأله الحشو للبيع وان قال سم فسمها جمله وبتحصل خير كثير لأنهم مهوب فاضين لها وغثاها وأنت بتجي تشيلها وبتكفيهم العنوه وبتحصلها بسعر مناسب جداً ) طريقه مجربه وفعاله .

[خالد المطلق]

مشكور على المشاركة وعلى الاقتراح يالدوسري

[احمدالشلاحي]

اسعااااااااااار الحشو بعد موسم الربيع وتكثر الخلفات والحيران
وتلغا الاسعار من 2000 الى3000 حسب الحاشي السمين
ويوم يقرب الصيف سعر البيع افضل تكثرالافراح وتكثر الطلبااات
والله يرزقك

[علي عبدالله اليامي]

اللي بيصبر على الحشو تراه ابرك بس امراضها واجد خاصه اللي بالمزارع اما اللي في البر طيبه

[فهد القحطاني]

أرحب ياخالد تراحيييب المطر

تجارة الحشو فيها خير لكن يبغا لك الأمور التالية

1- أن يكون تواجدك بالرياض مثلا أو مدينة كبيرة مثل الرياض
2- أن يكون لديك وقت فراغ كافي وذلك لحضور وقت الجلابة البدو
3- أن يكون عندك ملحمة وذلك لتلبية طلبات الزبائن الراغبين في ربع أو نصف
4- أن يتم التنسيق مع الشركات المستهلكة للحوم الحواشي
5- الأخلاص في العمل والقناعة بالربح القليل يجلب الزبائن إليك ويخلي عندك زبائن بكثرة
6- وجود شريك يقوم بتغطية العمل إذا صار عندك ظرف طاريء
7- وجود سيارة لشيل الحشو

هذا والله يوفقنا وجميع المسلمين لكل خير وكسب الرزق الحلال

وتراني في خدمتك بالذي أقدر عليه إذا كنت من أهل الرياض

[محمد الراجحي]

السلام عليكم ورحمة الله

كيف حالك ياخالد مشترى الحشو في اخر الربيع يكون سعر الحاشي من 2000الى3500 تقريبا ويبداء ارتفاع سعر الحاشي فالصيف الى وقت ولد الابل , شراء مجموعة حشوافضل تجاريا من شراء اللقحات في الصيف وبيعها بعد الولادة , والحاشي ياكل ربع الي تاكله الناقه اللقحه يعني اذا اللقحه تاكل لبنة وحده الحاشي ياكل ربع لبنة.

ملاحظة:(بيع الحشو على حسب تصريفك وذكائك وفهمك لسوق وافضل الاقات العصر والاماكن في الاسواق الكبيرة مثل الجنادرية وعند قصور الافراح والتعامل مع المطاعم , اما مشترى الحشو يكون جمله ومن المراح يكون ارخص من السوق)

هذا الكلام من وجهة نظري ورايي الشخصي والله يعينك عليها فيها تعب وفيها خير وان شاءالله يفيدونك الاخوان بالمعلومات الطيبة والدال على الخير كفاعله

[خالد المطلق]

مشكورين وماقصرتوا وبيض الله وجيهكم
الاخ فهد اقحطاني كفو والله وماتقصر يالغالي

انا من اهل الرياض وان احتجت شي راح اطلبه منك ومانيب هايب معرفتك الا ابسعى لها يالغانم