استفسار ياهل البل عن الميول في مفاصل الحوار؟؟وارجو الردعاااااجل

[نايف فلاح]

السلام عليكم ورحمة الله وبركاته ومبروك عليكم العشر الاواخر والله يتقبل منا ومنكم صالح الاعمال
بغيت استفسر منكم يالنشاما عندي احواره عمرها 9شهور بدا فيها ميول في يديها من عند براجيمها (المفاصل الي فوق اخفوفها)
وعطيتها ابر حديد ونحاس ولا نفعت ؟ هل القيد ينفع او الكي واذا كان الكي ينفع بامر الله من وين اكويها
والله يجزاكم خير ويوفقنا للي فيه صالح

[علي الدعجاني]

متطرقه يديها

اعزلها لحالها وخفف عليها الطعام بالحيل

وردها لاتمشي واجد وقصر الشبك اللي هي فيه

والله يشفيها

[صالح ناصر]

اخوي فلاح ماعليها العافيه تكبر وتتعدل ان شاء الله ,,
بس خلها في شبكها ولاتسرح مع باقي الحلال كلامي عن تجربه والله يستر عليها ..

[عالي العماري القرني]

هذا فدع ، والطرق شي ثاني

وعلى حسب علمي القاصر ما راح ينفع معه الدواء والله أعلم

[نايف فلاح]

الله يجزاكم خير الجزاء ويبارك لكم في حلالكم ومالكم

[خالد الغزلي]

هذا والله اعلم تفدع
ابر الحديد وتصغير الشبك وتخفيف العلف ولاتسرح مع البل
والله يشفيها ان شاء الله

[ناصر اليامي]

رش عليها بنزين أحمر يوميا تشوفها يوم تلقص
وفايدته يشد أعصاب يدها
وهذا مجرب والله يشفاها

[علي الدعجاني]

الخطاء مرجوع

انا دخلت وانا عجل وكتبت طرق والصح فدع

متفدعه يديها


ومثل ماقال اخوي خالد الغزلي