القعود مايقوم

[نايف عواد]

السلام عليكم ورحمة الله وبركاته
يالربع عندي قعود عمره شهرين ونصف له خمس ايام مايقوم حتى لو نرفعه يطيح مايرتكي على ايديه ,
كنت عازله عن امه في شبك صغير وطلعته قبل خمس ايام من شبكه مشيه ماهو متوازن يروح يمين و يسار ,
ثم تدرج للأسوى يمشي كم متر ثم يطيح والحين مايقوم نهائي ,
جبتله البيطري وعطاه زي المغذي في رقبته مع زيت في فمه ومافي نتيجه ثم عطيته ابرة مضاد ومفاصل في اللحم وفيتامينات في فمه ومافي فايده علما انه يشرب وياكل ويذرق طبيعي ( الله يكرمكم )
غسلته بالجره وكويته لاكن مانفع ...

وجزيتم خيرا..........

[نايف عواد]

يالربع وش السواه ؟؟؟؟؟

[بدر العطاوي]

فتش القعود يمكن فية حبنان اللي اهو الحلم الصغير

واذا لقيتة غسلة بجرة صبح وليل

وشلون حرارة القعود ؟؟؟

الظاهر انها ماهي بطبيعية

[احمد العطية]

لا يكون الطير يانايف أنا صاب بكرة عندي تقريبا نفس حالة قعودك عدم توازن بالمشي وعطيتها علاج الطير وبرة بفضل الله

[نايف عواد]

الله يجزاكم خير على المرور .
الحوار جبتله البيطري وقال فيه حراره وعطاه علاج بس مانفع .
وش اسم علاج الطير لاهنتم واعراضه ؟
واحد قالي فيه الطرق وش رايكم يربع وش اعراض الطرق ؟

[خالد الحجي]

مااتوقع إنه طير دام إنه ياكل ويشرب طبيعي يمكن فعلاً فيه طرق ( لين) بالمفاصل تاكد فيها شيء ؟؟؟

[عيدالمنصورى]

فيتامين ه او e selenium مع b1

[بدر العطاوي]

ان كان حرارة ابي اعلمك بس تراني ماجربتة اللي جربة واحدا

من العيال والحمدلله يقول خمس حبات فيفادول تحطها في علبة الماء ابو نص

وتعبي الماء اين حد الورقة من تحت وترج العلبة لين الحبوب تذوب

ثم طال عمرك تعطي القعود على جرعات ماهو تصبة في بطنة كلة لا

تعطية جرعة ثم جرعة ثم جرعة وخل القعود يتطعمة

وشف وش يصير ورد علينا

والله يوفقك ويعقل عليك

[نايف عواد]

مساء الخير .......
الحوار الله يعوض بخير مات .
لاكن وش رايكم في الايام هاذي كم الساعه اشمل الخلفات وكم الساعه افكها اذا كان عمر الحوار ثلاث شهور ؟

[عادل الروقي]

الله يعوضك خير يانايف
وبعدين وانا اخوك شفلك بيطري فاهم ( من غير شر على حلالك وعساك ماتحتاجه ابد )
انا قبل ثلاث اسنين صار لي مثل هالحاله في حواره أخذت ثمانيه ايام ماتقوم وان امها سبحان الله تجي فوقها وتفوحج وترضعها وماخليت عنها شي في العلاجات الشعبيه وآخرتها جبت لي بيطري وعطاها ابره في الوريد وقال نص ساعه اوساعه وتقوم والله ماكملنا ربع ساعه إلا وهي قايمه بأمرالله والحمدلله
وفي البدايه والنهايه كل شي بيد الله سبحانه ،، وحنا نفعل بالاسباب .
وأذا احتجت اي شي استفسارات او اسئله عن حاله اوعلاج عندك اخونا عيد المنصوري ومن غير اقصور في باقي الاخوان تراه فاهم ومايقصر الله يجزاه خير

أما بالنسبه لسؤالك عن تشميل الخلفات
مثل ماتخبر حنا الحين في عز القيض وماودك ان الحوار يرضع في الحر
شمل الخلفات من الساعه 10 او 11 الصباح وفكهن لعيالهن من بعد العصر
الله يوفقنا وياك ومن يقرأ .

[نايف عواد]

الله يعطيك العافيه ياعادل ويبارك في حلالك .
وش رايك من افضل بيطري في الجنادريه عسانا مانحتاجه .....

[عادل الروقي]

عندك طال عمرك صيدلية الصحراء بيطري اسمه زكريا 0503181404
وفيه واحد في صيدلية الفحول الظاهر ان اسمه محمود

[نايف عواد]

الله لايحرمك الاجر ياعادل لاهنت .....

[بدر العطاوي]

معوض خير وجعلة فدوة لراسك

[نايف عواد]

تسلم يابدر ومشكور على المرور .