أستفسار يرجال أذا أمكن ؟؟؟؟؟؟

[طلال بن عقاب]

أمسي للجميع بدون أستثناء

ياجماعة الخير عندي الفحل يبول دم من عشر أيام وعطيته 3 كورسات ومانفع وجبت دكتور البيطري وأخذ عينة دم وعقب ماطلعت النتيجه يقول فيه بداية فشل كلوي هل أحد منكم سمع في هذا شي.

أرجوا من الجميع المشاركه والمساعده وجزاكم الله كل الخير .

[علي الدعجاني]

فشل كلوي؟


اللي عند بعيرك التهاب


هل هو ضرب ناقه خلفه توها اوقريب والد؟


اسأل الله تعالى ان يشفيه

[عبدالله الجدعان العنزي]

يا طلال , الله يصبحك بالخير . أنا أشارك كلام الأخ / فيصل . هل بعيرك مضرب خلفه توها والد . والرأي الأخر , أتمنى أنك تغير الطبيب وتروح لطبيب غيره . وألله يشفي بعيرك .

[طلال بن عقاب]

مرحبا ألف باالجميع

أي بلاه ضرب خلفه وحايل

وطبيب هذا ظاهر مومضبوط والله يجماعه ماصدقته كلش فشل كلوي ؟؟؟

[زاهر العرجاني]

الله يشفي بعيرك ياطلال

اما البيطري اللي هذا تقريره عن حاله بعيرك ماعنده سالفه

واول مره اسمع بالفشل الكلوي في البل لكن انا مع الاخوان يمكن انه مظرب له ناقه ماهي نظيفه مثل الحايل

يبغى له حميه لاتخليه يظرب له وقت وبيسلم ان شاءالله

[ناصر بن جاسر]

ابو عقاب

بشرنا وش صار على البعير ..؟

اذا هو للحين على حاله

اتصل على هذا الرقم 0503929322

اسمه الدكتور الطيب احد ابناء النيل الازرق

قله من طرف جارك ابو ناصرالعتيبي

وان شاء الله بيفيدك

واشرح له حال البعير

وش عطيته من علاج ونتايج العلاج

وبشرنا

[طلال بن عقاب]

مرحبا بالجميع

البعير علي نفس حالته جبت له بيطري وعطيته من الابر ودربات ةالمحاليل والفيتامينات والفوسفار ومضاد حيوي جنتم مكسين ومنسلين حق الكبد والكليتن يحميها ويغسلها وكل شي سويته ومافيه فايده الحمدلله علي كل حال .

وسأل رجال بصير في طب الابل قالي هدا المرض (( كلبه )) وله كي ومكان الكي بين مفرق الوروك يجماعة الخير ينشامه أحد مر عليه هذا المرض أرجوا الرد والمشاركه والله البعير غالي مشتراه

[خالد الحجي]

اللي أعرفه إن البعير اللي يبول دم معه ( الجرح ) أو مايسمى الشوكه!!!

هل البعير قبل لايبول دم تردت حالته من ناحية الاكل ومن ناحية الممشى ودايم بارك على احد جنبيه؟؟؟

[طلال بن عقاب]

اللي أعرفه إن البعير اللي يبول دم معه ( الجرح ) أو مايسمى الشوكه!!!

هل البعير قبل لايبول دم تردت حالته من ناحية الاكل ومن ناحية الممشى ودايم بارك على احد جنبيه؟؟؟



الاخ الكريم : خالد الحجي

البعير قبل الحاله مافيه شي وأكله وشربه للماء من احسن مايكون والجرح أعرفه ودنته اعزك الله ومن يسمع زينه البعيرقالي واحد انه (( جلبه )) هل هذا صحيح